Sa bandera arcanueu torrat a isbentulare in cùcuru a su pinnone de sa rotunda manna de su Poetu de Cuartu.

Su sìmbulu de sos deretos Lgbt+ fiat istadu pigadu de mira de sos vàndalos: una passada de serros a sos traos pro betare a terra sa bandera chi est ruta a terra. Su gestu anònimu nd’aiat iscasidadu una meca de polèmicas e de chèscias.

S’assessora a sas Polìticas de Gènere e Diritos Cinzia Carta aiat  cundennadu in deretura su gestu, promitende de fàghere de totu pro torrare a pònnere a su postu suo cussu sìmbulu importante. Ma calicunu l’at antitzipada. Una manu anònima at sistemadu una bandera noa subra de su pennone. E immoe s’arcanueu est torra in cùcuru a sa rotunda, giustu a in antis de s’intrada de arburada Colombo.

“Semus abarrados a beru meda cuntoentos e ispantados cando amus agatadu una  bandera arcane noa pròpiu acanta fiat sa  pretzedente chi fiat istada remòvida – contat s’assessora Carta – Chie est istadu depet ischire chi est istadu unu bellu gestu de solidariedade chi de seguru totu comunidade Lgbtq+ e nois comente amministratzione comunale reconnoschimus e de su cale nde semus a beru cuntentos e bregiosos. Mi diat fàghere a beru praghere connòschere  su “Robin Hood” chi at fatu custa bella atzione in risposta a su chi est capitadu in sas dies coladas. Cuartu bolet èssere una tzitade aberta a su diàlogu e a totu sas formas de amore, e gestos comente acustos nos faghent cumprèndere chi siamus andende in sa giusta diretzione”.

“A s’imbesse, cussu de nd’àere iscravadu sa bandera est istadu unu gestu intentzionale, cummìtidu dae chie diat chèrrere negare su reconnoschimentu de su deretu a sa lìbera espressione de s’istima a una parte de sos tzitadinos de sa comunidade nostra. Un’atu dispretziàbile chi cundennemus in manera firma a nùmene de totu s’amministratzione comunale e de sa comunidade Lgbt +”.

Custu fiat istadu su cummentu de s’assessora a s’Istrutzione, polìticas de gènere e diritos Lgbt de su Comunu de Cuartu, Cinzia Carta, chi ispiegaiat in custu modu sa dinàmica de s’iscoberta: “Eris, colende a su Poetu, un’ativista de s’assòtziu Agedo s’est rèndida contu de sa bandera fiat in terra e l’at regorta, rendende·si deretu contu chi sos acàpios fiant istados segados de pròpositu cun serros. Duncas nde l’at boddida e portada a sa Biblioteca tzentrale de bia de Dante, in ue fìamus riunidos paris cun sos assòtzios pro sos deretos in ocasione de sa presentada de unu libru subra  su tema de su raportu intre babbos e fìgios Lgbt. Semus abarrados totus ispantado. Sa bandera fiat istada esposta inie profòghere òpera de sensibilizatzione subra su respetude totu sos colores de s’afetu umanu”.

Ma immoe, semper una manu anònima, l’at torrada a pònnere acantu fiat. Chiddai cale est su nùmene de custa persona.

 “Progetto finanziato con l’Avviso Pubblico IMPRENTAS annualità 2021-2022”

S’est mortu in Casteddu, in bia de Santa Gilla, a pustis de àere lutadu contra sa maladia, Alberto Pintus, coghineri de s’istòrica tratoria La Balena. A dare sa noa mala de sa morte est istada sa mugere, titulare de su ristorante: “Immoe est est un’ànghelu meravigiosu, e deo soe abarradu sola, sena de issu”, at iscritu in Facebook sa pubidda Cristiana Sedda Pintus. Teniat 61 annos.

In  Casteddu sunt medas sos chi pranghent sa dipartida de unu coghineri bonu e semper alligru, maistru de su pische a arrustu e de medas àteros pratos traditzionales de mare de sa coghina casteddaja e isulana..

A l’ammentare sunt in medas, mescamente in sos canales sotziales, sos chi l’ant connotu, sos clientes, sos amigos de sos movimentos indipendentistas, sende chi Alberto Pintus Cuccuru fiat cumbintu indipendentista e militante. De issu at iscritu peri Franciscu Sedda, professore universitàriu, indipendentista e amigu de su coghineri casteddaju: As a abarrare in su coro nostu e isco chi tue as a èssere presente in ogni cosa chi amus a fàghere pro sa tua e pro Sardigna nostra. T’amus a agatare in ogni risitu, in ogni atzione de libertade, in ogni àrbore de custa terra nostra. E sigomente non potzo e non ti chèrgio nàrrere adiosu, ti naro, comente a semper “A innantis!””.

Pintus fiat malàidu dae unu bellu pagu de tempus e no est resèssidu a bìnchere sa batalla contra sa maladia. Teniat sessantunu annos e de deghènnios gestiat paris cun sa mugere unu de sos pagos locales tìpicos sardos abarrasos in sa periferia de su cabulogu. Fiat connotu meda pro sa militàntzia sua in s’àrea indipendentista e pro sos ideales suos de libertade e de autodeterminatzione de s’ìsula nostra.

Sa noa mala de sa morte sua s’est ispainada a sa lestra in sas retzas sotziales cun messàgios de condulèntzia e de dispraghere.  A lu connòschere in sa santa glòria.

“Progetto finanziato con l’Avviso Pubblico IMPRENTAS annualità 2021-2022”