Est su 13 austu 1949. Sunt armados de mitra e bombas a manu, e sunt in medas. Si nche sunt apostados in su caminu Tortolì-Biddamanna Strisàili, a s’artària de Monte Maore. A su passàgiu de su mezu cun sas pagas de sos operajos si nde sunt istacados de repente e s’autista est custrintu a si firmare. In cussos annos fiat in faimentu sa diga noa de su Flumendosa, e in s’autocarru b‘aiat belle 9 milliones de liras. A pustis de pagos segundos lompet sa camioneta de sos carabineris chi faghiat sa guàrdia a su portavalores.

Sos bandidos calant su fogu a sos militares. Bator carabineris abarrant mortos, àteros 5 fertos. Sos bandidos si nde leant chimbe milliones e mesu de liras.

Sos carabineris poderant cun coràgiu. Pro los agiuare, su brigaderi aristanesu Antonio Sanna, tando 36 annos, chi si fiat distintu pro sa reatzione bronta e pro su coràgiu suo in s’afrontare sa truma de bandidos.

«Fiat rèdutze de sa Segunda Gherra Mundiale – ammentat oe su fìgiu Franco – Fiat de bonu coro e rispetosu cun totu sos collegas. Chie li fiat amigu aiat una fortuna manna e pro mene est un‘onore èssere fìgiu suo. Fintzas in mesu a cussu isparatòriu, at reagidu cun firmesa, coràgiu e cun generosidade. In su 1959, difatis, at retzidu sa medàllia de prata a su mèritu de servìtziu de su Ministeru de s’Internu ( foto). Prima de s’arruolare, fiat istadu unu de sos mègius autistas de s’esèrtzitu italianu e a tzivile fiat istadu fintzas unu mecànicu capatzu. Mandadu a Àfrica pro sa campagna orientale de sa segunda cuntierra mundiale, fiat istadu seberadu comente autista de su Generale Mambrini e de su Coronellu Fabbri. Si fiat amoradu de s’Àfrica e aiat imparadu sa limba prus impreada, su swahili. Aiat sarbadu, a pustis de unoatacu de sos inglesos, una barantina de commilitones e fiat istadu premiadu fintzas pro custu. Cando fia piticu, mi contaiat chi in Somàlia costruaiant sas domos impreende su matone fatu cun sa matessi tècnica chi s’impreaiat in Aristanis. Su làdari, un’impastu de arghidda, pàgia e ludu. Aiat coràgiu a fìgiu bonu, fintzas in sas operatziones militares prus perigulosas. Sos collegas l’istimaiant pro sa garbu suo e pro s’operatividade sua»

No est sa primu bia chi sos bandidos atracant sas veturas in mesu a su caminu. A sas 9.15 de su 7 de abrile su postale sa trata Nùgoro-Lanusè, fiat istadu assaltada dae sete òmines armados e infatzolados. Sos 30 passigeris fiant istados fatos calare a terra e ispogiados de ogna cosa de valore, ma nemos fiat abarradu feridu.

Àteros episòdios sighint in sos meses sighentes e s’aberit un‘istajone mala de sos assaltos, tantu chi cumintzant a nd’essire a pìgiu sas “personalidades”, de sos bandidos chi prus de àteros s’ammustrant iscudados e risolutos, devenende figuras legendàrias, fintzas a cando non benint arrestados. Intre issos tocat a remonare Pasquale Tandeddu e Giovanni Battista Liandru chi at a èssere annomingiadu “Su Salvatore Giulianu sardu”.

 “Progetto finanziato con l’Avviso Pubblico IMPRENTAS annualità 2021-2022”

Tzinema sardu, arribat su film”Bandidos e Balentes de Fabio Manuel Mulas

Si sunt faghinde sas represas de su film “Bandidos e Balentes”, su disignu tzinematografficu novu de su regista sardu Fabio Manuel Mulas, chi at a bessire intre pagu tempus. Su film contat un’istoria ambientada in sa Sardigna de su passadu e s’ispirat a sos contos e mudas ligadas a su fenomenu de sos bandidos in s’isula.

Mulas est unu regista e autore sardu chi dae annos tribagliat in su mundu de su tzinema indipendente. In sos tribaglios suos dat attentzione particulare a s’istoria, a sa cultura e su connottu de sa Sardigna. Sa tiza battit supra s’ischermu unu mundu fattu de connottu, gherras e vida in sas zuras internas de sa Sardigna.

Sas mudas sunt ambientadas in sos annos Chimbanta e mustrant comente sa vida de sas pessonas esseret signada dae vindittas e cunfrontos diffitziles intre familias e bandidos. A su tzentru de s’istoria bi sunt pessonas divressas sas vidas de sas cales cambiant propriu pro more de custu clima de tesone e violentzia.

Su film cheret contare non solu su bandizadu ma fintzas sa cultura e sas bistas de s’isula. Sos montes de intro, sas biddas e sas campagnas de sa Sardigna faghent de irfundu a sas mudas de sos attores e mustrant una terra antiga e forte, ligada in manera funguda a su connottu suo.

In su “cast” medas piccioccos sardos, calicunu a sa prima esperientzia, ma fintzas s’attora sarda Caterina Murino, nodida a livellu internatzionale pro sos rolos suos in su tzinema e sa televisione. Sa partetzipassione sua est unu balore in prus po su disignu e at a dare unu contribbudu e faghere biere de prus su film. Sar represas sunt appassionande paritzos logos de s’isula e sunt attirande s’attentzione de appassionados de tzinema e curiosos.

S’intentu de su regista est de contare una pagina de s’istoria sarda pro mesu de unu limbazu tzinematografficu capatze de aunire assione, dramma e connottu. Cun s’essida chi si prevedit in sos meses imbenientes,”Bandidos e balentes” puntat a che leare supra de s’ischermu mannu un’istoria ligada a sa Sardigna in manera funguda, balorizzande s’iscrocca e sas raighinas culturales suas. Su film est fintzas un’occasione pro faghere connoschere a su pubbricu una parte importante de sa memoria istorica de s’isula pro mesu de su tzinema.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22