“Los amus fotografados gasi ca sas istòrias issoro sunt comente una pàgina bianca, prena de tatuàgios e de bisos, de gioventude, una cosa gasi forte de nos fàghere trèmere a totus” iscriet su diretore Simone Marchetti. “Su Paisu beru tenet bisòngiu de custu. De bisiones. De bisos. De libertade”.

“Iscrìere mùsica – contat Blanco in s’intervista – m’at cambiadu sa vida. Creo chi ognunu tèngiat calicuna cosa de iscumìtere: bisòngiat a non tìmere e a nche proare, ite ca siat “.

Su giòvanu artista pro amore de sa mùsica at rinuntziadu a medas cosas: de su fùbbalu (“Fia difensore tzentrale, mi mutiant ‘fabbro'”) a sos istùdios (“lassare s’iscola est una cosa chi iscussìgio a totus: tènnere un’istrutzione serbit a beru”).

Cun Brividi “est colada siat sa cantzone, siat su messàgiu – narat Mahmood -. Mi paret chi fintzas sas persones chi ant apretziadu su cantu bivant comente sos sentimentos a mie, in cumpleta libertade. Su paisu Nostru non tenet bisòngiu de sutalineaduras. O mègius: in manera polìtica su bisòngiu b’est semper. S’omofobia est presente in sa sotziedade nostra e ispero chi sos printzìpios de su ddl Zan devèngiant realidade cantu prima possìbile. Mi so semper espostu in defensa de sos deretos, contra sas discriminatziones de gènere”.

Sa prima pàgina de sa rivista est de su fotògrafu casteddaju  Luigi Murenu, connotu fintzas pro èssere su parruchieri de sos vip.

Totu est cumintzadu cando aiat segadu sos pilos a Madonna pro un’aparitzione a Top of the Pops. A pustis divènnit diretore artìsticu de Kérastase e traballat pro Gucci, Yves Saint Laurent, Victor & Rolf, Giorgio Armani, Chloe, Givenchy, Prada, Helmut Lang, Cavalli, Gianfranco Ferré. In su mentres s’apassionat de fotografia e collàborat cun artistas importantes comente a Richard Avendon. Immoe tenet 50 collaboradores in totu su mundu, ma no ismèntigat sas raighinas suas: «In Casteddu tèngio semper sos amigos meos e so orgulliosu meda de sa terra mia » aiat naradu in un’intervista.

 “Progetto finanziato con l’Avviso Pubblico IMPRENTAS annualità 2021-2022”

Ispidale de Santu Bainzu firmu a su palu:ritardos chi iscobiant unu sistema chentza disignu.

S’abertura de s’ispedale nou de Santu Bainzu Monreale patit unu rinviu novu e, segundu sas istimas prus reghentes, s’ispidale no at a èssere operativu a innantis de su 2027. Una data ancora a tesu, mescamente si  si cunsiderat chi s’istùdiu de possibilidade est de sa segunda metade de sos annos Duamìzza e chi su cantieri, cumintzadu in su 2022, est bistadu prenu de abbaccamentos, firmadas e torradas a cumintzare chi ant fattu su percursu isvariadu meda.

Su ritardu de su cantieri ponet in lughe una difficultade prus manna: sa Sardigna bivet dae annos sa mancàntzia de una progetatzione sanidària firma e coerente. S’Ìsula non tenet unu pranu azzorronadu e abberu orientadu a sos bisònzos de sas comunidades, pro itte s’ùrtimu Pianu sanidàriu regionale est de su 2007. In su mentres, si sunt sighidas refformas e cuntra refformas, acuntzentramentos e cummissariamentos chi non ant resòrvidu sos problemas istruturales de s’assentu sanidàriu regionale.

A cumplicare de prus  su cuadru est sa crèschida de su campu privadu, in manera particulare si biet in sos tzentros prus populados, in ue ant pigadu forma poliambolatòrios modernos e istruturas chirùrgicas novas capatzes de apparare servìtzios lestros. In parallelu, sa salude pùbrica fadigat semper prus a garantire sas prestassiones netzessàrias, cun su perìgulu beru de allargare sa distantzia intre chie podet atzèdere a curas deretas agguantande costos privados e chie imbetzes est costrintu a si cunfrontare cun listas de isettu, tempos longos e mancàntzias organizativas.

In su Campidanu Mesanu, logu chi isettat unu ispidale novu dae belle vinti annos, custa dèbilesa est evidente meda: sa meighina de s’iscrocca s’est afortigada a pagu a pagu, medas bàrdias mèigas ant serradu o minimadu sos òrarios, sos mèigos de base non bastant e sos servìtzios netzessàrios benint dados cun difficultade. Comunidades intreas s’agatant a bìvere gai in d’una cunditzione de emergèntzia donzi die.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”