In ocasione de sa Die mundiale de sa Biodiversidade, chi si tzèlebrat cras, s’Assòtziu Allevadores de sa Regione Sardigna ammentat chi s’Ìsula est una terra de biodiversidades zootècnicas ca podet bantare su bellu de 12 ratzas autòctonas de sas cales tres bovinas (Sarda, Bruno-Sarda, Sarda-Modicana), duas ovinas (Sarda e Niedda de Àrbus), duos caprinas (Sarda e Sarda primitiva), una suina (Sarda), duas ecuinas (Giara e Sarcidanu) e duas asininas (Sardu e Asinara).

“Un’importante patrimòniu chi netzèssitat de continu amparu ma fintzas valorizatzione de sas produtziones”, ispiegat s’assòtziu sos cales tècnicos assistint sas aziendas chi allevant sas biodiversidades zootècnicas isolanas durante s’acumprimentu de sos controllos funtzionales pro compidare s’istadu de sos allevamentos e de sos animales.

Segundu sos datos de s’Aars, sa cunsistèntzia mèdia in Sardigna de su bovinu ratza Sarda est uguale a 25.993 capos, pro su bovinu ratza Bruno Sardu est uguale a 34.073 capos e pro su bovinu ratza Sardu Modicanu cun 2.253 capos. Pro su chi pertocat sos capos ovinos, sos de ratza Sarda sunt 2.500.000, sos de ratza Niedda de Àrbus 9.316 capos, mentras pro sas cabras de ratza Sarda sunt 13.299 e sas de ratza Sarda primitiva 7.954. Sos porcos de ratza Sarda sunt 390, sos cadditos de sa Giara sunt 542, mentras su Caddu de su Sarcidanu est presente cun 102 capos. In fines sunt 380 sos àinos de s’Asinara e 2.980 sos capos de Àinu Sardu.

Luciano Useli Bacchitta, presidente AARSardegna, ammentat chi “su sistema allevadores at ativadu duas initziativas importante, est a nàrrere su progetu LEO inghitzadu in su 2018 e chi protzedit cara a sa realizatzione de una prataforma digitale pro sa zootecnia italiana chi est ùnica in su gènere suo e isvilupada gràtzias a sa faina de AIA, paris a collaboratziones de prestìgiu comente cussas cun Universidades, Istitutos Zooprofilàticos e àteros Entes de chirca, suta de sa supervisione de su ministeru de sas Polìticas agrìculas, alimentares e forestales, in calidade de Autoridade de gestione.

S’àteru progetu cuntzepidu de su totu pro preservare sa biodiversidade de sos animales nostros de interessu zootècnicu e de s’ambiente acanta bivent – agiunghet – est istadu denumenadu Allevamentu Bardianu”.

 “Progetto finanziato con l’Avviso Pubblico IMPRENTAS annualità 2021-2022”

Su cardinale Anghelu Becciu at bividu cun emossione manna s’elessione de Paba Leone XIV, mancari siat bistadu escluidu dae su conclave.

Presente in pratta Santu Pedru in su momentu de su nuntzu, at contadu de aere proadu una cummossione funguda cando at bidu sa fumada bianca, cosa chi che lu at fattu andare a sa parte de sa Cappella Sistina po onorare su Paba novu.

Becciu at reconnoschidu in Leone XIV, Francis Robert Prevost, un’aera giai connoschida. Sos duos si connoschiant dae tempus meda e in sos annos, sos caminos insoro si fuint arrugados medas bortas, fintzas intro de sa Curia romana. Po su cardinale sardu, s’elessione de Leone XIV est unu sinzale importante, mescamente po su nuntzu de paghe ghettadu dae su Paba novu. In d’unu momentu istoricu sinzadu dae gherras e tesones internatzionales, sas paraulas de su Paba sunt passidas dae su primu momentu de accordu cun sa voluntade chi est bessida a pizu dae sas

Cungregassiones generales, inube medas cardinales aiant espressadu s’esigentzia de unu appellu forte meda po sa fine de sas gherras e po berbare s’arriscu de una gherra de su mundu. Becciu no at mancadu de faghere unu fentomu personale a sa muda giudissiaria sua, evidentziande comente sa sufferentzia chi at bividu siat bistada apparada a Deus, cun su cumbinchimentu chi fintazs sos momentos pius diffitziles potant tennere unu balore ispirituale intro de su caminu de sa Cresia.

Mancari no eppat partetzipadu a su conclave, si est intesu parte ispirituale de su momentu, cumparandesi a unu Mosè chi si interessat, barziande sas manos a su chelu in manera chi s’Ispiritu Santu potat ghiare sas detzisiones de sos cardinales. Po finire, at ghettadu unu nuntzu po incorazare tottu sa comunidade de sos prideros : unu cumbidu a torrare a camminare cun serenidade, fortza e galabera, in sa cumbintzione chi sa fide bera e sa dedissione a sa Cresia potant sighire a allugare sa carrela.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22