Mèritu de De Ligt e Vlahovic, chi torrant a sarbare una partida comintzada male pro sos biancunieddos, a càusa de su gol a pustis de su minutu 10  de Joao Pedro. Una partida non bella meda: contra unu Casteddu serradu a palas, sa Juve at bintu cun isfortzu meda. Fintzas gràtzias a sos giogadores prus tècnicos e ispirados: Cuadrado, autore de su primu traversone; Dybala, protagonista de su passàgiu-gol pro Vlahovic. Pro sa Juve una partida de bìnchere in cale si siat modu. Fiat tropu importante. Su Casteddu imbetzes non podiat fàghere de prus e a sa fine s’est arrèndidu.

Pro s’iscuadra de Walter Mazzari est sa de chimbe iscunfita de sighidu: como arriscat de èssere sighida dae su Genoa e duncas sa Sèrie B. Una derrota marigosa, pro ite pro unu pagu su Casteddu si fiat fintzas illùdidu de pòdere conchistare de sos 3 puntos. Lassare semper s’initziativa a sos aversàrios, a sa fine, no est torradu a contu. S’ischema de sa partida est totu in sos primos minutos: sa Juventus cumandat, ma su Casteddu non lli assat ispàtziu lìberu pro sa manovra. Paret fàtzile, ma nonest gasi. Su Casteddu conchistat sa prima botza grae de sa partida e andat a gol: Marin irraighinat s’isfera de sos pees de Dybala a tzentrucampu e bolat a dereta, sa Juventus perdet sos puntos de riferimentu, Arthur non serrat subra Joao Pedro chi piatzat unu deretu còmodu còmodu.  A su 23′ sa Juventus paret àere giai risòlvidu su problema cun su primu gol in A de Luca Pellegrini.

Est unu diagonale chi s’istichit in s’àngulu, ma sa traietoria est deviada. Su Var iscoberit chi su tocu detzisivu est su de su cuidale de Rabiot. Totu de torrare a fàghere. Sa punitzione de Dybala finit foras de pagu. Semper Dybala paret s’elementu cun prus initziativa, ma a bias li mancat sa letura giusta de s’isvilupu de s’atzione. E pro Vlahovic botzas netas non nche nd’at, mancu pro fàghere artziare s’iscuadra. Tando sa Juventus nche proat, torrende a mòvere dae su bassu cun Arthur, ma s’atzione est semper difìtzile. Proat e torrat a proare, però, su gol arribbat. Sa mossa giusta est de Cuadrado, ispostadu in sa fàscia de manca. Prima unu tiru de su colombianu custringhet Cragno a s’àngulu. Posca, semper Cuadrado s’imbentat dribbling e assist pro De Ligt chi, lassadu petzi in àrea, marcat de conca. In su segundu tempus si torrat a mòvere cun una Juve prus cumbinta chi, in su de tres minutos, s’illudet duas bias. Prima cun Chiellini (gol annulladu pro foragiogu) e posca cun un’ocasione de oro pro Dybala. Como sa Juventus paret prus detzìdida e su Casteddu prus pagu cumbinta respetu a sa prima fratzione de giogu. Resurtadu? Si giogat petzi in sa metade campu rujublu. Allegri ponet Bernardeschi a su postu de Rabiot. A sa fine sa botza intrat. Vlahovic marcat su gol chi serrat sa partida.

 “Progetto finanziato con l’Avviso Pubblico IMPRENTAS annualità 2021-2022”

Adiosu a sos timbros in sos passaportos: arribat su sistema digitale nou in sos aeroportos de s’Unione Europea

Dae domìniga càmbiat su modu de biagiare in sos cunfines de s’Unione Europea: adiosu a sos timbros in sos passaportos, pro lassare logu a sa registratzione eletrònica. In fatis est intradu in funtzione su sistema informàticu europeu de intrada/bessida chi at a leare su postu a bellu – a bellu de su controllu a manu de sos documentos pro sos tzitadinos extra-UE chi passant sos cunfines de s’àrea Schengen.

Su sistema, operativu a su comintzu in modalidade graduale, cunsentet de registrare digitalmente intradas e bessidas cun sa rilevatzione automàtica de sos datos biomètricos — imprentas digitales e immàgines de sa cara — de chie intrat o bessit dae s’Unione. Sa punna est de fàghere sos controllos prus in presse, redùere sas filas e afortigare sa seguresa in sas fronteras, assegurende una traciabilidade lestra de sos movimentos.

Ogni borta chi unu biagiadore at a passare unu cunfine esternu Schengen, su sistema at a registrare die, ora, puntu de intrada e durada autorizada de sa permanèntzia, faghende a manera chi non b’apat bisòngiu de su timbru in su passaportu. In custa manera at a èssere prus fàtzile a iscobèrrere si b’at istadu carchi permanèntzia ultres sos lìmites cunsentidos e megiorare sa gestione de sos flussos migratòrios.

S’ativatzione s’at a fàghere a bellu – a bellu in totu sos Paisos de s’àrea Schengen e at a interessare aeroportos, portos e passàgios in terra. S’operatividade cumpleta est previdida in intro de su 2026, cando su sistema at a èssere integradu cun s’autorizatzione eletrònica de biàgiu noa domandada a sos tzitadinos de àteros Paisos chi non tenent bisòngiu de visto. Sas autoridades europeas narant chi su passàgiu a su digitale rapresentat unu passu de importu a cara a una frontera comune prus moderna e chi funtzionat mègius, ma avertent puru sos biagiadores chi bi podet àere carchi rallentamentu a su comintzu in sa fase de rodàgiu.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”