Aici  istraordinària de meritare unu francubullu. Sa funtana de Rosello, su sìmbulu de sa tzitade de Tàtari, fiat istada seberada in su 1975 dae sas Postas italianas comente sa funtana ornamentale prus famada de sa Sardigna.

Est istada realizada in istile tardu-rinascimentale a òpera de maistros genovesos intre su 1603 e su 1606, cun unu tassamentu pùblicu de milli iscudos. In sa forma atuale sua, cun sas dòighi cannadas suas, o càntaros, e cun sas bator istàtuas sìmbulu de is istajones,  rapresentat in manera allegòrica su colare de su tempus: una pitzoca cun ghirlanda de frores (su beranu), un’Èrcule cun corona de pibiones de àghina e sa pedde de ursu (s’atòngiu), un’òmine betzu pasendesi (isu erru), unu fèmina cun ispigas de trigu (s’istade). Tres istàtuas fiant istados distrùidas durante sos movimentos feudales de su 1795 e totus e bator fiant istadas sostituidas a nou in su 1828. S’ùnica originale, de su Seschentos, est arrimada in su Palatzu de Tzitade.

Pesada subra s’antiga funtana de Gurusele, chi in època romana alimentaiat s’acuedutu chi forniat Turris Libisonis, sa Portu Turre de oe, dae semper est unu puntu de riferimentu pro sos biagiadores, impreada dae sas massaja pro sabunare sos pannos  e dae sos abbajolos chi carrigaiant subra sos àinos issoro sos carratzolos finas in tzitade. A sa fine de s’Otighentos si narat chi sos àinos impreados pro su trasportu de s’abba esserent belle treghentos.

Collocada a su tzentru de sa badde de su Rosello, est dominada dae ponte de Rosello, chi est istadu fraigadu durante su bintènniu fascista. Galu oe est, in su gènere suo, unu monumentu ùnicu in totu sa Sardigna.  Su giassu faghet parte de sa rete culturale Thàmus. Comente amus naradu sa funtana faghet parte de sa sèrie  de sos francubullos ‘Funtanas de Itàlia’. Tàtari est una tzitade medievale rica de paritzas prendas artìsticas e architetònica, difatis in su tzentru istòricu suo si podent agatare àteros monumentos religiosos e culturales, comente sa catedrale de Santu Nigola de Bari, cussa de Santa Maria de Betlem e de Santu Apollinare, tziviles, o fintzas sa maestosa pratza de Itàlia, pro no allegare de su museu Sanna.

“Progetu finantziadu cun s’Avisu Pùblicu IMPRENTAS annualidade 2021-2022”

Referendum supra sa zustissia, itte prevedit sa refforma supra sa cale ant a votare sos italianos.

Su 22 e 23 martu sos italianos ant essere giammados a votare pro detzidere si cambiare carchi parte de sa Costituzione in sa parte de su funtzionamentu de sa magistradura.Supra s’ischeda elettorale bi at essere una dimanda meda cumplicada pro itte bi sunt solu sos numeros de sos articulos de sa Costituzione chi ant essere cambiados, chena ispiegare in manera simple cale sunt sas novidades chi si prevedint.

Su referendum no est pro problemas medas chistionados de sa zustissia italiana, comente sos protzessos longos meda o sa mancantzia de pessonale in sos tribbunales. Su votu si cuntzentrat imbetzes supra s’ordiminzassione de sa magistradura e supra sas regulas de su tribagliu de sos magistrados. Sa refforma prevedit tres cambiamentos printzipales e importantes.

Bidimolos. Su primu est s’ispitzigu intre zuighes e pubbricos ministeros. Oe bintrant in sa magistradura cun su mattessi cuncursu e faghent parte de su mattessi assentu. Cun sa refforma sos duos caminos diant essere divididos in manera deffinitiva. Segundu chie agguantat su cambiamentu custa divisione diat faghere divennere su zuighe prus indipendente in su mamentu in su cale devet dezidere si una pessona est innozente o affartada. Chie est contrariu, invetzes, pensat chi su sistema de oe affiantzet giai ecchilibriu e chi ispitzigare de su tottu  sos duos rolos potat creare difficultades novas.

Su segundu puntu est pro su Cunsizzu Superiore de sa Magistradura, s’organu chi si occupat de sas carrieras de sos magistrados. Sa refforma prevedid de lu ispitzigare in duos: unu dedicadu a sos zuighes e unu a sos pubbricos ministeros. Sos partetzipantes diant essere seperados cun d’unu sorteamentu e non prus cun d’una elessione. S’urtimu cambiamentu est pro su sistema chi dezidit pro sas penalidades a sos magistrados. Sa refforma prevedit sa creassione de unu organismu novu chi si diat occupare propriu solu de custos protzedimentos.

Cun su referendum sos tzittadinos ant deppere seperare si mantennere sas regulas de como o faghere custos cambios in su funtzionamentu de sa magistradura italiana. In sas urtimas chidas custas votassiones ant tentu azzesu su cunfruntu politicu e sas animas de sos partidos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22