Tenet 118 annos, est una mòngia e bivet una domo de cura in su sud de sa Frantza sa persone in bida prus betza de su mundu, segundu su Guinness de sos primados. Nàschida cun su nùmene de Lucile Randon s’11 freàrgiu de su 1904, suor André est fintzas sa prus betza subravìvida a su Covid-19 a su mundu. Una nota de su Guinness de sos primados ispiegat chi su primadu est istadu reconnotu a suor André a pustis de sa morte de sa giaponesa Kane Tanaka, chi est bènnida a mancare a  119 annos.

S’ispagnola e sa pandemia de Covid. Durante sa longa vida sua, suor André s’est ocupada de s’educatzione de sos minores: at traballadu comente  insegnante e istitutora ocupendesi de pipios durante sa Segunda gherra mundiale. A pustis de su cunflitu mundiale, at coladu 28 annos traballende cun òrfanos e sèneghes in un’ispidale de Vichy, semper in Frantza, in sa regione de s’Auvèrnia-Ròdanu-Alpes, prima de devènnere una mòngia catòlica. A pustis de àere passadu sa pandemia de influèntzia ispagnola in su 1918, suor André est resurtada positiva a su coronavirus su 16 de ghennàrgiu de 2021 e at superadu s’infetzione a pustis de tres chidas sena sìntomos o efetos collaterales. S’ùnicu sìntumu chi at tentu est unu pagu de istrachesa. Colada sa maladia at fatu a tempus pro festare su cumpleannu suo: 117 annos.

Una tassa de binu a sa die. “M’ischidant a sas 7 de su mangianu, mi dant s’ismùrgiu, posca mi ponent in s’iscrivania mia acanta m’òcupo de cosas piticas ” narat suor André a sos giornalistas chi li dimandant comente colat sa die sua. Una vida simpre chi però l’at permìtidu de lòmpere a custa edade ispantosa chi immoe l’at permìtidu de intrare in sos Guinness de sos primados. In su registru de sos record b’at peri una nota simpàtica chi narat: ogna tantu s’abbandonat a sos durches e si cuntzedet una tassa de binu totu sas dies. Forsis est custu su segretu pro bìvere meda?

 “Progetto finanziato con l’Avviso Pubblico IMPRENTAS annualità 2021-2022”

Sas vias de sa tramuda, a daenantis cun iscavos e balorizzatzione: risurtados novos in sos nuraghes de Tortulè e Triei.

Andant a daenantis cun resurtados importantes sos interventos de iscavu,accontzu e balorizzatzione de sas alas nuragicas intzididas in su disignu “Sas vias de sa tramuda” in Ozzastra. Duos in particulare sos logos interessados dae sos tribaglios: su nuraghe s’Ortali ’e su Monti in s’iscrocca de Tortulè, e su nuraghe Bau Nuraxi de Triei, ambos duos a su tzentru de avantzamentos importantes supra su pianu iscientificu e de su recreu pubbricu de su tempus benidore.

A s’Ortali ‘ e Su Monti, unu de sos sitos  appillados prus nodidos e bisitados de s’Ozzastra, est finida sa fase de iscavu archeologicu. Su cumplessu, chi accansat nuraghe,pobuladu, tzirculu megaliticu, domus de janas e tumbas de tzigantes, sighit a torrare notissias novas mancari sos istudios los fettant dae tempus meda. Sas scruccullas fattas dae pagu ant fattu iscoperrere atteras zuras de interessiu, amprariande sas connoschentzias supra su situ e arricchinde s’esperientzia culturale apparada a sos bisitadores.

S’interventu, fattu sutta s’affilamentu de sas Sovrintendentzias archeologicas, est bistada fatta mescamente po una turre accosta e s’antemurale de su nuraghe. In su mentres de sos tribaglios sunt bistados iscopertos po su prus, picculos de isterzos de attividades in domo, comente su tessinzu e s’ammaniada de sa cosa de pappare. Finida sa fase de iscavu, su disignu bintrat como in d’una fase nova chi prenettat interventos de accontzu, su faghere un’impiantu novu de sa lughe- pensadu fintzas po su sero, e sa creassione de unu caminu novu po bintrare a su monumentu. Si at a faghere puru s’azzorronamentu de su sistema de sas notissias e de sos poster, po rendere prus fatzile sa bisita e mezzorare sa cumpresa de unu situ de cumplessidade manna. Sa summa totale de sos tribaglios, partidos in su mese de aprile 2025 est de casi 200.000 euros.

Novidades importantes arribant puru dae su nuraghe Bau Nuraxi de Triei, inube in su mese de martu passadu sunt bistados cussinnados sos tribaglios de iscavu. Su situ, chi est mannu meda e de importantzia iscientifica, fuit bistadu scudrignadu solu in partzialidade in sos annos Ottanta. S’interventu de oe interessat in manera particulare sa zura chi andat a sa parte de su riu, una zura sinzada dae sa prena de su 2008 chi aiat fattu dannos a una parte de su cumplessu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22