A Torinu at bìnchidu sa Juventus.

Is òmines de Mazzarri non sunt arrenèschidos a riscatare is partidas pèrdidas contra s’Inter e s’Udinese totus e duas pro 4-0.

In su Juventus Stadium est acabbada 2-0 pro is meres de domo, cun is goal realizados dae Kean e Bernardeschi.

S’allenadore casteddaju, a pustis de sa partida, at nàradu cji is giogadores sardos ant giogadu una bona partida, ma est abarradu delusu pro su resurtadu.

A is biancu-nieddos ddis serbiant puntos pro s’istesiare dae sa zona mesantera de sa classìfica, ma pro sa gana dimustrada, is ruju-blu diant àere meritadu de paregiare.

Su primu gol de sa Juventus est istadu marcadu dae Kean, cun unu tiru deviadu a s’acabbu de su primu tempus, a pustis una bella atzione de Bernardeschi.

Su Casteddu at proadu a aderetzare su resurtadu cun Joao Pedro, Dalbert e Pavoletti, ma is giogadores sardos no ant tentu sorte bona e una pariga de bias est istadu bravu meda su portieri biancu-nieddu.

Imbetzes est istada sa Juventus in su finale de su segundu tempus a marcare un’àtera rete cun Bernardeschi, pro su 2-0 chi at decraradu sa vitòria de sa Juventus cun cuntentesa manna de is giogadores allenados dae s’ex allenatore ruju-blu Allegri – semper istimadu dae is tifosos sardos -.

Duncas cun totus is ùrtimas partidas pèrdidas, su Casteddu at cungiadu custu 2021 disfortunasu, cun malas proas, faghende patire is tifosos isulanos.

A s’incumentzu de s’annu nou, su Casteddu at giogare contra sa Sampdoria. Una partida difitzile meda a Genova cun is blu-tzerchiados, ca in custa ùrtimas chidas sunt gioghende bene meda.

Su 6 de ghennàrgiu is ruju-blu ant a tènnere sa possibilidade pro de mustrare su valore issoro e furriare s’àndala mala de custa parte de istajone.

At a mancare su difensore Dalbert, ca in su Juventus Stadium de Torinu est istadu amonidu cun unu cartellinu grogu dae s’arbitru, chi dd’est costadu s’iscualifica pro sa partida benente.

Tres dies a pustis, su 9 de ghennàrgiu, imbetzes, is òmines de Mazzarri ant a giogare tra is muros amigos de s’Unipol Domus contra su Bologna.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Iscoperta una necropoli in su Nord Sardignain su mentres de sos tribaglios po un’approntu solare.

Un’iscoperta archeologica importante meda est bistada fatta in su Nord Sardigna in su mentres de tribaglios ligados a sa produssione de energia pulida. In sa zura industriale de truncu Reale-Sant’Agostino, accanta a Tattari,sos iscavos de ammaniada pro fraigare un’approntu solare ant fattu bessire a pizu una necropoli chi fintzas a oe non fuit bistada mai iscoperta.

S’accattu est sutzessu in sa zura curada dae su Consorziu Industriale de Tattari. Sos iscavos sunt incumintzados in su mese de martu de su 2024, cando sunt bistados cunviados sos controllos de su terrinu prima de fraigare s’impiantu. In su mentres de custos controllos sos archeologos ant acciappidu istrutturas sutta de terra e, sighinde cun sos iscavos, ant cumpresu chi si trattaiat de unu logu antigu de tumba.

Secundu su chi pensant sos espertos, su logu est importante meda po s’istoria e s’iscentzia. In sa zura sunt bistadas agattadas tres tumbas mannas iscavadas in sa rocca, istrutturas mannas chi faghent pensare a tumbas de balore mannu po sas populatziones chi biviant in custa zura in s’antichidade. S’iscoperta est fintzas prus interessante pro sa presentzia de decorassiones fittadas supra sas barras’e muru de sas tumbas. Si trattat de signos e pintas fittados in sa rocca in sos seculos passados. Custa fittadas faghiant parte de su connottu de sos interros de sas populatziones antigas de sa Sardigna e a s’ispissu teniant unu signifficu simbolicu o religiosu.

Po sos istudiosos custos elementos sunt importantes meda pro itte podent azzuare a cumprendere menzus comente biviant sas comunidades de su tempus passadu e cale esserant sas credentzias insoro. Sas tumbas e sas decorassiones diant podere dare novas supra su connottu, sa cultura e sa vida de sas pessonas chi biviant in s’iscrocca tattaresa mizza e mizza de annos faghet.

Sos archeologos ant a sighire a istudiare sa zura e analizzare tottu su chi est bistadu acciappidu in su mentres de sos iscavos. Donzi particulare novu diat podere accreschere sas informatziones chi serbint pro fraigare s’istoria de su logu. Custa iscoperta mustrat un’attera borta cantu sa Sardigna siat ricca de testimonzas de su passadu. Fintzas in su mentres de tribaglios modernos, comente cussos ligados a sa produssione de energia, podet capitare de acciappare andalas de tziviltades antigas meda chi contant s’istoria longa de s’isula.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22