“Sa presèntzia de sa Sardigna in sas fieras internatzionales prus importantes e frecuentadas de su mundu fortificat su messàgiu chi, mescamente in custa fase de s’apretu sanitàriu, cherimus signire a fàghere promotzione: s’Ìsula est pronta a abèrrere su mercadu turìsticu suo”. L’at naradu s’assessore regionale de su Turismu, Gianni Chessa, durante s’addòbiu cun s’istampa frantzesa in su ”Spazio Sardegna” in  su “Salon mondial du Tourisme” de Parigi, chi fiat in programa finas a domìniga su 20 de martzu.

A su Salone pariginu fiant presentes oto operadores sardos, acasagiados in sos 156 mq de su salone, in rapresentàntzia de hotel, assòtzios, operadores turìsticos e servìtzios turìsticos. Ultres a sa Sardigna, petzi àteras duas regiones italianas ant tentu un’ispàtziu riservadu: Emilia Romagna e Toscana. A caraterizare s”Ispàtziu Sardigna’ fintzas sa projetzione de unos cantos vìdeos cun imàgines de sa Sardigna, ultres a unas cantas esibitziones musicales cun s’organitu diatònicu e sas launeddas.

“Pro sa Sardigna, su mercadu frantzesu est su tertzu in òrdine de importu cun 1,5 milliones de presèntzias e dae sos tres aeroportos isolanos movent 90 bolos de cada chida chi collegant s’ìsula a trèighi localidades frantzesas – at evidentziadu s’assessore Chessa – A pustis de unos cantos annos semus torrados a sa fiera de Parigi ca cherìamus afortiare su flussu turìsticu dae sa Frantza, puntende subra  unos cantos filones apretziados meda, comente su turismu esperientziale, cussu enogastronòmicu e sos caminos religiosos. Puntos de fortza de s’oferta nostra, chi nos podent fàghere cunsighire s’obietivu de s’afortigamentu de unos cantos tretos de mercadu”.

A pustis de Parigi, in s’àmbitu de sa campagna programada dae sa Regione, sa Sardigna in sas imbenientes chidas at a partetzipare a sa fiera Imtm de Tel Avìv e a sa Bit de Milanu, mentras in s’agabbu de maju at a èssere presente a s’Imex de Francoforte dedicada a su Mice (meeting, intzentivos, cunferèntzias, fieras).

“Progetto finanziato con l’Avviso Pubblico IMPRENTAS annualità 2021-2022”

Sa torrada de s’ora legale intre vantazos praticos e discumbenios pitticcos a s’incumintzu.

Cun s’arrivu de su beranu torrat fintzas una de sas mudas prus nodidas de s’annu. In sa notte intre sapadu 28 e dominica 29 martu sas lantzittas de sos relozos ant devere essere movidas a daenantis de un’ora. Custu determinat una notte prus curza e duncas un’ora de sonnu in mancus, mancari pro chie impittat telefoneddos e computer su coladorzu at essere in automaticu chenza deppere intervennere.

S’ora legale bi est in Italia dae su 1966. Est bistada fatta po irfruttare menzus sa lughe de su sole in sos meses de beranu e istiu, cando sas dies si allonghiant. Poninde a daenantis s’orariu si tenet prus lughe in sas oras de su sero, minimande gai sa netzessidade de impittare sa lughe artifitziale. Custa cosa battit beneffissios importantes.

Su primu est pro su risparmiu de energia, pro itte si azzendent prus pagu sas lughes in sas domos e sas tzittades, minimande gai sa netzessidade. Ma no est s’unica cosa positiva. Sas dies parent prus longas e custu cambiat fintzas sos imbitzos de sas pessonas. Si tenet prus tempus po istare in fora, po faghere attividade fisica oppuru pro si abbambiai pustis de su tribagliu o s’iscola. Fintzas sa vida sotziale nde tenet unu vantazu.

Non bisonzat peroe de s’ismentigare sas cosa prus pagu positivas. Sa muda de s’orariu podet creare carchi difficultade in sas primas dies. Carchi pessona s’intendet prus istracca,faghet fadiga a s’indischidare su manzanu o tenet problemas a si drommire su sero. Podent apparessire fintzas alteriosidade e difficultade a si cuncentrare. Sas pessonas prus sensibiles sunt a s’ispissu sos pitzinnos, sas pessones giai istraccas e chie tenet problemas de sonnu.

Pro issos, s’abesare dimandat carchi die in prus. Mancari custos problemas a s’incumintzu, s’ora legale sighit a essere impittada pro itte sos benefissios totales sunt cussiderados prus mannos. Pustis de pagas dies su numeru prus mannu de pessones si abbituat a s’orariu novu e torrat a incumintzare sas attividades chena problemas particulares.

Pro congruire, su coladorzu a s’ora legale est unu cambiu pitticcu chi dimandat unu tempus curtzu pro si adattare, ma chi apparat acchittos beros in sa vida de donzi die. Seros prus longos,impittu prus mannu de sa lughe naturale e sas opportunidades de bistare in fora faghent de custu tempus unu de sos prus appretziados de s’annu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22