Mancant pagos oras a s’acabbu de su 2021.

S’annu chi est belle coladu est istadu un’àteru annu istragosu meda pro totu su Mundu pro more de sa pesta de su Covid-19. Seguru est istadu importante meda sa realitzatzione de unu vatzinu chi at permìtidu de fàghere calare sa pertzentuale de sa mortalidade in populatzione contàgiada.

In Itàlia sa gestione de s’imunitzatzione est andada bene meda, mancari una parte minore de italianos non siat istados galu vatzinados – semus alleghende de is no-vax -, cun su generale Figliolo chi at fatu unu traballu mannu a beru. Tzertu sa crèschida de is cundiduras in custas ùrtimas chidas est donende arriolu, ma chi andamus a abaidare is àteras natziones europeas sa situatzione est galu prus grae. Sa variante de su Covid, giamada Omicron, no est lassende dormire sonnos bonos a is autoridades sanitària, cun is patzientes in terapia intensiva in crèschida.

Tzertu cunforma a s’annu coladu, su 2021 est istadu s’annu de su repìgliu econòmicu, gratziàs a sa ghia de Mario Draghi chi at mustradu s’àndala bona pro essire daa sa crisi manna a pustis sa lòmpida in Itàlia de su Covid-19. Su presidente de su guvernu est istadu bantadu meda dae s’istampa natzionale e internatzionale, cun su pòpulu chi est cuntentu meda pro comente sunt andende is cosas.

Unu resurtadu importante est istadu s’introdutzione de óbligu de su documentu sanitàriu, chi at fatu cumprèndere a totus cale diat èssere istada sa lìnea italiana.

Non tocat però s’ismentigare is vitòrias mannas de s’isport italianu de ocannu. S’istade de su 2021 nos at regaladu sa Copa Europa de fùbalu, gratziàs a s’iscudra allenada de Roberto Mancini. Ant a abarrare in s’istòria pro semper is resurtados de sa rapresentativa asula a is Olimpìades de Tokyo. Sa bella vitòria de Jackobs in is 100 metros est in su coru de totus is italianos, comente sa gara de s’istafeta, cun is sardos Patta e Tortu chi ant bìnchidu sa medàglia de oru.

Duncas saludamos custu annu chi est casi pro colare cun s’ispera chi su 2022 siat prus bonu pro totus.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Sa Dea Mama: una de sas divinidades prus antigas de sa Sardigna.

Sa Dea Mama est una de sas friguras prus antigas e ammaghiantes de s’istoria de sa Sardigna. Si trattat de una divinidade feminina chi pro sas populassiones de sos tempos antigos mustraiat sa vida, sa naschida e sa saliosidade. Sos archeologos ant acciappidu medas istatueddas chi la mustrant in paritzos sitos de s’isulas, sinzu chi custa frigura teniat unu rolu importante meda in sa religione e sa cultura de sas comunidades antigas. Custos oggettos antigos sunt de mizza e mizza annos faghet, meda prima de sa tzivilidade nuragica.

Sas istatueddas de sa Dea Mama sunt casi semper pitticcas e fattas de terra cotta o in pedra. In casi tottus sas istatuas su corpus femininu est meda evidentziadu, cun tittas, bentre e costazos evidentziados. Custas formas non fuint unu particulare artisticu simple, ma teniant unu signifficu forte meda. Serbiant difattis a mustrare sa capatzidade de sa femina de dare sa vida. Pro sas populassiones antigas sa femina fuit bida comente una frigura sacra pro itte mustraiat sa naschida, sa creschida e s’andare a daenantis de sa comunidade.

In cussu tempus sa vida de sas pessonas fuit ligada a s’istrinta cun sa nadura. Sas comunidades biviant mescamente de laurantza e pesadura e dippendiant de su tottu dae sa saliosidade de sa terra.Si sos campos produiant pagu o si sos animales non proliffigaint, sa vida de sas biddas fuit in perigulu. Po custu motivu, sa saliosidade fuit cussiderada un’elementu de fundamentu e sa Dea Mama mustraiat propriu custa fortza de sa nadura capatze de ingendrare e nudrire sa vida.

Est probabbile chin sas istatueddas benzerent impittadas in su mentres de ritos religiosos o tzerimonias ligadas a sos mamentos prus importantes de sa vida de sa comunidade, comente sa semenadura, su regortu o sa naschida de sos pitzinnos. Pro mesu de custos ritos sas populassiones dimandaiant affianzu, bundantzia de sos regortos e primorosidade po sas biddas.

Sa Dea Mama fuit duncas bida comente una frigura amparadora chi garantiat s’ecchilibriu e su benessere. Intre sos oggettos prus connoschidos bi est sa Dea Mama de Turriga, un’istatuedda in terracotta de su terzu millenniu A.C. Sa frigura est bistada fatta sezzida cun sas manos supra de su bentre, unu gestu chi mustrat in manera crara su tema de sa maternidade e de s’ingendra de sa vida.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22