Is nuscos, is colores, is atmosferas, is decoratziones, is mesas aparitzadas, is amigos, is parentes, s’àrbore, is istrinas, s’àera de festa e fintzas Babbu Nadale. Sunt petzi una pariga de is cosas chi donant a custu perìodu de s’annu unu tocu ammajadore.

Tzertu ocannu puru at a èssere una Paschighedda unu pagu particulare pro more de is cundiduras de su Covid-19, semper in créschida in custas ùrtimas chidas.

Ma pro un’iscuta de tempus chircamus de non pensare a custa pesta mala e pensamus a is regalos chi amus a pòdere fàghre pro sa Pasca de Nadale? Proamus a dare calchi cunsìgiu.

Dae is annos 2000, est a nàrrere dae cando sa rivolutzione digitale at cumintzadu a crèschere a totu biore, est cambiadu fortzis calicuna cosa?

Internet, is mèdias sotziales, su cumèrtziu eletrònicu e is impriastos eletrònicos nostros ant influentzadu custa festa e su gosi mutidu “ispìritu de su Nadale”.

Faghimus·nos una pregunta: cantu est cambiadu su significu de su regalu in su perìodu de Nadale?

Fortzis diat bisongiare a torrare a iscobèrrere su “balore de su donu”. Unu regalu, cando ddu seberamus, ddu ponimus in un’iscàtula e cando ddu donamus, contat carchi cosa de nois etotu.

Su donu podet èssere caru o de valore, ma a ogna contu is ogetos chi detzidimus de istrinare a su cumpàngiu nostru, a is caros nostros e a is amigos iscòviant medas cosas de su chi semus nois etotu.

Nos devimus dimandare cale impressione bolimus donare de nois a is chi retzint su regalu nostru. Cale est, in pagos foeddos, su contu chi acumpàngiat su regalu chi faghimus?

Dìamus dèpere torrare a iscobèrrere totus sa “dimensione de su donu”, pro evitare chi fintzas su Nadale si furrit in un’operatzione cumertziale ebbia e un’iscusa pro gastare dinare e comporare mertze ebbia.

Paris a s’istrina devimus regalare a nois etotu cun un’iscopu nòbile, comente su de agiudare is àteros, fortzis est custu su donu giustu pro sa Pasca de Nadale.

Bidu chi semus in Sardigna, cunsigiamus duncas carchi cosa chi allegat de s’identidade nostra, mègius si iscritu in limba sarda. Duncas, Bona Paschighedda a totus.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Coldiretti Casteddu, at fattu una proposta apprettosa a sos sindigos de sa Sardigna de su mesudie orientale: dimandare sa utta de calamidade naturale po cajone de s’assuttura grae meda chi est devastande s’iscrocca dae paritzos meses.

Custu appellu est bistadu fattu cun d’una littera mandada a sos primos tzittadinos de 25 Comunes de cussa zura, cun s’intentu de bischidare sas comunidades e alcansare unu accottu praticu. In sa littera mandata, su presidente e su direttore de Coldiretti Casteddu, Giorgio Demurtas e Luca Saba, evidentziant sa drammaticidade de sa situassione chi est imbrinucande sos massajos e sos pastores de sa regione.

Sa mancantzia de s’abba po parizzu tempus at cajonadu una crisi chi non tenet cabidianu, cun dannos mannos meda a sa laurantza e a sas attividades de allevamentu. Addaenantis a custa emergentzia, Coldiretti evidentziat s’importantzia de si interessare a sa lestra e cun detzisione, uninde sas fortzas cun sos sindigos de sos Comunes interessados, po apprettare sa Regione a declarare sa utta de calamidade naturale.

Sigundu Coldiretti, declarare sa utta de calamidade est necessariu po alcansare sos benes chi serbint a su sustentamentu de sas comunidades de sa campagna e sas attividades de produssione insoro, chi sunt bistadas accroppadas meda dae una crisi chi paret non dare asseliu. Sos massajos e sos pastores, chi sunt sos colondos de sas comunidades locales, sunt in d’una situassione critiga meda, cun meda problemas de colomia de oe e de cras.

In manera particularee, sa zura de sa Sardigna de su mesudie Orientale est bivinde una situassione critica, cun meda pastores chi teppent acomettare dannos dae s’assuttura e problemas po comporare sa provenda po cumpensare sa mancantzia de sos appassiadorzos. Custu at cajonadu cunseguentzias chi ant devastadu sos fatturados de sas dittas. Coldiretti, narat de tennere cunfiantza in sa sensibilidade de sos sindigos e dimandat una assione lestra meda dae parte de sas istitussiones po azzuare sas dittas in custa situassione drammatiga meda.

S’organissasione addurat disposta a dare sa collaboratzione sua a tottu sas amministrassiones chi anta a partetzipare po s’interessiu e su benessere de sas comunidades locales. Sos pensamentos po su motivu chi sa situassione potat diventare pius grae, sunt fundadas, tenende in cunsideru puru s’arriscu po sos cultivos de s’istiu e de s’attonzu, pustis de sas difficultades passadas in s’iberru e su beranu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22