Casteddu arribbat a sa finale pro su prèmiu europeu ‘Capitale birde’ 2024, paris cun sa tzitade ispagnola Valencia. L’at annuntziadu oe sa Cummissione europea. Sos prèmios reconnoschent sos isfortzos de tzitade e bidditzolos pro megiorare s’ambiente e segugiare fainas de trasformatzione ecològica. Sas finalistas pro su tìtulu ‘Folla birde’, dedicadu a sas tzitades prus piticas, sunt imbetzes Elsinore (in Danimarca), Velenje (Islovènia) e Bistrița (Romania).

Su cummissàriu Ue pro s’Ambiente, Virginijus Sinkevičius, at decraradu: “Sas tzitades sunt in su tzentru de sa gherra nostru contra sas crisis de su clima, de s’incuinamentu e de sa biodiversidade”, chi ammustrant “su caminu e ghiant sos isfortzos pro realizare sos cambiamentos sistèmicos e a longu tèrmine rechertos dae su Green Deal europeu”. Sos binchidores ant a èssere annuntziados su 27 santugaine 2022 a sa tzerimònia de premiatzione in sa capitale birde de ocannu, sa frantzesa Grenoble.

Su prèmiu Capitale birde europea est assignadu cun cadèntzia annuale dae sa Cummissione europea a una tzitade europea chi s’est posta e est resèssida a realizare obietivos ambitziosos in sos temas de s’amparu ambientale e de s’isvilupu econòmicu sustenìbile.

Su prèmiu est istadu pensadu in su 2006 durante un’addòbiu de s’Unione europea a Tallinn, in Estònia, dae su tando sìndigu de Tallinn Jüri Ratas e de unu grupu de 15 tzitades europeas, chi ant sigladu paris unu memorandum pro s’istitutzione de su prèmiu.

Podet èssere capitale birde europea una tzitade chi contos a su mancu 100.000 abitantes de un’Istadu membru de s’Unione europea, de un’Istadu candidadu a s’intrada in s’UE, opuru de Norvègia, Isvìtzera, Liechtenstein e Islanda.

Sa tzitade candidada devet dimustrare: Capatzidade de lòmpere obietivos mannos in contu de amparu ambientale; S’impinnat a cròmpere obietivos permanentes e ambitziosos pro megiorare s’ambiente e intzentivare s’isvilupu sustenìbile; Podet èssere modellu pro àteras tzitades chi chèrgiant printzipiare bonas pràticas ambientales.

Sas tzitades candidadas benint valutadas subra de sa base de dòighi indicadores: atenuatzione e adatamentu a sos cambiamentos climàticos, mobilidade urbana sustenìbile, gestione sustenìbile de sa terra, natura e biodiversidade, calidade de s’àera, incuinamentu acùsticu, gestione de sos refudos, gestione de sas abbas, crèschida birde e innovatzione tecnològica sustenìbile, prestatziones energèticas e governos.

“Progetto finanziato con l’Avviso Pubblico IMPRENTAS annualità 2021-2022”

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22