Intzidente mortale in Irbono, in Ogiastra. Unu betzu de sa bidda, Antonio Lancioni de 88 annos, est mortu a pustis de àere pèrdidu su controllu de su 4X4 cosa sua, unu Hyundai Galloper, chi nch’est rutu in unu ispentumadòrgiu, faghende unos cantos lùmburos finas a lòmpere a su caminu de sa tzircunvallatzione.

Sos sucursos sunt lòmpidos in deretura a su logu acanta est sutzèdidu s’intzidente, dae s’ambulantza de su 118 a s’ispidale de Lanusè, s’òmine est mortu deretu a pustis de s’arribu.

Su fatu est acontèssidu a inghìriu a sas 7, cando s’òminde de Irbono fiat torrende cara a domo dae su podere suo in sartu. Segundu unu prima ricostrutzione de sas fortzas de s’òrdine, su pensionadu, chi fiat colende in unu caminu istrintu meda chi collegat sa tzircunvallatzione a su tzentru abitadu, cun probabilidade est istadu illuinadu dae su sole e diat èssere finidu a foras de de sa carregiada, faghende unu lùmburu de 20 metros.

A su momentu de s’arribbu de su personale mèdicu su betzu fiat galu biu. Est istadu issu etotu a nàrrere a su personale de su 118 chi fiat istadu illuinadu dae su sole. S’òmine connoschiat bene meda cussu caminu, pro ite bi colaiat ogna santa die pro andare a su coile suo a suta de sa bidda, acanta teniat unas cantas berbeghes. In prus s’òmine, mancare s’edade manna, fiat unu bravu ghiadore, sende chi finas a sa pensione aiat fatu su camionista de mezos mannos.

Sa morte de s’òmine at causadu medas polèmicas in sa bidda de s’ògiu. In medas in sos mèdios sotziales ant naradu chi in cussu tretu de caminu bi sunt sutzèdidos peri àteros intzidentes, pro fortuna non graves, e chi diat tocare a lu serrare.

 “Progetto finanziato con l’Avviso Pubblico IMPRENTAS annualità 2021-2022”

Nùgoro, ghia de su limbàzu incluisivu in s’amministratzione pùbbriga

Nùgoro faghet unu passu istòrigu cara a s’inclusione e a sa paridade: sa Provìntzia de Nùgoro est divènnida su primu ènte pùbbrigu de sa Sardigna a adotare in manera formale s’impreu de su limbàzu de zenia incluisivu in sas normas e sos regolamentos internos suos.

Sa detzisione, approada a s’unanimidade dae su Cunsìzzu provintziale subra propòsta de sa cunsizzera Lisetta Bidoni e cun s’accotzu de su presidente Giuseppe Ciccolini, punnat a prettare discriminatziones grammatigas e culturales, donande prus visibilidade e reconnoschimentu non solu a sas fèminas, ma fintzas a sas personas LGBTIQ+ e a sas identidades de zenia non cufformes a su binàrismu de su connottu.

S’approatzione de sas normas e de su regolamentu cun limbàzu incluisivu est solu su primu passu: sa Provìntzia at annuntziadu chi s’intentu imbeniente est a ispainare s’impreu de su limbàzu de zenia a totu sos atos amministrativos e a sas comunicatziones istituzionales uffitziales. S’impreu de unu limbàzu incluisivu no est solu simbòligu: refletit e influentzat sas relatziones sotziales, sos appitzigos de podere e sas bogadas a campu in intro de una comunidade, dande unu contribbudu a minimare eleghias e prevensiones cuadas e a favoressere prus sensibilidade culturale e respetu pare-pare.

Cun custa iniziativa, Nùgoro si ponet commente abberipista in Sardigna e fortzis unu mòdellu de sighire pro àteros comunos e provìntzias italianas chi cherent sighire polìticas de sa limba e comunicativas incluisivas.

Est a bìdere comente s’adossione operativa s’at a tradùere in sos atos amministrativos benidores e in sa comunicatzione de donzi die cun sa tzittadinàntzia, ma sa mustra rapresentat unu sinnu beru de atentzione cara a sa diversidade e identidade istituzionale in una iscrocca in ue temas de zenia, deretos tziviles e incluisione sunt in su tzentru de meda de sas chistiones sotziales de oe.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”