Sas primas iscutas de bombas subra sa tzitade de Casteddu fiant acontèssidas su 7 freàrgiu, ma non si fiat tratadu de atacos importantes. Cussos diat èssere lòmpidos a pustis de una 10 dies, est a nàrrere su 17 de freàrgiu, pro èssere pretzisos in su borta die. Cussu merie prus de chentu aparitzos alleados si fiant incarados in sos chelos subra su capu-logu sardu e aiant lassadu andare bombas de càlibru mannu chi aiant torradu a prùere sas domos e sos palàtzios, faghende fintzas medas mòrtos e feridos.

Sos dannos prus graes si fiant tentos in sa parte betza de sa tzitade, a fùrriu de sa bia de Sant’Efis. Su bombardamentu fiat duradu belle totu sa die, lassende a terra casi dughentos mortos e unos treghentos feridos.

Unu disisperu. Sa tzitade in pagos faeddos fiat torrada a unu muntone de pedra e de chimentu. In deretura chie aiat pòdidu si nde fiat andadu. Sos isfollados aiant agatadu ospitalidades in sas biddas.

Ma non fiat acabbada in cue. Difatis su  26 de freàrgiu sas fortalesas volantes de sos alleados aiant fatu un’àtera incursione, custa borta corpende is bighinados istòricos de Bonària, Casteddu de Susu e Stampaxi.

Oramai Casteddu fiat una tzitade chi non si connoschiat prus. Sa gente si nde fiat andada, e in caminu non si bidiat mancu ànima. Belle totus aiant detzisu de si che andare, abbandonende domos, traballu e butegas. Sa timoria de mòrrere suta sas bombas fiat manna a beru.

Sa situatzione pro chie fiat abarradu in tzitade non fiat bella meda. Difatis mancaiat totu: cosa de papare, abba, meighinas, currente e bestires. Sos caminos fiant prenos de materiale de sas domos rutas e sos sucursos fadigaiant a lòmpere pro agiudare a chie nde teniat bisòngiu. Ma non fiat finida. Difatis sos alleados aiant fatu un’àteru atacu cun prus de treghentos aeroplanos chi aiant iscutu subra sa tzitade una cosa comente noighentas bombas mitzidiales. Oramai sa tzitade fiat a terra totu. A testimoniare sa distrutzione e su malistare causados dae sos bombardamentos est abarradu unu filmadu publicadu in YouTube dae Augusto Soro chi nos faghet bìere cales fiat sa situatzione.

 “Progetto finanziato con l’Avviso Pubblico IMPRENTAS annualità 2021-2022”

Nora, sa tzittade supra de su mare chi contat sas issidas de sa Sardigna.

Intre sos logos archeologicos prus ammaghiantes de s’isula,sa zura archeologica de Nora est una de sas testimonias prus importantes de s’istoria antiga de sa Sardigna. Posta in sa costa sud-occidentale , in s’iscrocca de Pula, Nora est unu logu inube su tempus passadu ispuntat a pagos passos dae su mare, intre ruinas chi contant seculos de tzivilidade e barattos in su Mediterraneu.

Fundada cun meda probabilidade dae sos Fenicios intre su IX e s’VIII seculu A.C.,Nora est cussiderada una de sas tzittades prus antigas de s’isula. Pustis est divennida unu tzentru punicu importante meda e, prus a tardu,romanu, leande unu rolu istrategicu dae su puntu de bista de sos negossios chi de s’amministrassione. Sa posissione sua,supra de una penisula accarada supra su mare, l’at fatta divennere unu portu naturale e unu puntu de collegamentu de fundamentu intre sa Sardigna e sos atteros caminos de su Mediterraneu.

Passizzande intre sos restos de sa tzittade si podent biere in manera crara sas fases istoricas divressas chi sunt furriadas in su tempus.Intre sos elementos prus de ammaghiu bi est su teatru romanu, una de sas conas de su situ, chi fintzas oe benit impittadu in su mentres de s’istiu pro abbenimentos culturales e ispettaculos. Accanta a su teatru bi sunt sos istabilimentos termales, cun logos dedicados a su relax e sa vida sotziale, e parizzas domos decoradas cun musaigos chi testimonzant su livellu de isviluppu apperricadu dae sa tzittade in su tempus de sos romanos.

Sos caminos sticcados,sos restos de sas cresias e sas istrutturas de su portu contant de una tzittade biva e ordiminzada, inube si intrintzaiant attividades de barattu,religiosas e de donzi die.Interessante meda est su cuartieri punicu, chi custoid sas andalas de sa fase prus antiga de su logu. Unu de sos trattos pius ammaghiantes de Nora est s’appitzicu suo cun su mare. Parte de sa tzittade antiga s’isterriat in sa costa e oe carchi istruttura si agattat sutta de su livellu de s’abba, e si biet solu in carchi occasione.

Custu elementu dat unu contribbudu a faghere divennere su situ unigu, inube archeologia e bista naturale si fundent in d’unu ecchilibriu ammaghiante.Sos iscavos, chi sunt ancora faghinde, sighint a torrare materiales e informatziones novas, arricchinde sa connoschentzia de unu logu chi no at ancora iscoviadu sos segretos suos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22