Su Casteddu depet torrare a bìnchere a malabògia. S’iscuadra est dae deghe partidas chi non lompet a sa vitòria in campionadu.

In custas garas in domo no at tentu aversàrios balentes meda, ma in s’ùrtima partida ebbia at giogadu contra s’Internazionale e at pèrdidu in malu modu.

Contra is nieddos-asulos ghiados de s’ allenadore Simone Inzaghi sa partida est acabbada 4-0, cun is ruju-blu chi pariant iscambados e sena gana de gherrare. Cun su Cittadella, in Copa Itàlia, is sardos sunt resèssidos a bìchere ebbia.

In sa partida contra s’iscuadra de Sèrie B, is tifosos casteddajos ant protestadu contra su presidente Giulini a metade de partida, cun is Sconvolts chi ant lassadu s’Unipol Domus.

Cun s’Udinese is tifosos sardos s’ant a fàghere sa buca bona? S’iscuadra de Walter Mazzarri tenet isperu bonu, e furriare cuss’àndala mala chi at pigadu in custa istajone.

Tocat a si subènnere chi sa punna de su Casteddu est de abarrare in Sèrie A, ma ocannu puru su resurtadu at a èssere istragosu meda, e diat a èssere conchistadu in is ùrtimas giorronadas.

Sa partida de custu sero, in domo, contra is friulanos chi dae pagu tempus ant cambiadu s’allenadore, no at a èssere fàtzile pro ite s’iscuadra de su presidente Pozzo puru est chirchende puntos pro essire a foras de sa zona caente de sa classìfica.

Pro firmare s’Udinese at a serbire marcare bene in atacantes chi sunt lestos meda. Is òmines de Mazzarri tenent idea de donare una proa manna pro cungiare bene custa parte de istajone tra is muros amigos.

Pro resèssere a bìnchere a is giogadores ddis at a tocare a nde bogare a foras su caràtere issoro e a rispetare sa màllia ruju-blu. Est pretzisu pro cussu chi is atacantes torrent a èssere de muta bona, pro ite in s’ùrtima partida ant marcadu belle e nudda. Su capu-cannoneri de su Casteddu, su capitanu Joao Pedro, isperamus chi at a èssere detzisivu pro su resurtadu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Regorta differentziada,Sardigna intre sas primas ma serbit unu passu in prus.

Sa Sardigna si cuffirmat intre sas regiones prus attentas a sa conduida de s’arga. In su 2024 sa regorta differentziada est arrivada a su 76,5% e balet su terzu postu in Italia, in daesegus de Emilia Romagna e Veneto.

S’elementu,presentadu dae Legambiente in su mentres de s’Ecoforum de Casteddu, mustrat una situassione positiva.Intames si registrat una minimada pitticca de sos comunes prus virtudosos e de cussos chi resessint a arrivare a prezenias artas meda de regorta. In d’una parte manna de s’isula sunt oramai diffundidas abitudines bonas in s’isseperu de s’arga, signu chi in sos annos est bistadu fattu unu tribagliu importante dae sas amministratziones e sos tzittadinos. Sa regorta gianna pro gianna e un’attentzione prus manna a sos cumportamentos de donzi die ant dadu unu contribbudu pro mezorare sos risurtados.

A su mattessi tempus addurant ancora trempas de mezoramentu. Carchi tzentru no arribat a sos livellos prevedidos e sighint a faghere prus fatiga,comente Tattari, mancari siant arribande cambiamentos chi diant podere battire menzus resurtados giai in sos annos imbenientes. Intre sas tzittades printzipales si annoditant Aristanis e Nugoro, chi cuffirmant prezenias artas e organizassione bona de su servitziu, divenninde puntu de relata fintzas po sas atteras iscroccas.

Su cuadru chi bessit a pizu est cussu de una regione chi at fattu passos in daenantis importantes, ma chi non si podet permittere de si frimmare. Una parte de s’arga sighit difattis a no essere differentziada e custu pesat siat supra de s’ambiente chi supra sos costos pro sas comunidades. Sa bera porfia como no est solu mantennere sos risurtados segudados, ma los rendere prus pariviles in totta sa Sardigna. Bi sunt iscroccas chi andant bene meda e atteras chi addurant in daesegus: minimare custa differentzias at essere de fundamentu pro mezorare deabberu su sistema.

In giogu non bi est solu una prezenia, ma sa manera cun sa cale si abbidat a su tempus benidore. Mezorare sa derettura de s’arga cheret narrere de minimare su corpu supra de s’ambiente, ma fintzas fraigare comunidades prus scientes e responsabbiles. Est unu caminu chi dimandat continuidade e impignu e seperos craros, pro itte sos resurtados alcansados fintzas a como mustrant chi furriare est possibile, ma solu si si andat a daenantis chena si frimmare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22