A s’època de s’arrestu, acontèssidu su 29 de nadale 1985, teniat 24 annos e istudiaiat Economia e a Casteddu. Su sero de su 2, a s’internu de s’esertzìtziu cummertziale Bevimarket, supermercadu ispetzializadu in sa bèndida de bibite, fiat bènnidu ochidu su propietàriu. Paret chi sos rapinadores esserent duos o tres e chi, cugugiados cun passamontagna, si fiant fuidos conca a unu caminu chi podiat lòmpere a presu de domo de Aldo Scardella. Indagadu ca unu de sos passamontagna impreados durante s’irrobatòriu fiat istadu agatadu in unu giardinu cundominiale de su palatzu in cale istaiat, fiat istadu  arrestadu. Custu mancari sa percuisitzione aiat dadu èsitu negativu comente s’esàmene de sa parafina. In pagos faeddos non bi fiant proas.

Scardella fiat istadu interrogadu e arrestadu cun sas sighentes motivatziones: “Esistent indìtzios sufitzientes de curpevolesa a càrrigu de s’acusadu pro pòdere afirmare chi Aldo Scardella siat curpèvole”.  Dae prima fiat istadu inserradu in su càrtzere Bonucaminu de Casteddu, posca fiat istadu trasferidu, in regìmene de isulamentu, in su càrtzere de Aristanis. Durante su perìodu detentivu no aiat tentu mai sa possibilidade de adobiare su difensore suo, mentras sos familiares l’aiant torradu a bìdere sa prima borta a pustis de bator meses, su 10 abrile 1986, cando fiat istadu trasferidu torra a su càrtzere de Casteddu. In regìmene de isulamentu non teniat peruna possibilidade de cuntatu cun àteros detentos.

Psicologicamete reduidu a su stremo, Scardella fiat istadu agatadu mortu impicadu in sa tzella sua su 2 de mese de argiolas de su 1986, a pustis de 185 dies de presonia. Si fiat semper decraradu innotzente e aiat lassadu unu billete de adiosu: “Bos pedo perdonu, si m’agato in custa situatzione lu depo petzi a mie etotu, apo detzìdidu de la fàghere finida. Perdonade·mi pro sos dannos chi apo causadu. Mòrgio innotzente.”

In su 2002 duos òmines de sa  “banda de Is Mirrionis”, fiant istados cundennados in bia definitiva pro sa morte de Giovanni Battista Pinna. Enzo Tortora, vìtima fintzas issu de sa “malagiustizia”, si fiat ocupadu de su casu de Scardella e fiat andadu a cummemorare sa tumba sua. A sa Fonsarda, a palas de sos giardinos Giovanno Paolo Secondo, b’at una pratza dedicada a issu.

 “Progetto finanziato con l’Avviso Pubblico IMPRENTAS annualità 2021-2022”

Dae sa presone a su tzinema:s’istoria de Beniamino Zuncheddu divennit unu film.

S’istoria de Beniamino Zuncheddu, unu de sos casos prus graves de faddinu zudissiariu in Italia, at a divennere a sa lestra unu film.Un’istoria longa e prena de dolore chi at sinzadu in manera funguda sa vida de un’omine, adduradu in presone pro prus de trint’annos mancari eppat semper nadu de essere innotzente. Zuncheddu, ex pastore sardu, fuit bistadu arrestadu in su 1991 accusadu de una mattansa in Sinnai, in sa cale fuint bistadas bocchidas tres pessonas e un’attera fuit addurata ferta in manera grae.

In cussu tempus fuit pagu prus che unu piccioccu, ma fuit bistadu cundennadu a sa presone a vida pro mesu de elementos chi in su tempus si sunt iscobiados chena nissuna fidantzia. Pro prus de trint’annos at bividu in daesegus de sas travessas,perdinde sos annos prus importantes de sa vida sua,attesu dae sa famiglia, dae sos affettos e dae cale si siat possibilidade de si fraigare unu tempus benidore. Una vida suspesa, sinzada dae s’isettu e s’isperantzia de podere dimustrare
s’innocentzia sua. Solu in su 2024, pustis de una battalla legale longa, fatta de ricursos e controllos de su protzessu, est arribada s’assolutzione deffinitiva chi at reconnoschidu chi no aiat cummittidu su fattu, torrandeli sa libertade.

Una detzisione chi at atzesu s’attentzione supra s’accadessidu e supra sas responsabbilidades de unu sistema chi, in custu casu, at faddidu in manera grae.Como cust’istoria arribat a su tzinema cun d’unu film chi at a contare non solu su casu personale suo,ma fintzas su pesu umanu e sotziale de una cundenna male
fatta.Sas ripresas si prevedint in Sardigna e su disignu puntat a faghere connoschere a unu pubbricu prus mannu una muda chi at corpadu in manera funguda su pubbricu.

Su film at a contare sa sufferentzia,sa soledade e sa fortza de chie sighit a battallare fintzas cando tottu paret perdidu,poninde a su tzentru sa dignidade de una pessona chi non at mai tzessadu de si decrarare innotzente. A su mattessi tempus,at essere fintzas una manera pro meledare supra cantu siat importante su
tribagliu de sa zustissia e supra cantu siat chidrinu su compidu de atzertare sa veridade.

Cussa de Beniamino Zuncheddu est un’istoria chi andat addia de su casu singulu.Est sa dimustrassione de cantu pottant essere graes sas cusseguentzias de unu errore e de cantu siat diffitzile remediare a su tempus perdidu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22