Sa passigera de sa màchina est istada acumpangiada a su prontu sucursu pro atzertamentos

Unu giòvani de 25 anno est istadu denuntziadu a pee lìberu dae sos carabineris de su Radiomòbile de Carbònia pro ite fiat ghiende imbriagu. Su giòvanu, a inghìriu a sas 23.10 de eris sero in Santu ‘Uanni Sruexu, localidade Porto Carrada, at provocadu un’intzidente mentras fiat sa ghia de sa màchina sua. Perunu àteru veìculu est istadu interessadu ma sa passigera, una pitzoca de 17 annos, est istada trasferida a su prontu sucursu de su Sirai pro atzertamentos.

Su conducente est istadu sutapostu a sa proa de s’etilòmetro, resurtende positivu cun unu tassu alcòlicu uguale a a 1,19 grammos pro litru. Sa màchina est istada posta in firmu provisòriu 30 dies, sa patente est istada ritirada.

In Sardigna sutzedet semper prus s’ispissu chi medas intzidentes istradales siant causados dae s’assuntzione de alcòlicos. A allegare de s’emergèntzia est istada custa istade sa politzia istradale de Terranoa chi in su giru de una chida est intervènnida pro rilevare ùndighi intzidentes istradales de sos cales sete ant bidu interessados automobilistas chi si sunt postos a sa ghia a pustis de àere bufadu  prus de su cunsentidu, in violatzione de s’artìculu 186 de su Còdighe de s’istrada.

Sos agentes de sa politzia istradale, coordinados dae su cumandante Giuseppe Sanna, ant chertu pònnere in evidèntzia pro sensibilitzare sos tzitadinos a una majore atentzione e prudèntzia a amparu de sa salude e de sa seguridade de totus. Pro evitare cunsighèntzias peus. Diversas persones sunt abarradas feridas, fintzas in manera prusaprestu sèria: tràumas, fraturas, atzertamentos e ricòveros in ispidale. In Sardigna, dae su mese de làmpadas, dae cando est istadu dadu su bia lìbera cun s’intrada in zona bianca, b’est istada un’aumentu de intzidentes istradales, creschidos de seguru respetu a s’annu coladu.

 “Progetto finanziato con l’Avviso Pubblico IMPRENTAS annualità 2021-2022”

Dirittos, siguresa e cittadinantzia: in Casteddu cussiderassiones a inghiriu de s’eredidade de Enrico Berlinguer.

In su cuntestu de sa mustra “I luoghi delle parole” de Enrico Berlinguer, chi bi est in Casteddu, unu de sos abbenimentos a chizu at proponnidu una dibatta pubbrica supra sos dirittos de su tribagliu e sa cittadinantzia. Su cunsideru si est bene gurridu partinde dae s’eredidade politica de Berlinguer, chi at semper postu a su tzentru de s’assione sua su reconnoschimentu de sos dirittos de sos tribagliadores omines e feminas, sa dinnidade de s’occubassione e sa tutela de sos dirittos tziviles.

In su mentres de s’addobiu est naschida sa netzessidade de perrigare su fenomenu de s’aostare in sos referendum de s’8 e 9 de lampadas, favoressinde una partetzipassione sciente e demogratica chi no tenzat contu de chie est a favore o contrariu a sas dimandas. Si est faeddadu fintzas de su fenomenu de sos mortos in su tribagliu, chi sunt ancora medas, fenomenu chi incurpat a sa minimada de sos livellos de siguresa po more de sos appaltos e sub-appaltos.

Est bistada de prus evidentziada sa cumplessidade de sas politicas de cittadinantzia: dae una banda, s’escluisione de pessones chi sunt intregadas in manera perfetta in su pannu sotziale e de su tribagliu italianu, a sas cales benit negadu su riconnoschimentu formale; dae s’attera, s’abbusu de assentos comente sas residentzias farsas e su ricursu a ligamenes de famiglia attesu meda po alcansare sa cittadinantzia in manera iscurretta. Un’atteru tema accomettadu est cussu de sa precariedade de su tribagliu chi est creschinde meda, e chi oe corpat fintzas sas proffessiones de cherbeddu, dae una banda po more de sas tennologias novas e de s’intelligentzia artifitziale supra su mercadu de su tribagliu.

Sa mustra dedicada a Enrico Berliguer in Casteddu, in su Bastione, at giai tentu 14.000 presentzias, e si est tribagliande po la tennere abberta fintzas a su duos de lampadas, comente testimonia de s’interessu mannu chi at tentu po sa cittadinantzia.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22