Meta, sa sotziedade noa de Mark Zuckerberg chi gestit Facebook e Instagram, at minetzadu de serrare sas duas retes sotziales in Europa si non s’agatat un’acòrdiu subra su tratamentu e trasferimentu de sos datos personales cara a sos Istados Unidos. S’avertimentu est istadu iscritu in su raportu annuale cunsignadu giòbia coladu a sa Security and Exchange Commission (Sec), s’autoridade americana garante de su mercadu.

Meta at iscritu in su documentu chi in ausèntzia de règulas cumpartzidas, chi cunsentant sos flussos de datos intre Istados Unidos e Unione Europea, cun probabilidade no at a èssere prus in gradu de ofèrrere unos cantos produtos e servìtzios prus importantes, cumpresos Facebook e Instagram, in Europa.

Una noa chi est a sa lestra est lòmpida in totue. Agèntzias de imprenta, giornales, blog, retes sotziales.

Ite pedit Meta? S’azienda ghiada dae Zuckerberg pedit de agatare un’acòrdiu a pustis de sa sentèntzia de sa Corte de Giustìtzia Europea de su mese de trìulas 2020 chi at invalidadu su Private Shield, s’acòrdiu istipuladu intre Ue e Istados Unidos etotu pro regulare su trasferimentu de datos dae un’ala a s’àtera de s’Otzèanu.

Pro sos giùighes pro su trasferimentu est netzessàriu una bera valutatzione subra de su Paisu tertzu acanta si trasferint sos datos personales ca devet garantire unu livellu de amparu adeguadu a cussu ofertu dae su Gdpr. In su mirinu ddoe sunt sas leges americanas, chi non diant garantire livellos adeguados de privatesa comente a cuddos europeos. Su problema non pertocat petzi Meta ma fintzas sas àteras aziendas de americanas mancari su colossu de sas retes sotziales est su chi pro como s’est espostu de prus.

Finas a immoe sos tentativos de mediatzione sunt semper andados male. Meta chi a nàrrere sa veridade dae pagu at “ismintzidu” sa noa òlere abbandonare s’Europa.

Est ladinu duncas chi a Meta serbat cun apretu aporrire sos datos de sos impitadores europeos subra de sos server suos in sos Istados Unidos. Custu at a pòdere garantire cussa publitzidade profilada cun sa cale at fatu dinari meda in sos annos colados. Abbandonare s’Europa diat èssere unu sèberu de macos. In custu mercadu Meta contat 309 milliones de impitadores ativos fitianos e 427 milliones ogni mese ultres a unu mercadu sìmile a su istadunidensu. Peruna azienda chi basat su balore suo subra su nùmeru de impitadores si podet permìtere de rinuntziare a su mercadu europeu.

S’istrategia de insertare cudda minetza caratzada in su report indiritzadu a sa Sec est in atribuire petzi a unu tentativu de imbiare unu messàgiu a sos vertices de sas istitutziones europeas subra de sa lìnia chi sa rete sotziale cheret cursare.

S’unione Europea at prefertu pro como non cummentare. S’est limitada petzi a crarire chi “una cosa devet èssere in manera assoluta crara: s’Ue istabilit sa legislatzione sua tenende contu de sos balores nostros, de sos interessos de sos consumadores e de sos tzitadinos”.

 “Progetto finanziato con l’Avviso Pubblico IMPRENTAS annualità 2021-2022”

Nora, sa tzittade supra de su mare chi contat sas issidas de sa Sardigna.

Intre sos logos archeologicos prus ammaghiantes de s’isula,sa zura archeologica de Nora est una de sas testimonias prus importantes de s’istoria antiga de sa Sardigna. Posta in sa costa sud-occidentale , in s’iscrocca de Pula, Nora est unu logu inube su tempus passadu ispuntat a pagos passos dae su mare, intre ruinas chi contant seculos de tzivilidade e barattos in su Mediterraneu.

Fundada cun meda probabilidade dae sos Fenicios intre su IX e s’VIII seculu A.C.,Nora est cussiderada una de sas tzittades prus antigas de s’isula. Pustis est divennida unu tzentru punicu importante meda e, prus a tardu,romanu, leande unu rolu istrategicu dae su puntu de bista de sos negossios chi de s’amministrassione. Sa posissione sua,supra de una penisula accarada supra su mare, l’at fatta divennere unu portu naturale e unu puntu de collegamentu de fundamentu intre sa Sardigna e sos atteros caminos de su Mediterraneu.

Passizzande intre sos restos de sa tzittade si podent biere in manera crara sas fases istoricas divressas chi sunt furriadas in su tempus.Intre sos elementos prus de ammaghiu bi est su teatru romanu, una de sas conas de su situ, chi fintzas oe benit impittadu in su mentres de s’istiu pro abbenimentos culturales e ispettaculos. Accanta a su teatru bi sunt sos istabilimentos termales, cun logos dedicados a su relax e sa vida sotziale, e parizzas domos decoradas cun musaigos chi testimonzant su livellu de isviluppu apperricadu dae sa tzittade in su tempus de sos romanos.

Sos caminos sticcados,sos restos de sas cresias e sas istrutturas de su portu contant de una tzittade biva e ordiminzada, inube si intrintzaiant attividades de barattu,religiosas e de donzi die.Interessante meda est su cuartieri punicu, chi custoid sas andalas de sa fase prus antiga de su logu. Unu de sos trattos pius ammaghiantes de Nora est s’appitzicu suo cun su mare. Parte de sa tzittade antiga s’isterriat in sa costa e oe carchi istruttura si agattat sutta de su livellu de s’abba, e si biet solu in carchi occasione.

Custu elementu dat unu contribbudu a faghere divennere su situ unigu, inube archeologia e bista naturale si fundent in d’unu ecchilibriu ammaghiante.Sos iscavos, chi sunt ancora faghinde, sighint a torrare materiales e informatziones novas, arricchinde sa connoschentzia de unu logu chi no at ancora iscoviadu sos segretos suos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22