In sa pratza de sa Marina de Porto Cervo, in Costa Smeralda, su 26 de austu b’est istada sa prima editzione de sa manifestatzione dedicada a s’Ogliastra, una de sas chimbe Blue Zone a su mundu. Su regista Pietro Mereu, imbentore de su fèstival, at biagiadu tra sas biddas de Àrthana, Baunei, Talana, Orthullè e Biddamanna Strisàili pro connòschere sos medas tzentenàrios chi bi bivent e documentare sas testimonias issoro.

“Sos tzentenàrios ogiastrinos, una de sas pertzentuales prus artas a su mundu, bivent s’esistèntzia issoro in modu simpre, gosendesi de su clima favorèvole de sa zona e benint bisitados dae mèigos dae ogni parte de su praneta chi chircant de iscobèrrere su segretu de sa longevidade issoro”, ispiegat su regista. S’eventu, a intrada lìbera, est organizadu dae s’assòtziu Mater Dea, dirìgidu dae Mereu acostagiadu dae sa vitzepresidente Ludovica Piras. Sa serada de su 26 faghet parte in su progetu Sardinia Discovery Journey, programa de marketing territoriale regionale Insula Sardinia Quality World, promòvidu dae s’assessoradu regionale de su Turismu e de su Cipnes, su cunsòrtziu industriale de sa Gallura.

A s’eventu importante meda est istada sa testimonia de Battistina Secci, tzentenària de Orthullè, chi at contadu su “menù de sa longevidade”. “Màndigo pagu cosa – contat Tzia Battistina -. A ismùrgiu una tzìchera de té cun late cun un’istiddu de cafè e duas fitas biscotadas. Gasi so cuntenta, serena e pràndia. Posca cara a sas 11 màndigo una tassa de yogurt e mi chitat su fàmene. A pràngiu duos culurgiones, a  merie una tzìchera de té e a chena una tzìchera de late”. Nudda binu nen licores pro Tzia Battistina, mancari in gioventude in domo sua si fegheret s’abbardente.

Posca at iscoviadu fintzas su segretu de una matrimòniu serenu e durajolu: “In domo s’allegait. Si bidiat su chi b’aiat in fàghere, ognunu naraiat su chi pensaiat e posca si pigaiat una detzisione. A sa fine si concruiat semper in su matessi modu: faghe tue, naraiat maridu meu”.

Durante sa serada est istadu projetadu su documentàriu de Mereu “Il Circolo dei centenari” e a pustis ant allegadu is màssimos espertos de longevidade sarda, Gianni Sarti, presidente Cdel ipnes, Gianni Pes, chircadore Blue Zonas, Giovanni Scapagnini, mèdicu e chircadore, Raffaele Sestu, mèdicu de sos tzentenàrios. A s’acabbu totus ant tastadu s’Aperitivu de sos Tzentenàrios, cun  produtos enogastronòmicos tìpicos de sa dieta sardu-mediterrànea.

 “Progetto finanziato con l’Avviso Pubblico IMPRENTAS annualità 2021-2022”

Sas vias de sa tramuda, a daenantis cun iscavos e balorizzatzione: risurtados novos in sos nuraghes de Tortulè e Triei.

Andant a daenantis cun resurtados importantes sos interventos de iscavu,accontzu e balorizzatzione de sas alas nuragicas intzididas in su disignu “Sas vias de sa tramuda” in Ozzastra. Duos in particulare sos logos interessados dae sos tribaglios: su nuraghe s’Ortali ’e su Monti in s’iscrocca de Tortulè, e su nuraghe Bau Nuraxi de Triei, ambos duos a su tzentru de avantzamentos importantes supra su pianu iscientificu e de su recreu pubbricu de su tempus benidore.

A s’Ortali ‘ e Su Monti, unu de sos sitos  appillados prus nodidos e bisitados de s’Ozzastra, est finida sa fase de iscavu archeologicu. Su cumplessu, chi accansat nuraghe,pobuladu, tzirculu megaliticu, domus de janas e tumbas de tzigantes, sighit a torrare notissias novas mancari sos istudios los fettant dae tempus meda. Sas scruccullas fattas dae pagu ant fattu iscoperrere atteras zuras de interessiu, amprariande sas connoschentzias supra su situ e arricchinde s’esperientzia culturale apparada a sos bisitadores.

S’interventu, fattu sutta s’affilamentu de sas Sovrintendentzias archeologicas, est bistada fatta mescamente po una turre accosta e s’antemurale de su nuraghe. In su mentres de sos tribaglios sunt bistados iscopertos po su prus, picculos de isterzos de attividades in domo, comente su tessinzu e s’ammaniada de sa cosa de pappare. Finida sa fase de iscavu, su disignu bintrat como in d’una fase nova chi prenettat interventos de accontzu, su faghere un’impiantu novu de sa lughe- pensadu fintzas po su sero, e sa creassione de unu caminu novu po bintrare a su monumentu. Si at a faghere puru s’azzorronamentu de su sistema de sas notissias e de sos poster, po rendere prus fatzile sa bisita e mezzorare sa cumpresa de unu situ de cumplessidade manna. Sa summa totale de sos tribaglios, partidos in su mese de aprile 2025 est de casi 200.000 euros.

Novidades importantes arribant puru dae su nuraghe Bau Nuraxi de Triei, inube in su mese de martu passadu sunt bistados cussinnados sos tribaglios de iscavu. Su situ, chi est mannu meda e de importantzia iscientifica, fuit bistadu scudrignadu solu in partzialidade in sos annos Ottanta. S’interventu de oe interessat in manera particulare sa zura chi andat a sa parte de su riu, una zura sinzada dae sa prena de su 2008 chi aiat fattu dannos a una parte de su cumplessu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22