Su presidente de sa Repùblica, Sergio Mattarella, at comunicadu de àere firmadu su decretu de isorvimentu de sas Càmeras pro andare a eletziones. A pustis de àere retzidu a su presidente de su Cussìgiu, Mario Draghi, chi at rassignadu sas dimissiones a pustis de sa die de fogu a su Senadu, e àere adobiadu a Maria Elisabetta Alberti Casellati e a Roberto Fico de Senadu e Càmera, su Capu de s’Istadu at comunicadu sas detzisione in su merie de su 21 de trìulas. S’esecutivu como at a abarrare in càrriga pro s’achipimentu de sos afares currentes, mentras sa data de sas eletziones est istada fissada a su 25 de cabudanni. S’at a botare petzi cudda die.

“Comente comunicadu – at naradu su presidente Mattarella – apo firmadu su decretu de isorvimentu pro istabilire eletziones noas intro 70 dies comente prevìdidu. S’isorvimentu antitzipadu de su Parlamentu est semper s’ùrtimu atu”. Su Capu de s’Istadu at sighidu: “Sa situatzione polìtica at portadu a custa detzisione. Sa discussione de su votu e sa modalidade ant rèndidu ladinu s’ausèntzia de prospetivas pro una majoria noa. Dae in antis sas Càmeras b’at medas acumprimentos importantes de giùghere a cumprimentu in s’interessu de su Paisu. A custos bisòngios s’acostàgiat s’atuatzione in sos tempos cuncordados de su Pnrr”.

A mangianu a sa Càmera de sos deputados Mario Draghi at annuntziadu s’intentzione sua de artziare a sa Punta e rassignare sas dimissiones in sas manos de su presidente de sa Repùblica, Sergio Mattarella, a distàntzia de una chida dae su primu firmu a s’esecutivu suo e a pustis de unu mèrcuris de fogu cun sa fine de su guvernu, nointames s’aficu de fatzada de Forza Italia, Lega e Movimento 5S.

Su presidente de sa Repùblica podet abèrrere consultatziones pro averguare si b’apat una majoria a sas Càmeras pro unu esecutivu nou o isòrvere su Parlamentu, aviende gasi su Paisu a eletziones

Rimandada sa pigada a su Colle giai in sa serada de mèrcuris 20 de trìulas, a pustis de s’aficu de fatzada otenta in Senadu e sa cunfirma de sa crisi de guvernu, Mario Draghi s’est giutu in su mangianu de su 21, deretu a pustis de su messàgiu suo a sa Càmera, a su Quirinale. Sa presidèntzia de sa Repùblica at difùndidu un’imàgine de su collòchiu intre Mattarella e Draghi. Draghi s’est dimìtidu e pro como su guvernu restat in càrriga pro s’achipimentu de sos afares currentes, difatis s’aficu a garantire sa continuidade amministrativa (comente prevìdidu dae sa Costitutzione pro non lassare su paisu sena unu guvernu), limitende·si a atos dèvidos o apretosos. Su guvernu at istabilidu chi s’at a andare a botare su 25 de cabudanni, nointames ruat una festividade ebràica, pro no andare tropu a in antis cun su votu autunnale. Una cosa inusuale in Itàlia, ue s’èvitant eletziones in atòngiu ca ruent tropu a presu cun sa discussione de sa lege de bilantzu.

Su Rosatellum, sa noa lege eletorale, previdet unu sistema mistu majoritàriu e proportzionale. At a cambiare sa cumpositzione de su Parlamentu: sos sègios intre Senadu e Càmera ant a èssere 600, contra sos 945 atuales.

Su esecutivu nou s’at a aposentare in atòngiu, intre s’agabbu de santugaine e primos santandria in sa mègius de sas ipòtesis, est a nàrrere in prena sessione de bilantzu. Motivu pro cale si sunt semper evitadas sas eletziones in atàngiu, pro evitare s’esertzìtziu provisòriu, sende chi su guvernu depet presentare sa lege de bilantzu a sas Càmeras intro su 15 de santugaine.

“Progetto finanziato con l’Avviso Pubblico IMPRENTAS annualità 2021-2022”

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22