Arrestadu s’orgolesu Graziano Mesina.

Sa fua sua si concruit a pustis de prus de un’annu in Dèsulu, in una domo de mesu bidda.

Su Generale Pasquale Angelo Santo, in una cunferèntzia de imprenta chi est istada fata pagora faghet in Casteddu, at acraridu is particulares de s’operatzione de is carabineris.

Mesina, s’ex bandidu non s’est fatu agatare prus dae su 2 de mese de argiolas 2020, cando sa corte de Cassatzione aiat cunfirmadu sa cundenna a 30 annos de càrtzere, reduida posca a 24. In cudda matessi die, pagu a pustis de sa cunfirma de sa cundenna, Mesina s’est istesiadu dae bidda e dae tando si sunt pèrdidos sas rastros suos. In deretura sa giustìtzia s’est posta a ddu chircare, ponende a pòmpiu parentes, amigos e connoschèntes. Ma is indàgines sunt istadas difìtziles meda, mescamente pro more de su nùmeru mannu de familiare e parentes.

Gratzianeddu est istadu agatadu notesta e atzapadu gràtzias a unu percursu longu de indàgines investigativas, fatas de osservatziones e sighimentos dae banda de is carabineris Ros, cun su suportu de su Gis e de is Cacciatori di Sardegna.

Mesina s’agataiat in una domo de una còpia de amigos, arrestada pro favoressimentu. A s’ora de s’arrestu Mesina fiat solu in s’apartamentu, no at fatu resistèntzia e non fiat armadu. Teniat 6 mìgia èuros a manu, mancari chi dd’esseret istada blocada s’erogatzione de sa pensione. Ancora: in domo su bandidu fiat bestidu, fortzis prontu a cambiare atacadòrgiu.

S’inghesta de is militares est istada difìtziles pro more de cunditziones de Dèsulu, bidda serrada e acorrada. Peruna ventana s’est aberta custa note e peruna lughe est istada alluta. Peruna persone s’est incrarada.

Si pensat chi Mesina non s’agataret in cussu logu dae meda tempus, ma sunt in cursu in indàgines.

Pobiddu e pobidda desulesos chi ant donadu allògiu a Mesina non sunt parentes suos. Si pensat chi issos s’ocuparent de sas primas netzessidades e de is bisòngios de su bandidu, sende chi issu no essiat mai. Is duos, a s’arribu de is carabineris, fiant dormidos. Peri Graziano, agatadu a su primu pranu, dormiat, ma cun su bestire.

Is cunditziones fìsicas de Mesina parent bonas e est istadu leadu a su càrtzere de Badu de Carros.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Miraculu meigu in su Brotzu: mama e fizu salvados dae una rara infetzione chi los podiat faghere morrere.

Un’operassione meiga desamplada, fatta in s’ispidale Brotzu de Casteddu, at permittidu de salvare una femina zovana raida e su pitzinnu suo dae un de sas infetziones pius graves e raras chi siant mai bistadas rescontradas in sa ginecologia. Sa solutzione, cunsideradu unu casu sanidariu de importantzia mondiale, est bistada pubbricada supra sa Rivista de grandesa iscientifica Case Reports in Women’s Health.

Sa femina, una zovana casteddaja raida dae solu doighi chidas, est arrivada a s’ispidale in cunditziones disisperadas: un’infetzione chi la podiat furminare, unu cuadru de animia grave e una cumplicassione rara meda- una granchena ispabina- poniant a arriscu in pagu tempus sa vida sua e de su pizzinnu. S’operassione in sa parte de Ginecologia de su Brotzu at mustradu unu momentu importante po sa meighina de su tempus nostru, no solu po sas difficultades de su casu, ma po sa prontesa e sa pretzisione cun sa cale est bistadu accomettadu.

A sa base de su cuadru sanidariu bi fit sa “Sindrome di Fournier”, una maladia grave meda chi faghet morrere impresse meda sa petta modde, e chi corpat de pius sos omines che i sas feminas. In custu casu, sa cumparfida sua in andantzia fuit una emergentzia bera chi no si connoschiat, acchessada dae un’atteru problema chi teniat dae prima, sa carentzia de globbulos biancos, chi faghiat divennere s’organismu de sa femina meda debile.

Gratzias a unu atzertamentu de sa maladia lestru e coidau, sos duttores ant potidu faghere a sa lestra un’operassione chirugica de livellu artu meda. S’operassione est bistada controllada dae su proffessore Antonio Macciò, gavacciu de Ginecologia e Ostetricia a s’universidade de Casteddu e direttore de sa Ginecologia Oncologica de s’ispidale Businco, su tribagliu de su team , in su cale bi fuint mastros de partu, silugianos, istudiosos de su sambene e ispecializzados in s’istudiu de sa pedde modde, at permittidu de frimmare s’infetzione e affortigare sas cunditziones de sa malaida.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22