A pustis de sos tìtulos olìmpicos in sos 100 e in sa 4×100, s’asulu faghet cumprèndere chie est su chi cumandat fintzas in sos Mundiales Indoor: su favoridu Christian Coleman adobbadu a s’arribbu s’àteru istadunidensu Marvin Bracy istesiadu de 3 tzentèsimos. “Ischia de dèvere andare prus lestru. Su chi apo fatu a sas Olimpìades non fiat unu casu, est frutu de impinnu in su traballu in custos annos”, at naradu a pustis de s’oro de Belgradu

Como perunu at a pòdere prus nàrrere de no lu connòschere. Nisciunu s’at a pòdere dimandare “chie est custu?”. Ca Marcell Jacobs imponet sa lege sua fintzas a sos Mundiales indoor, fintzas in sos 60 metros. Campione de su mundu e europeu prus lestru de s’istòria in sa distàntzia, otenta in  6″41. Marcell Lamont Jacobs de Desenzano in su Garda ischit petzi bìnchere. Sa maja de sa lestresa asula sighit, semper gràtzias a issu. A pustis de sos tìtulos olìmpicos in sos 100 e in sa 4×100, s’asulu ponet totus in riga fintzas subra de sa pista de Belgradu: su favoridu Christian Coleman est istadu bìnchidu a su traguardu, e s’àteru istadunidensu Marvin Bracy istacadu de 3 tzentèsimos.

“So cuntentu e orgolliosu, ischia de dèvere andare prus lestru cando contaiat”, at cummentadu su campione de totu a sos micròfonos de Rai Sport. Posca at torradu s’iscrtìscia pro calicuna crìtica mala: “Su chi apo fatu a sas Olimpìades non fiat pro debadas, est frutu de s’impinnu in su traballu in custos annos. Como ispero de pòdere cùrrere ancora in sos 100 metros in s’istajone a s’abertu”, at agiuntu. Dae s’àtera ala de s’Otzèanu e in Bretagna Manna si dimandaiant chie èsseret sa fritza asula essida in sa pista de Tòkyo, ma Jacobs non si curaiat de issos, e at fatu bene.

 “Progetto finanziato con l’Avviso Pubblico IMPRENTAS annualità 2021-2022”

Un’organissasione criminale abbarbada in su mesudie de sa Sardigna, ma cun coffuzones internatzionales fortes in Belgio e Paesi Bassi, est bistada iscupulada in d’una operassione padria dae parte de sas fortzas de s’ordine chi ant arrestadu tres pessonas e at secuestradu benes po pius de tres miliones de euros. Secundu cantu ant nadu sos de sa politzia, sa truma fit responsabbile de aere battidu in Sardigna una cantidade manna de cocaina, po unu totale de 77 chilos.

Sa droga beniat carrada cuada supra de camions mannos chi partiant dae su nord Europa, passande divressas frunteras fintzas a arribare in s’isula.

Una borta arribada a destinu, sa cocaina beniat bendida in su mercadu locale, cun d’unu balore tantadu intre tres e ses miliones de euros. S’iscrucculla at permittidu de assebertare un’organissasione de otto pessonas, tres de sas cales abbisadas comente fundadores de s’attividade illetzida, mentres atteras chimbe diant aere tentu rolos de azzudu de s’organissasione. Sa truma, mancari esseret discreta meda, fuit istrutturada bene e teniat fintzas cabbales accolomicas de signifficu.

Sas iscruccullas ant difattis battidu a su secuestru de pius de 90 parados, intre domos e terrinos postos a su pius in su mesudie de s’isula, paris a paritzos camions e disponibilidades de dinari. Una parte de su patrimoniu, chi si pensat siat de sas pessonas sutta de iscrucculla, est bistada agattada fintzas in sos Paesi Bassi. In su mentres de sas attividades de iscrucculla sunt bistados secuestrados puru vinti chilos de cocaina sinchera meda, mentres tres curreos incarrigados de che leare sa cocaina sunt bistados arrestados.

S’organissasione impittaiat maneras diligadas, impittande macchinas modificadas po cuare sa droga e chircande de faghere faddire sos controllos po mesu de caminos istudiados in tottu sos particulares.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22