Cale est sa bidda prus pitica de sa Sardigna? E cudda prus in artu? Iscoberimus sas printzipales notziones chi est importante a connòschere de geografia de sa Sardigna.

Sa bidda prus pitica. Su comunu de sa Sardigna prus pagu populadu, duncas prus minoreddu est Bobadri, in provìntzia de Aristanis. Segundu s’ùrtimu tzensu tenet 74 abitantes. Nde contaiat 210 in su 1954.

Sa bidda prus in artu. Su comunu montanu prus famadu  est fintzas cussu cun s’artària majore. Semus faeddende de Fonne chi s’agatat a 1.000 metros subra de su livellu de su mare.

Su riu prus longu. Su riu prus longu est su Tirso, chi comintzat dae Punta Pianedda e andat conca a Aristanis, in su mare de Sardigna. Est longu 152 km. Su segundu, su Flumendosa, est longu 127 km, ma tenet una portada de abba majore.

Su lagu prus mannu. Su batzinu ìdricu prus mannu de s’Ìsula est su Lagu Omodeo, costruidu dae sos annos ’20. Su volùmene totale de s’invasu est de  792 milliones de metros cubos de abba e òcupat una superfìtzie de 29,370 km². Est profundu padu de mancu de 60 metros.

Sa tzitade prus manna. Casteddu est sa tzitade prus populosa cun 149 mìgia abitantes.

Su monte prus artu. Sa punta prus arta de sa Sardigna s’agatat in su Gennargentu e est Punta La Marmora cun 1.834 metros subra de su livellu de su mare.

S’ìsula prus manna. Santu Antiogu est s’ìsula prus manna cun 108,9 metros cuadros e belle 14 mìgia persones.

Su puntu prus a sud. A su contràriu de su chi si pensat no est Capo Teulada su puntu prus a sud de sa Regione. S’Ìsula del Toro, corru piticu de terra a sud-ovest de s’ìsula printzipale, est su puntu prus meridionale.

Su puntu prus a nord. Punta Falcone, in su territòriu de Santa Teresa de Gaddura, est su puntu prus setentrionale de sa Sardigna “continentale”. No est però su puntu prus a nord, chi est imbetzes una  isuledda pitica de s’Arcipèlagu de Sa Madalena, postu a nord de s’Ìsula de La Presa, sighimentu de Santa Maria.

Sa pranura prus ampra. Sa pranura prus manna de s’Ìsula est su Campidanu, chi s’isvilupat dae Casteddu a Aristanis pro 1.850 km cuadrados.

 “Progetto finanziato con l’Avviso Pubblico IMPRENTAS annualità 2021-2022”

© RIPRODUTZIONE RISERVADA

Nora, sa tzittade supra de su mare chi contat sas issidas de sa Sardigna.

Intre sos logos archeologicos prus ammaghiantes de s’isula,sa zura archeologica de Nora est una de sas testimonias prus importantes de s’istoria antiga de sa Sardigna. Posta in sa costa sud-occidentale , in s’iscrocca de Pula, Nora est unu logu inube su tempus passadu ispuntat a pagos passos dae su mare, intre ruinas chi contant seculos de tzivilidade e barattos in su Mediterraneu.

Fundada cun meda probabilidade dae sos Fenicios intre su IX e s’VIII seculu A.C.,Nora est cussiderada una de sas tzittades prus antigas de s’isula. Pustis est divennida unu tzentru punicu importante meda e, prus a tardu,romanu, leande unu rolu istrategicu dae su puntu de bista de sos negossios chi de s’amministrassione. Sa posissione sua,supra de una penisula accarada supra su mare, l’at fatta divennere unu portu naturale e unu puntu de collegamentu de fundamentu intre sa Sardigna e sos atteros caminos de su Mediterraneu.

Passizzande intre sos restos de sa tzittade si podent biere in manera crara sas fases istoricas divressas chi sunt furriadas in su tempus.Intre sos elementos prus de ammaghiu bi est su teatru romanu, una de sas conas de su situ, chi fintzas oe benit impittadu in su mentres de s’istiu pro abbenimentos culturales e ispettaculos. Accanta a su teatru bi sunt sos istabilimentos termales, cun logos dedicados a su relax e sa vida sotziale, e parizzas domos decoradas cun musaigos chi testimonzant su livellu de isviluppu apperricadu dae sa tzittade in su tempus de sos romanos.

Sos caminos sticcados,sos restos de sas cresias e sas istrutturas de su portu contant de una tzittade biva e ordiminzada, inube si intrintzaiant attividades de barattu,religiosas e de donzi die.Interessante meda est su cuartieri punicu, chi custoid sas andalas de sa fase prus antiga de su logu. Unu de sos trattos pius ammaghiantes de Nora est s’appitzicu suo cun su mare. Parte de sa tzittade antiga s’isterriat in sa costa e oe carchi istruttura si agattat sutta de su livellu de s’abba, e si biet solu in carchi occasione.

Custu elementu dat unu contribbudu a faghere divennere su situ unigu, inube archeologia e bista naturale si fundent in d’unu ecchilibriu ammaghiante.Sos iscavos, chi sunt ancora faghinde, sighint a torrare materiales e informatziones novas, arricchinde sa connoschentzia de unu logu chi no at ancora iscoviadu sos segretos suos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22