Est sa segunda bia in s’istòria de sas tzelebratziones de su màrtire gherradores chi su ruolu de rapresentàntzia de su Comunu benit afidadu a una fèmina. Fiat tocadu tres annos a oe a Raffaella Lostia, dirigente de su Comunu, seberada dae su sìndigu de tando Massimo Zedda. Lantini, mèdicu, est sa responsàbile de su Prontu sucursu de su Sirai de Carbònia.

S’Alter Nos est sa figura chi incarnat su ligàmene tra religiosidade e munitzipalidade. A sos tempos de sa monarchia (ispagnola prima, sabàuda posca) fiat su Vicerè, “s’Àteru Nois”, chi, in rapresentàntzia de su re, isfilaiat pro sa festa de Sant’Efes. Oe, imbetzes, est unu membru de s’Amministratzione Comunale.

Ma s’Alter Nos tenet fintzas àteros còmpitos in prus de cussu de rapresentàntzia. Paris cun sos cunfraras de s’Artzicunfraria de su Gonfalone est cussu chi agiuat sos pòberos votados a su Santu. In tempos prus remotos s’Alter Nos daiat unu pachete a sos bisongiosos, ma cun s’arribu de sa televisione, pro evitare de pònnere a sa brallina chie sufrit situatziones difìtziles, sos cunfraras faghent sas òperas de bene una die diversa de su 2 de Maju, a tesu de sas telecàmeras.

Su sèberu de s’Alter Nos est in discretzione de su Sìndigu chi li cunfirmat la nùmenat in Aprile. De sa nòmina in posca si dèdicat a sas letziones de ecuitatzione, a su sèberu de sos atzessòrios pro su frac chi benit cosidu subra de medida e mescamente comintzat a pigare parte a sas manifestatziones de s’Artzicunfraria, calende•si in su ruolu chi li tocat.

Su primu Maju sos matzieris, acumpangiadores ufitziales de sas prus artas càrrigas tzitadinas, andant a pigare s’Alter Nos in domo e lu portant in Munitzìpiu acanta su Sìndigu. Inoghe si faghet s’investidura ufitziale in cara a sa Guardiania, formada dae sos rapresentantes de sas diversas classes sotziales casteddajas, e a totu sas personalidades tziviles e militares a fàscia tricolore italiana. Su Sìndigu decorat s’Alter Nos cun su “Toson de oro”. Custa prenda est su sìmbulu de sa devotzione de sos casteddajos a sa monarchia ispagnola, chi aiat preferidu Casteddu a Tàtari. Subra de su Toson de oro sunt pintadas sas turres e sa rughe sabàuda. Decoradu cun custa prenda s’Alter Nos s’aviat cara a sa crèsia de Sant’Efes in ue a sas ùndighi si faghet sa midda in onore suo. Durante sa missa,cantada in latinu, benit cunsagradu in manera religiosa.

Su rapresentante de sa munitzipalidade sighit a Sant’Efes peri in sas tapas tzitadinas finas a sa torrada su 4 de maju in sa cresiedda de Sant’Efes.

 “Progetto finanziato con l’Avviso Pubblico IMPRENTAS annualità 2021-2022”

S’arte de su tessinzu in Sardigna: filos de istoria, identidade e bellesa chentza tempus.

Sa tessidura in Sardigna est un’arte millenaria, abbarbada in fundaria in s’istoria e in sa vida de donzi die de s’isula. Unu sapere antigu, passadu dae mama a fiza, chi in sos seculos at revertidu materiales simples comente lana,linu e cotone in manivattos unicos,fattos po mesu de telarzos a manu orizontales o ritzos.

Intre sas eccellentzias regionales prus de signifficu bi sunt sos tappettos sardos, nodidos po sa calidade de sos tribaglios e sa ricchesa de sas decoraduras. Meda isparta est sa tennica de su pibiones, giammada gai pro itte ammentat sos pupujones de s’aghina. Custu tribagliu, chi creat disignos tridimensionales supra sos pannos, est una de sas prus cumplessas e ammaghiantes e acciappat s’espressione massima sua in tzentros comente Samugheo, Nule e Mogoro.

Accanta a sos pibiones, un’attera tennica de su connottu, isparta meda est cussa a lizzos, chi permitit de faghere motivos geometricos cadrios e chi si repitint. Non mancana tribaglios prus antigos e reffinados comente su puntu a traccu, impittadu mescamente po decoraduras essentziales e ideales, e sa produssione de s’arbaxi, unu pannu de lana chi no est tribagliada, cumpattu e chi non faghet passare s’abba, chi a s’ispissu fuit impittadu po bistires de su connottu e manteddos.

Sa Sardigna mustrat una variedade istravanada de tzentros de produssione, donzunu cun d’una forma chi si reconnoschet. Samugheo, in su coro de s’Aristanesu, est cussideradu su logu printzipale de s’artesanadu tessile sardu e accasazzat unu connottu bivu, chi fintzas oe est capatze de si mezzorare chentza perdere sas raighinas suas. Nule, in sa costera, est tzelebre po sos tappettos in lana dae sos colores cadrios e dae sos motivos geometricos detzisos, mentres Aggius, in Gaddura, si annodittat po cosas fattas a manu dae sas tonalidades prus cardas e naturales,ispiradas a sa bista granitica de s’iscrocca.

Unu rolu de primu pianu ispettat fintzas a Mogoro, nodidu po sa produssione de tappettos e aratzos e po s’istorica viera de s’artesanadu, chi donzi annu faghet arribare bisitadores dae tottu s’isula. Atteros tzentros importantes sunt Isili e Busachi, inube sa tessidura sighit a essere pratigada secundu tennicas de su connottu, manteninde biva una cultura de su “faghere” chi resistit a su tempus.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22