De sas 45 localidades balneàrias premiadas ocannu, a su primu postu b’est Baunei, paris a àteros chimbe cumprensòrios sardos: a su de chimbe postos su litorale de Chia, a su de sete unu sa Gallura costera, a su de 11 sa Baronia de Pasada e Parcu de Tepilora, a su de 14 su Gulfu de Aristanis cun sa Penìsula de su Sinis e s’ìsula de Malubentu, a su 18 postos sos arenile de sa Planàrgia.

In Toscana e Pùglia 3 cumprensòrios cun Chimbe Velas, posca Campània e Sitzìlia cun 2; su Trentinu-Südtirol est pluripremiadu pro su turismu de lagu, ma sos lagos prus premiados sunt cussos de su Vènetu.

Sas localidades a Chimbe Velas, ispiegant sos organizadores, rapresentant sas mègius pràticas amministrativas e dimustrant chi modu nou de fàghere turismu est possìbile, puntende subra de s’ambiente e subra de s’inclusività.

In Toscana sas Chimbe Velas sunt istadas dadas a sos comunos de sos cumprensòrios de sa Maremma, de sa Costa de Argento e de s’Ìsula de su Giglio e  s’Ìsula de Capraia. In Pùglia primas in  sa classìfica figurant sas ìsulas Tremiti, su cumprensòriu de s’Artu Salento Iònicu e su de s’Artu Salento Adriàticu. Chimbe Velas fintzas in Sitzìlia cun sas ìsulas de Pantelleria e de Salina, in Campània cun sos cumprensòrios de su Cilento antigu e de sa Costa del Mito, in Ligùria cun sos Comunos de sas Chimbe Terras. Una bandera a Chimbe Velas fintzas pro sa Basilicata cun sa Costa de Maratea. Vacàntzia a Chimbe Velas fintzas pro sos amantes de su turismu lacustre: premiados sos lagos de Molveno, Fiè e Monticolo in Trentinu-Südtirol, su lagu de s’Acesa in Toscana, su lagu de Avigliana Grande in Piemonte; in Vènetu su lagu de su Mis (a su primu postu) e in Lombardia su cumprensòriu de Comunos de sa riba Otzidentale de su Lagu de Garda.

“S’editzione noa suta sa ghia nostra- at cumentadu Stefano Ciafani, presidente natzionale de Legambiente, presentende a Capri s’initziativa – si basat subra de sa sinergia chi est bènnida a nàschere intre bonas amministratziones locales e cussa parte sana de s’imprenditoria de su mundu balneàriu, capatzu de gestire sas marinas a su mègius, cun prus pagu tzimentu e performance ambientales òtimas. Sas localidades a Chimbe Velas chi premiamus oe rapresentant su megioru de sas bonas pràticas amministrativas e dimustrant chi unu modu nou de fàghere turismu est possìbile”.

 “Progetto finanziato con l’Avviso Pubblico IMPRENTAS annualità 2021-2022”

Sa bela manna torrat in Sardigna, s’isula at accasazzare una tappa prima de s’Americas Cup n°38.

Sa bela manna internatzionale est pronta a torrare in Sardigna. S’isula at accasazzare difattis sa prima gara de ammaniada de sa 38° Americas Cup, abbenimentu chi at a finire cun s’assignadura de su premiu in Napoli in su mese de Triulas 2027. Sa Regione at accraradu s’accordu chi at a permittere a sa Sardigna de bintrare pro sa prima borta in s’istoria de sa cumpetissione de sa bela prus de archida a su mundu.

Mancari sos particulares organissativos non siant bistados ancora deffinidos de su tottu, su logu prus probabbile de sa gara est Casteddu. Sa tzittade printzipale sarda est dae annos sa base de sas operassiones de Luna Rossa e est cussideradu unu de sos campos de gara ideales pro sas cundissiones de su bentu, calidade de sas abbas e logos de appozzu, elementos de fundamentu po accasazzare abbenimentos de custu livellu.

Pro sa Sardigna si trattat de una ghirada ispettata po meda tempus. Sas World Series de s’Americas Cup aiant giai iffrisadu s’isula in su tempus passadu, ma chentza mai esecutare. Una prima tentada est de su 2020, cando s’abbenimentu fuit bistadu iscancelladu pro su Covid. Una secunda occasione fuit prevedida po su mese de Santuaini 2023, cun garas in disignu dae su 12 a su 15 de su mese, ma fintzas in cussu casu tottu est bistadu annuddadu  meda tempus prima, intre condierros e tesones intre sa Regione e sos ordiminzadores neozelandesos, chi aiant battidu a sa
tramuda de sas garas in Jedda, in Arabia Saudita.

Sa delusione fuit pustis accreschida cun s’assignadura de sa 38° Americas Cup a Napoli, unu seperu chi aiat addescadu fintzas una dibatta importante de sa politica. Sa preparassione  chi si depet faghere in Sardigna est ora una ispecie de riscattu po s’isula, chi at a podere accasazzare sas primas garas uffitziales de su ciclu novu de sa cumpetissione e torrare a su tzentru de su giru belicu internatzionale.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22