Mèrcuris su 13 de trìulas 2022 de sas oras 20,30 in sa corte de su Museu Deleddiano / Casa nadale de Grazia Deledda, in bia Grazia Deledda a Nùgoro, s’ISRE – Istitutu Superiore Regionale Etnogràficu – at inauguradu su progetu nou de illuminatzione, curadu dae s’architetu Michele Schintu, chi interessat unos cantos ambientes e s’esternu de su Museu Deleddiano cun projetziones luminosas chi cumprendent fintzas unu retratu de s’iscritora Prèmiu Nobel.

Duncas su profilu de Grazia Deledda at a èssere visìbile in su muru esternu de sa domo museu e sa fatzada printzipale at a èssere illuminada in manera permanente, avalorende sa bia printzipale de su bighinadu de Santu Predu, acanta est nàschida s’iscritora nugoresa e logu de ispiratzione de sos romanzos suos.

In su cursu de sa serada s’istitutu etnogràficu at a propònnere unu momentu de istentu cun sos passantes acasagende sas boghes de su “Tenore Popolu Sardu de Oliana” e unu piticu cumbidu.

S’initziativa faghet parte de is medas eventos pro sos 150 annos de sa nàschida de sa Deledda. S’Isre rendet gasi unu donu fintzas visivu a sa grandu narradora. Dae oe, peristantu, cumentzat s’abertura istraordinària de su lunis de sa domo museu comente puru de su museu de su costùmene, ambos duos gestidos dae s’Istitutu etnogràficu, chi est prevìdida finas a su 31 santugaine.

Si tratat de una bela ocasione peri pro festare sos chimbant’annos de ‘Isre. Difatis, pròpiu chimbanta annos a oe, cun sa Lege regionale nùmeru 26 de su 5 trìulas 1972, naschiat in Nùgoro su prus importante istitutu pro s’amparu de sa cultura sarda: s’Isre (acrònimu de Istitutu superiore regionale etnogràficu).

S’Isre fiat istadu istituidu pro voluntade de s’archeòlogu Giovanni Lilliu, pròpiu in ocasione de su tzentenàriu de sa nàschida de s’iscritora Grazia Deledda, pro promòvere s’istùdiu e sa documentatzione de sa vida sotziale e culturale de sa Sardigna in sas manifestatziones traditzionales suas e in sas trasformatziones suas.

A s’Istitutu fiant istados agiuntos su Museu de su Costùmene, chi fiat istadu torradu a numenare “Museu de sa vida e de sas traditziones populares sardas”, e sa domo de nadale Grazia Deledda, acuistada in su 1968, in ue s’Istitutu b’aiat ammaniadu su Museu deleddianu (chi fiat istadu abertu a su pùblicu in su 1983).

 “Progetto finanziato con l’Avviso Pubblico IMPRENTAS annualità 2021-2022”

Sas vias de sa tramuda, a daenantis cun iscavos e balorizzatzione: risurtados novos in sos nuraghes de Tortulè e Triei.

Andant a daenantis cun resurtados importantes sos interventos de iscavu,accontzu e balorizzatzione de sas alas nuragicas intzididas in su disignu “Sas vias de sa tramuda” in Ozzastra. Duos in particulare sos logos interessados dae sos tribaglios: su nuraghe s’Ortali ’e su Monti in s’iscrocca de Tortulè, e su nuraghe Bau Nuraxi de Triei, ambos duos a su tzentru de avantzamentos importantes supra su pianu iscientificu e de su recreu pubbricu de su tempus benidore.

A s’Ortali ‘ e Su Monti, unu de sos sitos  appillados prus nodidos e bisitados de s’Ozzastra, est finida sa fase de iscavu archeologicu. Su cumplessu, chi accansat nuraghe,pobuladu, tzirculu megaliticu, domus de janas e tumbas de tzigantes, sighit a torrare notissias novas mancari sos istudios los fettant dae tempus meda. Sas scruccullas fattas dae pagu ant fattu iscoperrere atteras zuras de interessiu, amprariande sas connoschentzias supra su situ e arricchinde s’esperientzia culturale apparada a sos bisitadores.

S’interventu, fattu sutta s’affilamentu de sas Sovrintendentzias archeologicas, est bistada fatta mescamente po una turre accosta e s’antemurale de su nuraghe. In su mentres de sos tribaglios sunt bistados iscopertos po su prus, picculos de isterzos de attividades in domo, comente su tessinzu e s’ammaniada de sa cosa de pappare. Finida sa fase de iscavu, su disignu bintrat como in d’una fase nova chi prenettat interventos de accontzu, su faghere un’impiantu novu de sa lughe- pensadu fintzas po su sero, e sa creassione de unu caminu novu po bintrare a su monumentu. Si at a faghere puru s’azzorronamentu de su sistema de sas notissias e de sos poster, po rendere prus fatzile sa bisita e mezzorare sa cumpresa de unu situ de cumplessidade manna. Sa summa totale de sos tribaglios, partidos in su mese de aprile 2025 est de casi 200.000 euros.

Novidades importantes arribant puru dae su nuraghe Bau Nuraxi de Triei, inube in su mese de martu passadu sunt bistados cussinnados sos tribaglios de iscavu. Su situ, chi est mannu meda e de importantzia iscientifica, fuit bistadu scudrignadu solu in partzialidade in sos annos Ottanta. S’interventu de oe interessat in manera particulare sa zura chi andat a sa parte de su riu, una zura sinzada dae sa prena de su 2008 chi aiat fattu dannos a una parte de su cumplessu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22