Petzi in sa prima chida de maju in Casteddu, si fiant ismalaidados 58 pipios. Duncas su sìndigu Mario Palomba, in acòrdiu cun su Proveditore, aiat detzìdidu de serrare sas iscolas elementares su 18 de maju, fiat su 1959. Sa vatzinatzione in Itàlia fiat devènnida obrigatòria in su ’66 ebbia.

Sa poliomielite est una maladia infetiva grave de su sistema nerviosu tzentrale chi corpit mescamente sos neurones motores de su meuddu ispinale, si trasmitet pro bia respiratòria . Su virus sartzit in su sistema nervosu tzentrale in pagas oras, istrumende sas tzèllulas neurales e causende una paràlisi chi podet devènnere, in sos casos prus graves, fintzas totale. Sas cambas perdent tonu musculare e devenint moddes, cunditzione nòdida comente paràlisi moddinca ; in casos de infetzione estesa a totus sos artes, su malàidu podet devènnere tetraplègicu. In sa forma prus grave, cussa bulbare, su virus inchìrdinat sos mùsculos innervados de sos nèrvios crànicos, reduende sa capatzidade respiratòria, de ingestione e de paràula.

In su 1958 in Itàlia si fiat registradu una punta de infetzione de su virus chi aiat castigadu prus de 8.000 persones. In su 1959 una difusione noa de su virus aiat corpidu sa Sardigna, prus che totu Casteddu, a su puntu chi in sa primu chida de maju in tzitade si fiant registrados 58 casos totus de pipios in edade iscolare. Pro custu, su sìndigu de tando, Mario Palomba, de acòrdiu cun sas autoridades sanitàrias e su Proveditore, aiat emanadu un’ordinàntzia chi istabiliat sa serrada antitzipada de totu sas iscolas elementares de sa tzitade. In Itàlia su vatzinu, iscobertu dae Jonas Salk in su 1954 in Amèrica, fiat arribbadu in su 1957, ma a su comintzu in pagos aiant sutapostu sos fìgios issoro a sa vatzinatzione.

In su 1964, fiat istada promòvida una campagna de vatzinatzione de massa chi aiat reduidu sos casos a 3.000 in un’annu, e in su 1956 sos casos registrados fiant istados chimbighentos ebbia. In su 1966 su vatzinu fiat istadu rèndidu obrigatòriu, ma bida s‘adesione diferente a sa campagna vatzinale chi bi fiat istadu in su Sud respetu a su Nord de su Paisu, cun unu pesu de infetziones poliomielìticas tres bias prus artas in su Sud respetu a su Nord in su triènniu 1966-68, su Ministeru de sa Salude aiat rèndidu obrigatòria sa vatzinatzione in su primu annu de vida e su richiamu a tres annos. S’ùrtimu casu de poliomielite in Itàlia fiat istadu registradu in su 1983.

 “Progetto finanziato con l’Avviso Pubblico IMPRENTAS annualità 2021-2022”

Regorta differentziada,Sardigna intre sas primas ma serbit unu passu in prus.

Sa Sardigna si cuffirmat intre sas regiones prus attentas a sa conduida de s’arga. In su 2024 sa regorta differentziada est arrivada a su 76,5% e balet su terzu postu in Italia, in daesegus de Emilia Romagna e Veneto.

S’elementu,presentadu dae Legambiente in su mentres de s’Ecoforum de Casteddu, mustrat una situassione positiva.Intames si registrat una minimada pitticca de sos comunes prus virtudosos e de cussos chi resessint a arrivare a prezenias artas meda de regorta. In d’una parte manna de s’isula sunt oramai diffundidas abitudines bonas in s’isseperu de s’arga, signu chi in sos annos est bistadu fattu unu tribagliu importante dae sas amministratziones e sos tzittadinos. Sa regorta gianna pro gianna e un’attentzione prus manna a sos cumportamentos de donzi die ant dadu unu contribbudu pro mezorare sos risurtados.

A su mattessi tempus addurant ancora trempas de mezoramentu. Carchi tzentru no arribat a sos livellos prevedidos e sighint a faghere prus fatiga,comente Tattari, mancari siant arribande cambiamentos chi diant podere battire menzus resurtados giai in sos annos imbenientes. Intre sas tzittades printzipales si annoditant Aristanis e Nugoro, chi cuffirmant prezenias artas e organizassione bona de su servitziu, divenninde puntu de relata fintzas po sas atteras iscroccas.

Su cuadru chi bessit a pizu est cussu de una regione chi at fattu passos in daenantis importantes, ma chi non si podet permittere de si frimmare. Una parte de s’arga sighit difattis a no essere differentziada e custu pesat siat supra de s’ambiente chi supra sos costos pro sas comunidades. Sa bera porfia como no est solu mantennere sos risurtados segudados, ma los rendere prus pariviles in totta sa Sardigna. Bi sunt iscroccas chi andant bene meda e atteras chi addurant in daesegus: minimare custa differentzias at essere de fundamentu pro mezorare deabberu su sistema.

In giogu non bi est solu una prezenia, ma sa manera cun sa cale si abbidat a su tempus benidore. Mezorare sa derettura de s’arga cheret narrere de minimare su corpu supra de s’ambiente, ma fintzas fraigare comunidades prus scientes e responsabbiles. Est unu caminu chi dimandat continuidade e impignu e seperos craros, pro itte sos resurtados alcansados fintzas a como mustrant chi furriare est possibile, ma solu si si andat a daenantis chena si frimmare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22