Sa Brigata “Sassari”, fiat istada costituida su 1° de Martzu de su 1915 a Tèmpiu (SS) e a Sìnnai (CA) cun duos Regimentos, su 151° e su 152° fanteria, formados totus de sardos ebbia. S’unidade fiat istada cunsiderada s’eredera de sas traditziones de su Terçio de Cerdena (perìodu aragonesu-ispagnolu) e de su Regimentu de Sardigna (perìodu Sabàudu).

Gasi, in s’agabbu de ghennàrgiu 1915, da su Capu de Istadu Majore de s’Esèrtzitu fiant partidos sos òrdines pro sa formatzione de sa Brigata Sassari.  Sos repartos de sa 151° si fiant costituidos in Casteddu, cun sa leva obrigatòria chi corpiat  totu sos comunos de sa provìntzia de Nùgoro. Sos coscritos de sas àteras provìntzias aiant postu a paresu 152, in Tèmpiu. S’unidade fiat istada costituida  unende sas cumpangias  pro mandamentu, gasi  fiat capitadu a s’ispissu fintzas chi iscuadras intreas fiant istadas formadas de su totu dae òmines de su matessi bidda e finas dae parentes. Si fiant creados in modu naturale sos sentimentos de solidariedade, de cameratismu e de emulatzione.

In peruna chirca o istùdiu subra sa Brigata s’agatant sas motivatziones de sa creatzione de unu corpus formadu in base regionale. Si diat pòdere pensare chi siat istadu s’ùnicu modu pro “fàghere partetzipare” sos sardos a s’isfortzu bèllicu, ma non ismentigamus chi fiat giai in s’orgànicu de sa Fanteria sa Brigata Casteddu, 63° e 64° Regimentu, aposentada in tempus de paghe in Salerno, sa cale teniat intre sos distretos de reclutamentu suo su de Sàssari; su 45° Regimentu Fanteria in Sàssari e su 46° Fanteria in Casteddu teniant comente  distretos de reclutamentu Avellino, Gènova, Messina, Pinerolo, Roma e Venètzia. Si diat èssere tando pòdidu fàghere a prus pagu de costituire una brigata noa faghende pònnere a pare totu sos sardos àbiles coscritos in custas formatziones istàbiles.

Cale fiat istadu su motivu chi aiat induidu s’Istadu Majore a costituire una Brigata  cumposta dae  sardos ebbia?

Fortzis una risposta podet èssere agatada in s’oportunidade pro s’esèrtzitu de si dotare de una fortza in manera sotziale  e in manera polìtica gestìbile. In prus pro pònnere a sa proa sos resurtados operativos de unu grupu unidu pro apartenèntzia territoriale e, fortzis ancora de prus, pro si dotare de una fortza de interventu cun caraterìsticas culturales e polìticas bene definidas. Su 95% de sos Sassarinos aparteniat a sas categorias de sos massajos e de sos pastores.

Sas capatzidades de sa Brigata Sàssari fiant bènnidos subidu postas a sa proa dae s’Artu Cumandu pròpiu durante sa Prima Gherra Mundiale.

Est intre sas Brigatas prus decoradas de sa Grandu Gherra; pro reconnoschimentu de su balore e de s’eroismu de sos fantes suos a sas Banderas fiant istados cuntzèdidas 2 Medàllias de Oro pro cada regimentu, atent tentu 4 tzitatziones ispetziales subra sos bulletinos de su Cumandu Supremu, a sas fanfaras de sos regimentos su Re, motu etotu, aiat cuntzèdidu sas drapellas Beras (iscudu sabàudu e istemma de Sardigna), durante sa ritirada in su Piave sa Brigata fiat istada tzitada dae su Cumandante de sa retroguàrdia, Tenente Generale De Giorgio, a s’ammiratzione de sa Natzione e de s’Esèrtzitu pro s’abnegatzione e s’ategiamentu eròicu  tentu.

“Progetto finanziato con l’Avviso Pubblico IMPRENTAS annualità 2021-2022”

Un’organissasione criminale abbarbada in su mesudie de sa Sardigna, ma cun coffuzones internatzionales fortes in Belgio e Paesi Bassi, est bistada iscupulada in d’una operassione padria dae parte de sas fortzas de s’ordine chi ant arrestadu tres pessonas e at secuestradu benes po pius de tres miliones de euros. Secundu cantu ant nadu sos de sa politzia, sa truma fit responsabbile de aere battidu in Sardigna una cantidade manna de cocaina, po unu totale de 77 chilos.

Sa droga beniat carrada cuada supra de camions mannos chi partiant dae su nord Europa, passande divressas frunteras fintzas a arribare in s’isula.

Una borta arribada a destinu, sa cocaina beniat bendida in su mercadu locale, cun d’unu balore tantadu intre tres e ses miliones de euros. S’iscrucculla at permittidu de assebertare un’organissasione de otto pessonas, tres de sas cales abbisadas comente fundadores de s’attividade illetzida, mentres atteras chimbe diant aere tentu rolos de azzudu de s’organissasione. Sa truma, mancari esseret discreta meda, fuit istrutturada bene e teniat fintzas cabbales accolomicas de signifficu.

Sas iscruccullas ant difattis battidu a su secuestru de pius de 90 parados, intre domos e terrinos postos a su pius in su mesudie de s’isula, paris a paritzos camions e disponibilidades de dinari. Una parte de su patrimoniu, chi si pensat siat de sas pessonas sutta de iscrucculla, est bistada agattada fintzas in sos Paesi Bassi. In su mentres de sas attividades de iscrucculla sunt bistados secuestrados puru vinti chilos de cocaina sinchera meda, mentres tres curreos incarrigados de che leare sa cocaina sunt bistados arrestados.

S’organissasione impittaiat maneras diligadas, impittande macchinas modificadas po cuare sa droga e chircande de faghere faddire sos controllos po mesu de caminos istudiados in tottu sos particulares.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22