Est morta Lina Wertmuller, prima fèmina in s’istòria a èssere candidada a s’Oscar comente sa mègius regista, pro su film Pasqualino Settebellezze, in sa tzerimònia de su 1977.

Sa regista est bènnida a mancare in sa domo sua de Roma a 93 annos.

In su 2020 aiat retzidu su Prèmiu Oscar a sa Carriera.

De orìgine aristocràticas e isvìtzeras, cojuada a s’iscenògrafu Enrico Job, Lina Wertmuller at signadu totu un’època tzinematogràfica.

Sa Sardigna la subenet prus che totu pro su famadu film “Travolti da un insolito destino nell’azzuro mare di agosto”, in ue is iscenàrios de su film sunt cussos de s’ìsula Nostra. Difatis su film fiat istadu giradu in su 1974 fatu de sa costa orientale sarda, in su golfu de Orosei in provìntzia de Nùgoro. Sa marina de s’isbarcu de is duos nàufragos est Cala Fuili, in su comunu de Durgali.

Sa marina de Cala Luna, tra su sartu su comunu de Durgali e su de Baunei, fiat istadu s’ambientatzione de una àtera bona parte de is ripresas. Su refùgiu de Carunchio e is iscenas prus sensuales fiant istadasgiradas in sas dunas de Capo Comino, localidade de su comunu de Thiniscole.

Mancari in su film pàrgiat chi is nàufragos siant in un’ùnica marina, in realidade custos areniles sunt a tesu paritzos chilòmetros unu de s’àteru. S’iscena finale de sa partèntzia de s’elicòteru imbetzes est ambientada in su portu de Arbatassa, in Oglastra, semper in provìntzia de Nùgoro.

Nos lassat un’artista manna, protagonista de su tzìnema internatzionale, chi at istimadu sa Sardigna e is Sardos, contribuende a fàghere connòschere in totu su mundu is bellesas de s’ìsula Nostra, a sa cale issa, prima dèmina regista candidada a s’Oscar, aiat bòlidu dedicare unu donu cando ddi fiat istadu assignadu s’importante Oscar onoràriu, meritadu prèmiu pro una carriera rica de resessidas e reconnoschimentos”. Gasi at naradu su su presidente de sa Regione Christian Solinas ammentat Lina Wertmuller.

Sa noa de sa morte sua est istada donada dae un’amigu de famìlia in is retes sotziales.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Carrelas serradas, proibbissiones de arressada e zuras de su tzentru off limits: Nuogoro si approntat a sa bisita de su Presidente de sa Repubblica.

Nugoro si approntat a accollire su Presidente de sa Repubblica Sergio Mattarella e lu faghet cun d’unu pianu de organizassione mannosu chi prenettat carrelas serradas, proibbissiones de arressada e paritzas zuras de su tzentru de sa tzittade off limits po garantire sicuresa e ordine pubbricu.

Su Capu de s’Istadu est isettadu in s’isula po sos chentu annos de su premiu Nobel de Grassia Deledda, affussione de balore istoricu e culturale istravanadu po sa Sardigna e in manera particulare pro Nugoro.

Su Presidente Mattarella at arribare in Nugoro po intzidire a sas tzelebrassiones uffitziales dedicadas a s’iscrittora nugoresa, unica femina italiana chi at binchidu su Nobel po sa Litteradura. Su programma de sa visita sua prenettat una arressada a su Teatru Eliseo, inube bi at essere unu mamentu istitutzionale tzentrale de sa zoronada, e prus a tardu una bisita a sa domo-museo de Grassia Deledda, logu frigura de sa memoria e s’identidade culturale de sa tzittade.

Isettande s’arrivu de su Capu de s’Istadu, su Comune at preparadu unu pregone chi cambiat sa passada in manera de signifficu. In sas oras prima e in su mentres de sa bisita, bi ant essere proibissiones de arressada in sas carrelas in sas cales at a colare su curteu presidentziale e in sas zuras accanta a su Teatru Eliseo e sa domo- museu. Carchi carrela de su tzentru at essere serrada a su traffigu po carchi mamentu, mentres atteras zuras dislindas ant essere serradas fintzas po sos chi andant a pe po permittere chi sos appuntamentos istitutzionale si pottant faghere in siguresa.

Affortigadas sa mesuras de siguresa cun s’interventu de sa Prefettura, Questura e de sa politzia. Si prenettant controllos,travessas e politzia in sas zuras diligas de sa tzittade. S’intentu est cussu de garantire una bisita sigura,allindande meda sas discumbenias po tzittadinos e mercaderis, chi sunt bistados informados dae tempus de sas modifficas de sa circulassione.

Sa presentzia de Sergio Mattarella est unu mamentu de braga manna pro Nugoro, chi si approntat a tzelebrare una de sas friguas suas prus e importantes. Sa tzittade bivet oras de isettu e fermentu: iscolas,assotzios culturales e istitutziones sunt interessadas a ordiminzare sos abbenimentos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22