Patrick Zaki est lìberu. S’istudiante egitzianu est istadu iscartzeradu dae su cummissariadu de Mansura a pustis de 22 meses de detentzione.

Essidu dae su cummissariadu, su giòvanu iscritu a s’Universidade de Bologna at naradu pagos faeddos in italianu: “Totu bene, fortza Bologna”.

Zaki duncas est lìberu, ma depet ispetare s’udièntzia sighente de su protzessu acanta est imputadu, fissada pro su primu de freàrgiu. “Bògio nàrrere gràtzias meda a is italianos, a Bologna, a s’Universidade, a is collegas mios, a totus is chi m’ant sustentadu”. “So isetende, apo a bìdere in is dies imbenientes ite sutzedet: bògio èssere in Itàlia cantu prima possìbile, comente apo a pòdere apo a andare diretamente a Bologna, sa tzitade mia, sa gente mia, s’universidade mia”. Dd’at naradu Patrick Zaki, alleghende cun is agèntzias de imprenta dae sa domo de famìlia a Mansura. “Immoe isto bene meda, so cuntentu, non m’ant ispiegadu chi fiant liberendemi, no ischia ite fiat capitende. So cun sa famìlia mia, s’isposa mia e sorre mia. So pregiadu de ddos pòdere torrare a bìdere. So cumprendende immoe ebbia su chi est sutzèdidu. Bògio ringratziare s’Itàlia, totu is partidos polìticos chi m’ant sustentadu, Bologna e s’universidade mia. Apo a torrare cantu prima possìbile, est domo mia. Gràtzias a Amnesty, a Riccardo Noury”. “Apo lèghidu meda in tzella, amo autores napuletanos e Ferrante” Patrick Zaki at riveladu de àere pòdidu lèghere meda in su càrtzere de Tora in ue est istadu inserradu pro belle 2 annos.

Una de is primas cosas chi Patrick Zaki at fatu no in pessu chi arribbadu a domo a pustis de èssere istadu scarcerato est istadu cussa de si pònnere una malliedda de s’Universidade de Bologna, chi s’ateneu dd’aiat fatu intregare.

Sa rete de is ativistas chi pro 22 meses s’est impinnada pro sa liberatzione sua at difùndidu una foto in ue Patrick bestit, orgolliosu, sa malliedda de s’universidade sua. Un’Ong egitziana a mangianu aiat annuntziadu chi su giòvanu istudiante fiat istadu leadu a s’istatzione de politzia de Mansura “pro cumpletare is protzeduras de iscartzeratzione”, at iscritu in unu tweet s’Eipr, s’Ong egitziana pro sa cale Patrick traballaiat comente chircadore. Comente est essidu dae su cummissariadu Patrick Zaki at imprassadu sa sorre.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

“Su Nenniri”, s’antigu connottu sardu chi abbisat sa Pasca.

Cun s’arribu de sa Pasca, in biddas meda de sa Sardigna torrat unu de sos connottos prus antigos e ammaghiantes de s’isula:”su Nenniri”. Si tratta de chimizones de ranu o atteros semenes creschidos a s’iscuru, chi affigurant sa torrada a bida e s’isperantzia, ligados a sos ritos de sa Chida Santa. S’ammanitzu incuminzat parizzas dies prima de Pasca, sos semenes benint postos a brotare in bottos pitticcos, a s’ispissu prattos o canisteddos,cuzigados e attesu dae sa lughe. In custa manera creschent fines,craros e delicados, leande unu colore giallu chisinathu tipicu meda.

Sa forma insoro chidrina e s’aera casi de “sufferentzia” crischiant comente iscromba su sacriffitziu e sa morte de Cristus. In su mentres de sa Chida Santa,”is nenniris” che benint leados in cresia e impittados pro adornare sas tumbas, sos artares pro su Giovia Santu. In carchi bidda benint postos cun contivizu particulare impare a frores,qandelas e pannos, creande bistas simples ma prenas de signifficu.Est unu zestu chi aunit fede e connottu populare, chi andat dae ingendra a ingendra.

In comunidades meda, mescamente in sas biddas prus pitticcas, s’ammaniada de sos nenniri est fintzas unu mamentu de cundivisione.A s’ispissu sunt sas feminas e sos bezzos a si nde occupare, impare cun zovanos, chi gai imparant su balore de custos ritos antigos. Custu connottu tenet raighinas attesu meda, mancari ligadas fintzas a ritos de sa laurantza prima de Cristu, chi tzelebraiant su cursu de sa natura e sa torrada a bida pustis de s’jerru.Cun su tempus, custos signifficos si sunt intritzados cun sa religione cristiana, dande vida a una cosa chi oe mustrat impare morte e torrada a bida.

“Su nenniri” non est solu unu elementu de decoradura, ma unu signu fungudu de sa cultura sarda. In d’unu mundu chi cambiat a sa lestra, custos connottos sighint a bivere gratzias a sa memoria de sas comunidades e a su disizu de no perdere sas raighinas insoro.Cun sa Pasca chi est accanta, cussos chimizones divennint gai unu nuntzu simple ma forte:pustis de donzi tempus buggiu, sa vida agatta semper sa manera de torrare a naschere.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22