In sa setzione dedicada a sa narrativa, s’iscridora ogiastrina at conchistadu sa giuria de su famadu prèmiu gràtzias a s’ùrtimu romanzu suo a tìtulu “S’Attittadora”, reconnoschimèntu cumpartzidu cun sa famada iscritora Cristina Caboni.

S’Attittadora est unu romanzu nàschidu belle a iscusi. A in antis est istadu bèndidu petzi in lìnia, e solu dae pagu peri in is  librerias e edìcolas de s’Ìsula. Est arribbadu a apassionare medas letoras e letores. Sa protagonista de su libru est Marianna Demurtas, una atitadora.

In su Duamìgia s’est furriadu dae cafè literàriu in  Prèmiu Literàriu: gasi est istadu. Sa prima a s’agiudicare su pretziosu reconnoschimentu coniadu dae Vincenzo Carta (orafo de sa bidda) fiat istadu Dolores Turchi cun su testu “ Maschere, miti e feste della Sardegna”.

Torrende a su libru de Seconda Carta, si tratat de unu contadu màgicu e a bortas misteriosu cun sos diversos pessonàgios chi Marianna. «No est unu romanzu tristu, at naradu Carta,  pro nois sardos e pro pòpulos medas de su Mediterràneu, sa morte serrat su chircu de s’esistèntzia de ogni èssere vivente, e versu de issa b’est in semper in su  imaginàriu, una pesada de respetu e atzetatzione».

Chenàbura su 10 de làmpadas a sas oras 19:00 su romanzu binchidore de sa de 16  editziones de su Cuncursu Literàriu de òsilo, at a èssere presentadu in Cardedu in s’Àula Consiliare de su Comunu, de acordu cun s’Amministratzione Comunale e cun sa Pro Loco. Su Prèmiu Literàriu de Òsile est naschidu belle pro cumbinatzione, in su 1994, gràtzias a una pesada de cunsòrtziu literàriu intre literados de sa bidda, cun s’intentu de torrare a percorrere sas orminas de su passadu o prus in manera simple pro li dare respiru, torrende a propònnere in crae moderna su presente. In sos primos tempos si riuniat in sos varos salotos privados de sos cumponentes e, intre unu cafè e s’àteru, si cunfrontaiat subra de s’ispetzìfica realidade  literària isulana, rugrende·la in sa diacronia de su tempus. A sa fine de ogni riunione Sebastiano Lòriga e tzia Gina Magliona concruiant sa serada cun sos personales cumponimentos issoro.

 “Progetto finanziato con l’Avviso Pubblico IMPRENTAS annualità 2021-2022”

S’est mortu in Casteddu, in bia de Santa Gilla, a pustis de àere lutadu contra sa maladia, Alberto Pintus, coghineri de s’istòrica tratoria La Balena. A dare sa noa mala de sa morte est istada sa mugere, titulare de su ristorante: “Immoe est est un’ànghelu meravigiosu, e deo soe abarradu sola, sena de issu”, at iscritu in Facebook sa pubidda Cristiana Sedda Pintus. Teniat 61 annos.

In  Casteddu sunt medas sos chi pranghent sa dipartida de unu coghineri bonu e semper alligru, maistru de su pische a arrustu e de medas àteros pratos traditzionales de mare de sa coghina casteddaja e isulana..

A l’ammentare sunt in medas, mescamente in sos canales sotziales, sos chi l’ant connotu, sos clientes, sos amigos de sos movimentos indipendentistas, sende chi Alberto Pintus Cuccuru fiat cumbintu indipendentista e militante. De issu at iscritu peri Franciscu Sedda, professore universitàriu, indipendentista e amigu de su coghineri casteddaju: As a abarrare in su coro nostu e isco chi tue as a èssere presente in ogni cosa chi amus a fàghere pro sa tua e pro Sardigna nostra. T’amus a agatare in ogni risitu, in ogni atzione de libertade, in ogni àrbore de custa terra nostra. E sigomente non potzo e non ti chèrgio nàrrere adiosu, ti naro, comente a semper “A innantis!””.

Pintus fiat malàidu dae unu bellu pagu de tempus e no est resèssidu a bìnchere sa batalla contra sa maladia. Teniat sessantunu annos e de deghènnios gestiat paris cun sa mugere unu de sos pagos locales tìpicos sardos abarrasos in sa periferia de su cabulogu. Fiat connotu meda pro sa militàntzia sua in s’àrea indipendentista e pro sos ideales suos de libertade e de autodeterminatzione de s’ìsula nostra.

Sa noa mala de sa morte sua s’est ispainada a sa lestra in sas retzas sotziales cun messàgios de condulèntzia e de dispraghere.  A lu connòschere in sa santa glòria.

“Progetto finanziato con l’Avviso Pubblico IMPRENTAS annualità 2021-2022”