Est su chi ant iscobertu sos carabineris de Bidda Sorris e de su Nùcleu operativu de sa Cumpangia de Seddori, a s’agabbu de un’iscumbata coordinada dae sa Procura de Casteddu, chi at portadu a sa denùntzia de 18 persones.

Sos denuntziados sunt sete òmines de orìgine marochina, 6 bosnìacos e 5 italianos, residentes, in Bidda Sorris e fintzas in sos Comunos de Casteddu, Cuartu, Dèximu Mannu, Uda e Ìsili.

S’inchiesta de sos carabineris – mutida “Green Villas” – est comintzada un’annu a oe  a pustis de s’individuatzione de medas fogos tòssicos a presu de su polu industriale de s’ex rafineria de tzuùcuru de Bidda Sorris.

 Sos militares de sa Cumpangia de Seddori ant iscobertu chi sos sugetos istràngios diant èssere devènnidos sos puntos riferimentu de sa zona de su Sud Sardigna-Mèdiu Campidanu e de sa periferia nord de Casteddu, pro su recùperu de ferru e ràmene tràmite eliminatzione e s’abrugiamentu de refudos ispetziales, cun sa complitzidade de tzitadinos italianos titulares o dipendentes de ditas operadoras in su setore.

 “Sos istràngios – ant naradu sos investigadores – nisciunu de sos cales iscritu in s’albu de sos gestores ambientales, diant àere ismlatidu plàsticas, cavos eletoras, penumàticos, baterias pro motores, petzos de autoveìculos e meda àteru, betendelos a su fogu e generende fumos tòssicos e agentes incuinantes pro s’ambiente”.

Sos militares ant secuestradu duas àreas de 600 metros cuadrados impreadas dae sos indagados pro amuntonare sos refudos. Secuestrados fintzas 4 furgones impreados pro su trasportu.

Comente naradu, su giru de afares faghiat balangiare medas dinare a sos indagados: “Est istadu documentadu chi sos càrrigos dae ferru, allumìniu e ràmene torrados a bèndere, cun càrrigos de 5 tonnelladas cada chida chi rendiant 5 mìgia èuros s’unu. Duncas a s’annu, segundu sos contos fatos dae sos incuirentes, sa faina illètzita permitiat de balangiare dae sos refudos belle 200 mìgia èuros”. A s’inghesta ant partetzipadu sos carabineris de sa Cumpangia de Seddori, cun s’agiudu aèreu de su 11° NEC de Su Masu, e duas unidades tzinòfilas de s’Arma de Casteddu.

 “Progetto finanziato con l’Avviso Pubblico IMPRENTAS annualità 2021-2022”

Regorta differentziada,Sardigna intre sas primas ma serbit unu passu in prus.

Sa Sardigna si cuffirmat intre sas regiones prus attentas a sa conduida de s’arga. In su 2024 sa regorta differentziada est arrivada a su 76,5% e balet su terzu postu in Italia, in daesegus de Emilia Romagna e Veneto.

S’elementu,presentadu dae Legambiente in su mentres de s’Ecoforum de Casteddu, mustrat una situassione positiva.Intames si registrat una minimada pitticca de sos comunes prus virtudosos e de cussos chi resessint a arrivare a prezenias artas meda de regorta. In d’una parte manna de s’isula sunt oramai diffundidas abitudines bonas in s’isseperu de s’arga, signu chi in sos annos est bistadu fattu unu tribagliu importante dae sas amministratziones e sos tzittadinos. Sa regorta gianna pro gianna e un’attentzione prus manna a sos cumportamentos de donzi die ant dadu unu contribbudu pro mezorare sos risurtados.

A su mattessi tempus addurant ancora trempas de mezoramentu. Carchi tzentru no arribat a sos livellos prevedidos e sighint a faghere prus fatiga,comente Tattari, mancari siant arribande cambiamentos chi diant podere battire menzus resurtados giai in sos annos imbenientes. Intre sas tzittades printzipales si annoditant Aristanis e Nugoro, chi cuffirmant prezenias artas e organizassione bona de su servitziu, divenninde puntu de relata fintzas po sas atteras iscroccas.

Su cuadru chi bessit a pizu est cussu de una regione chi at fattu passos in daenantis importantes, ma chi non si podet permittere de si frimmare. Una parte de s’arga sighit difattis a no essere differentziada e custu pesat siat supra de s’ambiente chi supra sos costos pro sas comunidades. Sa bera porfia como no est solu mantennere sos risurtados segudados, ma los rendere prus pariviles in totta sa Sardigna. Bi sunt iscroccas chi andant bene meda e atteras chi addurant in daesegus: minimare custa differentzias at essere de fundamentu pro mezorare deabberu su sistema.

In giogu non bi est solu una prezenia, ma sa manera cun sa cale si abbidat a su tempus benidore. Mezorare sa derettura de s’arga cheret narrere de minimare su corpu supra de s’ambiente, ma fintzas fraigare comunidades prus scientes e responsabbiles. Est unu caminu chi dimandat continuidade e impignu e seperos craros, pro itte sos resurtados alcansados fintzas a como mustrant chi furriare est possibile, ma solu si si andat a daenantis chena si frimmare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22