A 25 annos de sa morte sua in un’intzidente de màchina in su tunnel de su Pont de l’Alma de Parigi – pagu prus de un’annu a pustis de sa separatzione ufitziale sua dae su prìntzipe Càralu – sa tràgica fine de Lady Diana sighit a iscasidare pregontas e inchiestas noas. Ma comente fiant istadas sas ùrtimas oras de sa printzipessa in sa capitale frantzesa?

Lady D arribbat a tzitade su 30 de austu 1997 paris cun su cumpàngiu suo Dodi Al-Fayed, aterrende a s’aeroportu de Bourget pro s’ùrtima tapa de sa vacàntzia europea in antis de sa torrada a Londra. In su primu merie, cara a sas 16 e 30, sa còpia arribbat a su Ritz de Place Vendome in su primu arrondissement, abetada dae una surra de paparazzi in chirca de fotos esclusivas. A sas 17 e 40 sa printzipessa e su cumpàngiu suo bìsitant diversos apartamentos e faghent unu brincu in sas butegas de lussu de sos Champs Elysèe. Segundu Vanity Fair, Al-Fayed intrat a una butega de oraria pro chircare e acuistare un’aneddu pro isposare. Sa chena in programa in unu ristorante esclusivu de su Marais, bighinadu in su coro de Parigi, benit burrada a s’ùrtimu momentu a càusa de sa presèntzia de sos fotògrafos, chi los sighint in totue. Lady Diana paris cun su cumpàngiu suo tando chenant pro s’ùrtima bia in una sala isolada de su Ritz.

Aende detzìdidu de colare sa note in un’hotel privadu de s’òmine de afares egitzianu, s’iscuadra de sa seguridade elàborat un’istratagemma pro cullunare sos fotògrafos ammuntonados in s’intrada de s’hotel. Sa Mercedes 600 de Al-Fayed movet pagu a pustis de sa mesunote sena sa còpia, chi imbetzes lassat s’albergu essende de palas cun un’àtera Mercedes, ma a ogna contu los bient e benint sighidos  dae sos paparazzi. A mesu note e mesu, chimbe minutos a pustis de sa partèntzia, sa Mercedes ghiada dae Henri Paul isbandat a 150 km/h e atumbat a s’internu de sa galleria suta de su ponte de s’Alma. S’autista morit deretu, gasi comente Dodi Al-Fayed. Lady Diana est galu bia. A pustis de s’arribu de sos sucursos, nche cheret prus de un’ora pro nche la tirare  foras de sa màchina. A sas duas de su mangianu, sa printzipessa de Galles arribbat a s’ispidale Pitiè-Salpetrière in cunditziones graves. Vìtima de un’emorragia interna e de un’arrestu cardìacu, Lady D morita  sas 4 e 25 de su 31 austu 1997 a s’edade de 36 annos. S’ùnicu a subravìvere a s’intzidente est sa guàrdia de su corpus, Trevor Rees-Jones.

“Progetto finanziato con l’Avviso Pubblico IMPRENTAS annualità 2021-2022”

Referendum supra sa zustissia, itte prevedit sa refforma supra sa cale ant a votare sos italianos.

Su 22 e 23 martu sos italianos ant essere giammados a votare pro detzidere si cambiare carchi parte de sa Costituzione in sa parte de su funtzionamentu de sa magistradura.Supra s’ischeda elettorale bi at essere una dimanda meda cumplicada pro itte bi sunt solu sos numeros de sos articulos de sa Costituzione chi ant essere cambiados, chena ispiegare in manera simple cale sunt sas novidades chi si prevedint.

Su referendum no est pro problemas medas chistionados de sa zustissia italiana, comente sos protzessos longos meda o sa mancantzia de pessonale in sos tribbunales. Su votu si cuntzentrat imbetzes supra s’ordiminzassione de sa magistradura e supra sas regulas de su tribagliu de sos magistrados. Sa refforma prevedit tres cambiamentos printzipales e importantes.

Bidimolos. Su primu est s’ispitzigu intre zuighes e pubbricos ministeros. Oe bintrant in sa magistradura cun su mattessi cuncursu e faghent parte de su mattessi assentu. Cun sa refforma sos duos caminos diant essere divididos in manera deffinitiva. Segundu chie agguantat su cambiamentu custa divisione diat faghere divennere su zuighe prus indipendente in su mamentu in su cale devet dezidere si una pessona est innozente o affartada. Chie est contrariu, invetzes, pensat chi su sistema de oe affiantzet giai ecchilibriu e chi ispitzigare de su tottu  sos duos rolos potat creare difficultades novas.

Su segundu puntu est pro su Cunsizzu Superiore de sa Magistradura, s’organu chi si occupat de sas carrieras de sos magistrados. Sa refforma prevedid de lu ispitzigare in duos: unu dedicadu a sos zuighes e unu a sos pubbricos ministeros. Sos partetzipantes diant essere seperados cun d’unu sorteamentu e non prus cun d’una elessione. S’urtimu cambiamentu est pro su sistema chi dezidit pro sas penalidades a sos magistrados. Sa refforma prevedit sa creassione de unu organismu novu chi si diat occupare propriu solu de custos protzedimentos.

Cun su referendum sos tzittadinos ant deppere seperare si mantennere sas regulas de como o faghere custos cambios in su funtzionamentu de sa magistradura italiana. In sas urtimas chidas custas votassiones ant tentu azzesu su cunfruntu politicu e sas animas de sos partidos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22