Dae promontòrios subra  su mare castiaiant sas marinas e dominaiant sas baddes, a sos pees issoro bi sunt burgos e tzitades costeras. Sos casteddos de sos giuigados fiant istados fraigados intre is sèculos XI e XIV, acasagiaiant distacamentos militares e a bortas fiant fintzas dimoras de nòbiles. Pèrdida sa funtzione difensiva, a bellu a bellu fiant istados abbandonados: medas sunt andados pèrdidos, de àteros abarrant sas murisinas ebbia, ma medas sunt lòmpidos finas a nois belle intatos.

Ogni casteddu tenet sos contos misteriosos suos alimentados dae sa fantasia populare ma chi però tenent peri unu fundu de veridade. Si contant de batallas crudeles, de ‘arcanos’ irrisortos, de amores, presones, ritiros voluntàrios, secuestros, furas, torturas e traitorias. Su mitu chi a s’ispissu los acumonat sunt sas richesas custoidas in càscias cuadas in aposentos chi bi si podet lòmpere colende dae coladòrgios segretos. A agatare s’iscusòrgiu non fiat fàtzile, e pro complicare sas cosas su tesoro fiat semper acostagiadu dae èsseres fantàsticos comente sa musca matzedda, gigantes e àteras criaduras. Ma sos casteddos no allegant de fatos acanta sos protagonistas sunt sos òmines ebbia, ma a s’ispissu peri sas fèminas, chi a bias sunt figuras mìticas comente  sas janas o puru personàgios isctòricos cun una personalidade istraordinària, comente sa giuighissa Lionora de Arbarè, a sa cale sunt ligadas sas sortes de medas fortilesas giudicales.

Ma andamus a fàghere s’elencu de sos printzipales casteddos sardos prus intatos e prus importantes:

Casteddu de Serravalle o de sos Malaspina, Bosa

Pagu est cambiadu dae su sèculu XII, cando fiat istadu fraigadu su casteddu de sos nòbiles Malaspina: s’istrutura est agiumai intata e su burgu mantenet sa bellesa medievale antiga.

Castello de Su Burgu

Su casteddu dòminat  totu su territòriu de su Gotzèanu, ricu de padentes millenàrios, oe òasis naturalìsticas. Contos antigos allegant de Prunisenda, mugere de su giùighe Costantinu, e de Adelasia, ùrtima reina de Torres chi si fiat retirada in esìliu in su casteddu in esìliu.

Casteddu de sa Fava, Pasada

Sos giùighes de Gaddura l’aiant fraigadu pro amparare Pasada dae sos corsaros saratzenos.

Casteddu de Seddori

S’agatat in su Mèdiu Campidanu. Pro su controllu suo arboresos e catalanos aiant gherradu meda, bida sa positzione istratègica sua  e sa terra generosa sua, tando comente a oe.

Casteddu de Marmidda, Is Pratzas

Su nùmene suo derivat dae su mitu, mama Natura asseguraiat nutrimentu a su pòpulu a traessu de sas suas titas suas, est a nàrrere sos montigros durches e fèrtiles de sa Marmidda. Sa bidda immoe tenet pagu prus de 250 ànimas ma tenet cun unu museu digitale innovativu chi gràtzias a su cale si podet connòschere comente si biviat in su Medioevu.

Casteddu de Acquafredda, Silìcua

Inoghe b’aiat aiat bìvidu su conte Ugolino, propietàriu prus famadu de su casteddu. Vanni Gubetta, unu ses agutzinos suos, si pessat siat istadu impresonadu in sa turre de guàrdia, chi aprontat a sa turre manna tzentrale e est narada pro cussu ‘de s’impicu’.

Casteddu de San Michele, Casteddu

Subra de sa punta de Santu Micheli unu tempus b’aiat una crèsia bizantina, posca unu cunventu cristianu. Subra de sas muros suos sos feudatàrios aiant fatu unu casteddu  fortificadu, oe torradu a noa vida comente logu de arte, cultura e natura. Su restàuru at permìtidu de iscobèrrere gallerias e una tzitade suterrànea parallela.

 “Progetto finanziato con l’Avviso Pubblico IMPRENTAS annualità 2021-2022”

Piantagione manna de marijuana in sa zona de Aristanis: noe arrestos e fua impedida dae sos carabineris

Una piantagione manna de cànnabis cun prus de 7 mìgia prantas est istada iscoberta in sas campagnas de Terraba, a canta a Aristanis, cun su bilàntziu de noe arrestos, e intre custos unu minorenne. S’operatzione, fata dae sos carabineris de su Repartu Operativu – Nùcleu Investigativu de Aristanis paris cun su Corpus forestale e de vigilàntzia ambientale de sa Sardigna, est unu de sos secuestros prus de importu de sa zona in sos ùrtimos meses.

S’iscoberta de custa cosa est su frutu de un’atividade atenta de controllu de su territòriu dae sa forestale de s’istatzione de Marrùbiu, chi ant agatadu sa coltivatzione suspeta, sighida dae osservatziones remotas fatas cun drones paris cun sos carabineris. Sos atzertamentos in contu de THC, fatos dae su RIS de Casteddu, ant cunfirmadu chi sas prantas cunteniant livellos de printzìpiu ativu prus artos meda de sos lìmites de lege.  Est sa de chimbe piantagiones secuestrada in zona de Aristanis in sos ùrtimos duos meses.

Su blitz est iscatadu cando sos militares ant agatadu unas cantas persones chi tentaiant de nde tirare sas prantas in su terrinu tra Terraba e Arcidanu. Mancari s’alt de sos carabineris, sos suspetados ant chircadu de si nche fuire. Unu de sos mezos est istadu blocadu luego in ie, mentres a sos àteros duos lis ant postu fatu peri sas istradas de sa zona.

Su primu l’at firmadu sa patùglia Radiomobile, s’àteru l’ant intertzetadu in Àllai, in ue sas patùglias de sos carabineris de Mògoro ant blocadu ses chi si nche fiant fuende, luego los ant percuisidos e leados a caserma. Cando ant controlladu sos mezos ant agatadu ràdios rice-trasmitentes, passa-montagna, atretzos pro ispacare e segare e dinari in contante, totu cosas chi faghent a cumprèndere chi esseret unu
progetu organizadu.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”