Sa Diretzione Generale de s’Ambiente de sa Cummissione Europea at comunicadu s’atzetatzione de sa candidadura de su Comunu de Casteddu.

Martis su 24 de maju sa Diretzione Generale de s’Ambiente de sa Cummissione Europea at comunicadu s’atzetatzione de sa candidadura de su Comunu de Casteddu a su prèmiu Capitale Birde Europa 2024, in cumpangia de àteras 7 tzitades europeas: Firenze e Prato pro s’Itàlia, Kosice pro s’Islovàchia, Cracòvia pro sa Polònia, Mùrtzia e Valencia pro s’Ispagna, Sòfia pro sa Bulgaria.

Su cuncursu European Green Capital Award, chi si basat subra de sa valutatzione de 12 indicadores ambientales relativos a sas temàticas de sa sostenibilidade urbana, at a andare a premiare sa tzitade chi intre sas candidadas at a resèssere a dimustrare de àere printzipiadu su mègius percursu de transitzione birde e creatzione de un’ambiente prus sanu pro sos tzitadinos pròpios.

Pro Casteddu si tratat de sa de tres partetzipatziones a pustis de cussas de sas editziones 2021 e 2023.

Sy Cummissàriu Europeu pro s’Ambiente, sos Otzèanos e sa Pisca Virginijus Sinkevičius cummentat: «Sas tzitades e sas regiones sunt in sa prima lìnia in s’atuatzione de sas leges e de sas polìticas de su Green Deal europeu. Donat meda cunfortu su de bìdere chi, fintzas in tempos difìtziles, medas tzitades europeas sunt traballende cun sos tzitadinos pròpios pro rèndere s’ambiente urbanu nostru prus netu, prus birde e prus vivìbile. Su percursu de sa transitzione birde no est semper lineare, ma est de seguru su de s’aprendimentu e de sa cooperatzione. Mi congratulo cun sos candidados de sa Capitale Birde Europea e cun sos candidados de su Prèmiu Folla Birde pro sa determinatzione issoro e s’abertura a ammustrare sos isfortzos issoro».

 Su Sìndigu Paolo Truzzu manifestat satisfatzione pro s’atzetatzione de sa candidadura: «Cun su comunicadu de sa Cummissione Europea, Casteddu como est ufitzialmente candidada a su Prèmiu Capitale Birde Europea. De sa letura de sas tzitades cuncurrentes, podimus notare sa crèschida manna de sas candidaduras bènnidas dae su tzentru-sud europeu, regiones chi a in antis sunt istadas pagu fortunadas in sa vitòria finale: custu est su signale de una mudada e creschida sensibilidade dae banda de sas populatziones mediterràneas cara a sas temàticas de sa sostenibilidade urbana, de originària orìgine nord-europea”.

 “Progetto finanziato con l’Avviso Pubblico IMPRENTAS annualità 2021-2022”

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22