Su Casteddu at paregiadu 0-0 in s’Istàdiu Bentegodi de Verona contra s’Hellas ghiada de s’allenadore croatu Tudor.

In unu campu difitzile comente cussu venetu est unu resurtadu importante pro ite pro sa prima borta sa porta de is sardos no at pigadu gol. Custa est su de tres parègios de sighidu pro is òmines de Mazzarri, ma sa vitòria mancat dae meda.

Tzertu est istada una partida istragosa, cun is casteddajos chi ant pensadu preus che àteru a difèndere, cun duas ocasiones de gol ebbia cun Simeone e cun Dawidowicz chi at corpidu unu palu.

Is sardos, gràtzias a custu resurtadu non sunt prus ùrtimos in classifica, cun 9 puntos in busciaca – a in antis de sa Salernitana a 8 puntos – e a s’Hellas Verona cun 20 puntos.

Is venetos ant cumandadu pro belle totu sa gara, ma is casteddajos sunt istados determinados a portare a domo su 0-0. Su protagonista mannu de sa giorronada est istadu su portieri ruju-blu Radunovic, chi at sarbadu su Casteddu una pariga de bortas. Una bia, cun una iscuta de pee de su giogadore iscalìgeru Barak at bogadu su gol dae a intru de sa rete. Naramus chi est istadu unu miràculu a beru.

Joao Pedro e Keita Balde ant proadu a nòghere a sa defensa veneta, ma sunt istados pagos perigulosos. Tzertu, pro is partidas benentes custa tàtica de ispetare is aversàrios no at andare bene, pro ite at a tocare a fàghere puntos pro pòdere abarrare in Sèrie A.

Custu 0-0 seguru at premiadu sa tàtica de is casteddajos, ma diat èssere bastadu unu gol pro pèrdere totu su traballu fatu in sa partida.

Is tifosos ruju-blu non sunt cuntentos meda de comente est gioghende s’iscuadra de Mazzarri, pro ite diant bòlere chi is atacantes sardos esserent prus perigulosos.

Diat èssere bellu a bìdere Joao Pedro, a Keita Balde e a Pavoletti in paris contra su Torino, in sa partida benente chi s’at a giogare tra is muros amigos de s’Unipol Domus.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Regorta differentziada,Sardigna intre sas primas ma serbit unu passu in prus.

Sa Sardigna si cuffirmat intre sas regiones prus attentas a sa conduida de s’arga. In su 2024 sa regorta differentziada est arrivada a su 76,5% e balet su terzu postu in Italia, in daesegus de Emilia Romagna e Veneto.

S’elementu,presentadu dae Legambiente in su mentres de s’Ecoforum de Casteddu, mustrat una situassione positiva.Intames si registrat una minimada pitticca de sos comunes prus virtudosos e de cussos chi resessint a arrivare a prezenias artas meda de regorta. In d’una parte manna de s’isula sunt oramai diffundidas abitudines bonas in s’isseperu de s’arga, signu chi in sos annos est bistadu fattu unu tribagliu importante dae sas amministratziones e sos tzittadinos. Sa regorta gianna pro gianna e un’attentzione prus manna a sos cumportamentos de donzi die ant dadu unu contribbudu pro mezorare sos risurtados.

A su mattessi tempus addurant ancora trempas de mezoramentu. Carchi tzentru no arribat a sos livellos prevedidos e sighint a faghere prus fatiga,comente Tattari, mancari siant arribande cambiamentos chi diant podere battire menzus resurtados giai in sos annos imbenientes. Intre sas tzittades printzipales si annoditant Aristanis e Nugoro, chi cuffirmant prezenias artas e organizassione bona de su servitziu, divenninde puntu de relata fintzas po sas atteras iscroccas.

Su cuadru chi bessit a pizu est cussu de una regione chi at fattu passos in daenantis importantes, ma chi non si podet permittere de si frimmare. Una parte de s’arga sighit difattis a no essere differentziada e custu pesat siat supra de s’ambiente chi supra sos costos pro sas comunidades. Sa bera porfia como no est solu mantennere sos risurtados segudados, ma los rendere prus pariviles in totta sa Sardigna. Bi sunt iscroccas chi andant bene meda e atteras chi addurant in daesegus: minimare custa differentzias at essere de fundamentu pro mezorare deabberu su sistema.

In giogu non bi est solu una prezenia, ma sa manera cun sa cale si abbidat a su tempus benidore. Mezorare sa derettura de s’arga cheret narrere de minimare su corpu supra de s’ambiente, ma fintzas fraigare comunidades prus scientes e responsabbiles. Est unu caminu chi dimandat continuidade e impignu e seperos craros, pro itte sos resurtados alcansados fintzas a como mustrant chi furriare est possibile, ma solu si si andat a daenantis chena si frimmare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22