Custu mangianu sa Guàrdia Costera de Casteddu est istada impinnada in un’operatzione de sucursu e evacuatzione mèdica de unu passigeri chi s’est intesu male in sa nave de crusiera in navigatzione a largu de Casteddu, cun s’impreu de un’elicòteru SAR de sa 4^ Setzione elicòteros Guàrdia Costera de Dèximu Mannu.

S’operatzione at tentu cumintzu a sas primas lughes de s’arbèschida, cando sa sala operativa de sa Guàrdia Costera at retzidu seju a banda de sa Nave de crusiera MSC “FANTASIA”, bènnida de Nàpule e dirìgida a Palma de Maiorca, in navigatzione a unos 70 mìllios nàuticos de sa costa, pro unu passigeri frantzesu de annos 79 collidu dae infartu e bisongiosu de apretosu assistu mèdica.

Assùmidu su coordinamentu de sas operatziones, sa sala operativa de sa Guàrdia Costera at postu sa nave in cuntatu cun su C.I.R.M. (Tzentru Internatzionale Ràdiu Mèigu) e su Servìtziu 118 pro totu sas valutatziones mèdicas netzessàrias, inditende a sa nave fàghere una manovra de apresiamentu a sa costa. A pustis su C.I.R.M. at cunfirmadu sa netzessidade de evacuare su passigeri corpidu de infartu cun s’interventu aèreu pro su trasportu lestru in ispidale.

Bida s’emergèntzia, sa sala operativa at fatu pesare in bolu un’elicòteru de sa 4^ Setzione Guàrdia Costera de Dèximu Mannu, aeroplanu ispetzializadu in atividades de chirca e sucursu in mare, frunidu de aparitzos sofisticados chi permitint s’apontàgiu o su recùperu in verticale de sas unidades navales, mentras in s’ora sa MSC “FANTASIA” s’est apresiada cantu prus possìbile a sa  costa.

S’elicòteru de sa Guàrdia Costera at atzapadu sa nave a 35 mìllios dae sa costa, e una borta lòmpidu subra de sa verticale sua, at protzedidu a su recùperu e a s’evacuatzione mèdica de su passigeri. Posca s’est diretu  cara a su s’ispidale Brotzu pro afidare s’òmine a sas curas de su personale mèdicu. Sa nave de crusiera imbetzes at torradu a pigare sa navigatzione cara a su portu de destinatzione.

“Progetto finanziato con l’Avviso Pubblico IMPRENTAS annualità 2021-2022”

Si est custituida in su notaju sa Delegassione po Poderare sa naschida de sa IGP porcheddu de Sardigna, e si est assemidada in manera uffitziale sa Delegassione Iscentifica, chi in sa prima assortida, fatta in Macumere, in s’agentzia de Contas, su 15 de Abrile, at tribagliadu po approntare, medas puntos de su regolamentu de produssione de custa saporitesa totta sarda.

S’intentu, preparare sos documentos chi serbint de presentare a sa Commissione Europea po alcansare su riconnoschimentu de s’arrennomini IGP e faghere naschere una delegassione chi tenzat commente faina printzipale cussa de creare un’unione de sos pastores, masellajos e sos trasformadores de s’eccellentzia sarda, chi potant ordiminzare una filera e dare unu fentomu balidu a su mercadu, po tottu cussu chi appartennet sas fases de pesadura e de trassa de sos porcheddos chi teppent andare a su mercadu.

A sa mattessi manera,bardare sa produsssione locale sarda dae su periculu de battire importassiones chentza controllu perunu, e duncas tutelare s’issida de su prodottu. Unu arminzu balidu puru po sos consumadores, chi ant podere tennere unu trattadore chi potat garantire supra su rispettu de unu regolamentu de produssione. Fases importantes meda, cussas de sa naschida de sas duas delegassiones.

Importante meda at essere sa retza de sos sardos in Italia e in su mundu: su motivu de sa presentzia in sa delegassione de Bustianinu Mossa, presidente de sa Fasi, sa retza de sos corriglios sardos in Italia.”Sos emigrados” si dant itte faghere in cust’intentu commente consumadores,sustenidores,ambasciadores, narat Mossa. Semus 2,5 miliones sos sardos fora de sa Sardigna, ispartinados in tottu su mundu.

Solu in Italia sa Fasi contat casi 30.000 iscrittos, in 68 delegassiones presentes in 12 regiones de s’Italia. Sa pius a mesudie est Ciampino. Su tzentru e su norti de s’Italia sunt su puntu de arribu menzus de operajos, pastores,sordados e istudiantes ligados in manera chi non si podet isligare dae sa cultura sarda chi prima de tottu est sa cosa de mandigare. Esist commente una venerassione de su porcheddu. E difattis partizas sunt sas initziativas chi tenent commente base custu prodottu pittitteri.

Tenimos po custu un’istruttura de negossiu de produttos de calidade funguda, a sa cale si diritzant sos sardos emigrados.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22