Giuseppina Nicòli, naschet in Casatisma (Pavia) su 18 de santandria 1863, fiat sa de chimbe de deghe fìgios. Sa sua fiat una famìlia chi istiat bene. A pitzinna sa morte de su frade prus mannu de issa de un’annu, dda corpit meda. Su dolore, l’acùrtziat a su Crocifissu e faghet crèschere in issa su disìgiu de si cunsagrare a Deus. Su babbu ispirituale la faghet apresiare a su Carisma de San Vincenzo de’ Paoli, e issa pedit de intrare a fàghere parte de sas Fìgias de sa Caridade.

Sos superiores la mandant a Sardigna. Arribbat a Casteddu su primu ghennàrgiu de su 1885. At in pessu lòmpidu 21 annos; a su Cunservatòriu de sa Providèntzia l’acollint a bratzos abertos. Si distinghet pro su particulare talentu educativu chi l’agiuat a isvilupare su sentidu missionàriu suo genuinu. Est portada pro  s’insegnamentu e divenit amiga de is pitzinneddos pòveros de su bighinadu Castello. Pro issos otenet de abèrrere un’iscola serale, sa domìniga faghet su catechismu e los faghet intrare in s’assòtziu de is “Luigini”. A 36 annos est numenada suor servente (superiora) in s’Orfanotròfiu de Tàtari. Inoghe, nointames totu sas dificultades, si faghet meda amare e istimare. Cun issa sas iscolas de s’Orfanotròfiu aumentant sas setziones, aberit sas iscolas de catechismu pro pipios, pitzocos, giòvanas serbidoras e un’iscola de religione pro sas istudiantes de sas classes sennoriles. Fundat e dirighet s’Assòtziu de sas Fìgias de Maria, ànimat sas Damas de Caridade, introduit sas Mòngias in càrtzere.

Su nùmene de Suor Nicòli est prus che totus ligadu a “is Piciocus de Crobi”, pitzocheddos meda connotos in Casteddu pro more de sa “sa còrbula” (sa cofa), cun sa cale si balàngiant de tantu bìvere. Suor Nicòli s’acùrtziat custos pitzocos cun sa matessi delicadesa de una bona mama. Los conchistat, los torrat a batijare cun su nùmene de “Marianelli” (monelli de Maria), li simparat a lèghere e a iscrìere, los ghiat a esertzitare una professione, los aprèsiat a sa fide e a sa vida sotziale. S’ùrtimu annu de sa vida sua, su 1924, benit acusada de una cosa chi no aiat fatu e sa no anche acabbat in totus sos giornales de sa tzitade. Issa e sas sorres atzetant “sa proa” cun mudìmene, fintzas a cando su Presidente de s’Amministratzione atetat de àere isballiadu e  reconnòschet s’errore. In su letu de morte suor Giuseppina lu perdonat e issu s’inchinat e basat su lentzolu de suor Nicòli oramai mori mori.

 “Progetto finanziato con l’Avviso Pubblico IMPRENTAS annualità 2021-2022”

Su fenomenu de sos mangones in s’istagnu de Molentargius: un’ispettaculu naturale in su coro de sa tzittade.

S’istagnu de Molentargius, intre Casteddu e Quartu S. Elena, offerret unu de sos ispettaculos prus ammaghiantes de sa Sardigna cun sa presentzia regulare de sos mangones arrubios. Custos puzzones galanos, chi faghent parte de sa zenia Phoenicopterus roseus, sunt attirados dae sas abbas calmas e salamattas de sa zura, chi offerrint cundissiones ideales po los faghere pappare e faghere sos nios. Su Parcu Naturale Regionale de Molentargius-Saline, chi est mannu casi 1.600 ettaros e cumprendet istagnos, abba e salinas istoricas, est bistadu fattu po tutelare custu eco-sistema unigu, reconnoschidu a livellu internatzionale dae su Protocollo de Ramsar.

Sos mangones arribant donz’annu dae zuras divressas de su Mediterraneu, comente Francia,Spagna e nord Africa, e acciappant in Molentargius unu furriadorzu seguru gratzias a sas abbas bassas, riccas de cosa de pappare e paza marina, e a sa trancuillidade de s’ambiente. Dae su 1993, sa zura est divennida fintzas unu logu po faghere sos nios: donzi beranu sas cropas, fraigant nios de fangu, ponent sos ovos e creschent sos puzzoneddos, dande vida a unu fenomenu de biodiversidade ispettaculare.

Su tempus massimu de appellida andat dae martu a triulas, cando sos puzzoneddos naschent cun pinnammene ferulattu e sos mannos si movent tottu imparis, pappande e comunicande intre issos, creande una bera “nue arrubia” chi si biet dae attesu meda. Pro diffendere sas niadas, su Parcu controllat su livellu de s’abba e alindat s’intrada a carchi zura, garantinde gai sa trancuillidade chi serbit a sos puzzones. Fintzas fora de s’istajone sessuale, sos mangones  addurant a s’ispissu in s’istagnu o in sas zuras umidas accanta, comente s’istagnu de Santa Gilla, offerrinde un’ispettaculu unigu con sos bolos elegantes insoro e accumpanzados dae atteras zenias de puzzones de s’abba, intre sos cales mengones,tzurullios, filippas e anadras.

Sa presentzia de sos mangones in Molentargius, ets unu esempru craru de bivere imparis intre natura e tzittade, mustrande comente un’eco-sistema delicadu potat esistire a pagos passos dae su tzentru de sa tzittade. Custu fenomenu naturale no est solu un’occasione po su birdwatching, ma fintzas un’indittu de sa puresa de sas abbas e de sa calidade de s’habitat, cuffirmande s’importantzia de tutelare e balorizzare sas zuras umidas sardas.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22