Semper prus in artu in sa classìfica mundiale de is produtores prus premiados. Su màrchiu italianu San Giuliano, sede in S’Alighera in Sardigna, ocannu at iscaladu sa classifica de is mègius 10 arribbende a sa de ses positziones. A unu passu de su pòdiu de sa classìfica de is 100 mègius aziendas oleàrias a su mundu, cunservat dae su 2020 su primadu de mègius impresa italiana cun un’importante brìnchidu a in antis de su dae sa de binti positziones. Unu puntègiu chi contribuit a sa vitòria de s’Itàlia n sa classìfica dedicada a is natziones, acanta su tricolore est prus in artu de is banderas de s’Ispagna e de sa Grètzia.

Bene s’azienda e bene is ògios suos chi si sunt piatzados bene meda in is listas dedicadas a is diversas etichetas de sa domo italiana. Una vera regorta de prèmios.

Su reconnoschimentu importante est su frutu unu traballu de afinamentu de sa calidade longu acapiadu a dòpiu filu a sa faina costante de chirca in s’innovatzione de is protzessos produtivos. Atentzione totale: dae su campu a s’ampulla, non benit trascuradu perunu passàgiu.

Ddu ispiegat s’amministradore delegadu de s’oleifìtziu San Giuliano Pasquale Manca: “Persighire sa calidade pro mèdiu de s’innovatzione est sa punna printzipale nostra, est unu caminu chi nos impinnat in manera cuotidiana e chi non podet fàghere a mancu de sa sostenibilidade ambientale”. E subra de custu tema su dirigente at agiuntu: “Faghimus semper prus afidamentu a s’agricultura 4.0, in collaboratzione cun s’Universidade de Tàtari, a traessu de s’impreu de tècnicas de pretzisione chi permitent de minimare s’impatu ambientale e impreare is risursas disponìbiles in su modu prus efitziente possìbile, in prus, in manera reghente amus printzipiadu s’isperimentatzione de protzessos produtivos noos e de traballadura de avanguàrdia chi ant a pòdere garantire un’erupassu a in antis pro su chi pertocat is caraterìsticas chìmicu-fìsicas e organulèticas de is ògios nostros”. Prus natura, in ampulla. “Semus orgolliosos de su traballu nostru, de is resurtados otentos – concruit Pasquale Manca – e de èssere ambasciadores de su Made in Italy in su mundu”.

Sunt maicantos is prèmios internatzionales conchistados in in ùrtimos annos dae sa San Giuliano. In su 2021 ebbia sunt istados unos setanta is reconnoschimentos retzidos in is cuncursos prus importantes.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Coldiretti Casteddu, at fattu una proposta apprettosa a sos sindigos de sa Sardigna de su mesudie orientale: dimandare sa utta de calamidade naturale po cajone de s’assuttura grae meda chi est devastande s’iscrocca dae paritzos meses.

Custu appellu est bistadu fattu cun d’una littera mandada a sos primos tzittadinos de 25 Comunes de cussa zura, cun s’intentu de bischidare sas comunidades e alcansare unu accottu praticu. In sa littera mandata, su presidente e su direttore de Coldiretti Casteddu, Giorgio Demurtas e Luca Saba, evidentziant sa drammaticidade de sa situassione chi est imbrinucande sos massajos e sos pastores de sa regione.

Sa mancantzia de s’abba po parizzu tempus at cajonadu una crisi chi non tenet cabidianu, cun dannos mannos meda a sa laurantza e a sas attividades de allevamentu. Addaenantis a custa emergentzia, Coldiretti evidentziat s’importantzia de si interessare a sa lestra e cun detzisione, uninde sas fortzas cun sos sindigos de sos Comunes interessados, po apprettare sa Regione a declarare sa utta de calamidade naturale.

Sigundu Coldiretti, declarare sa utta de calamidade est necessariu po alcansare sos benes chi serbint a su sustentamentu de sas comunidades de sa campagna e sas attividades de produssione insoro, chi sunt bistadas accroppadas meda dae una crisi chi paret non dare asseliu. Sos massajos e sos pastores, chi sunt sos colondos de sas comunidades locales, sunt in d’una situassione critiga meda, cun meda problemas de colomia de oe e de cras.

In manera particularee, sa zura de sa Sardigna de su mesudie Orientale est bivinde una situassione critica, cun meda pastores chi teppent acomettare dannos dae s’assuttura e problemas po comporare sa provenda po cumpensare sa mancantzia de sos appassiadorzos. Custu at cajonadu cunseguentzias chi ant devastadu sos fatturados de sas dittas. Coldiretti, narat de tennere cunfiantza in sa sensibilidade de sos sindigos e dimandat una assione lestra meda dae parte de sas istitussiones po azzuare sas dittas in custa situassione drammatiga meda.

S’organissasione addurat disposta a dare sa collaboratzione sua a tottu sas amministrassiones chi anta a partetzipare po s’interessiu e su benessere de sas comunidades locales. Sos pensamentos po su motivu chi sa situassione potat diventare pius grae, sunt fundadas, tenende in cunsideru puru s’arriscu po sos cultivos de s’istiu e de s’attonzu, pustis de sas difficultades passadas in s’iberru e su beranu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22