Una bera marrania pro s’azienda de Santu Sparau chi conchistat su primu postu in assolutu cun sa medàllia de oro, cun su mele a s’eucaliptus, cunsideradu su mègius monoflor.

Oro fintzas pro cussu de Lione e bator medàllias de prata pro cussu de Arbutzu, Assudda, Ispicu Agreste e Tùvera. Pro sa categoria millifrores s’est piatzada a su de tres postos s’apicoltura Barbagia de Puddu Antonia.

Su Prèmiu internatzionale pro su mele biològicu mègius, a su cale partètzipant aziendas de Grètzia, Itàlia, Romania, Sèrbia, Islovàchia, Islovènia e Ispagna, ocannu at incoronadu sos produtores sardos: subra de unu totale de 92 medàllias, 13 sunt istadas assignadas a meles produidos in s’Ìsula. At conchistadu duos oros, pro Eucaliptus e Lione, fintzas s’azienda de Nicola Cossu.

Su prèmiu organizadu in collaboratzione cun su CREA de su Ministeru de sas Polìticas Agrìculas, ocannu s’est acumpridu a Matera cun una giuria internatzionale de espertos. Terrantiga est s’ùnica organizatzione de produtores de su setore apìsticu de sa Sardigna. At abertu su caminu in Sardigna a s’apicoltura biològica, basende sa faina sua subra de sa pràtica de s’apicoltura nòmade in sas àreas birdes prus rapresentativas de s’Ìsula, dae sas birdes àreas de Foresta Burgos a sas iscollieras de Teulada, colende pro su Montiferru e sa Marmidda.

“Unu grandu reconnoschimentu, chi nos imbitzat a sighire a nos impinnare semper de prus, mescamente pro difùndere sa cultura de su mele – at naradu Francesco Caboni, diretore de Terrantiga – una majore consièntzia dae banda de sos consumadores podet bènnere dae un’alleàntzia istratègica chi cherimus realizare cun su mundu de sa grandu coghina. In su mele b’at biodiversidade, sostenibilidade e territòriu, totu sos ingredientes chi sunt leende semper de prus importu e atentzione dae banda de sa sotziedade nostra”.

 “Progetto finanziato con l’Avviso Pubblico IMPRENTAS annualità 2021-2022”

S’ istòria e su signifficu de sa Bandela de sos Bator Moros

Sa bandela de sos Bator Moros est oe unu de sas  friguras prus reconnoschìbiles e caraterìsticas de sa Sardigna, espressione de una identidade istòrica, culturale e de s’iscrocca abbarbada in su tempus. Sa bandela si distinghet pro unu fundu biancu traessadu dae una rughe ruja e pro sas battor concas de moru cun sa benda, postos in sos bator cuartos, elementos chi nde faghent una frigura ùnica e  reconnoschìbile a sa lestra. Sas bessidas de sa bandera torrant a su Medievu, cando sa Sardigna faghiat parte de sa Corona de Aragona.

Segundu su connottu prus difùndidu, sas bator concas mustrant àteros soberanos musulmanos binchidos in su mentres de sa Batalla de Alcoraz, una binchida chi si narat siat istada possìbile gràtzias a s’interventu de Santu Zorzi. Su sìgnu cumparit pro sa prima borta in documentos uffitziales  de su XIII sèculu e fiat a pustis insertu in istemmàrios medievales, ispainende·si fintzas a foras de sas lacanas de sa penìsula ibèrica. In su cursu de sos sèculos, sa bandela at tentu medas mudaduras siat in su cuntestu gràficu siat in su signifficcu suo. In su mentres de su poderiu ispagnolu e a pustis in s’època de sa Domo de Savoia, sas bator concas ant sighidu a cumparire in monedas, documentos uffitziales e istemmas, cunservande su rolu issoro caraterìsticu de s’identidade isolana.

Sa posissione gràfica est cambiada in su tempus, cun variatziones in sas posissiones de sas concas, in sas espressiones de sas caras e in s’orientamentu de sas bendas, chi in calicuna versione fiant postas in sos ogros, in àteras in sa fronte.

Cun su afirmare·si de una  cussèntzia identitària noa, sa bandela de sos Bator Moros fiat torrada a iscoberrere comente sìgnu de sa Sardigna e de s’ istòria sua, passende su cuntestu aràldicu semplize e pigande unu signifficu prus fungudu ligadu a s’identidade regionale. In su 1952 sa bandela fiat adotada in manera uffitziale comente sìgnu de sa Regione Autònoma de sa Sardigna e a pustis, in su 1999, fiat deffinida sa versione de oe cun sas concas bendadas in sa fronte e bortadas cara a s’asta.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”