Unu gol de Pavoletti non bastat a su Casteddu pro bìnchere s’iscontru diretu pro sa sarvesa cun sa Salernitana.

In s’antìtzipu de chenàbura sero in s’Unipol Domus, nche pensat Bonazzoli a su 90′ a sarvare is campanos. Ruju-blu e granada lòmpent cuota 8 puntos, ma abarrant firmos a s’ùrtimu postu de sa classìfica.

In partèntzia Mazzarri torrat a su clàssicu suo 3-5-2 cun Dalbert e Bellanova esternos a totu fàscia e Joao Pedro e Keita a in antis.

Colantuono s’afidat a su tridente grae cumpostu dae Gondo, Djuric e Bonazzoli chi tenet fintzas su còmpitu de donare coddu a is tzentrocampistas movende•si tra is lìnias.

Su Casteddu atacat e su portieri campanu si superat parende su corpu de conca de Joao Pedro in prenu recùperu. De pònnere a notu solu una concrusione esagerada de Coulibaly prima de su dannu musculare chi custringhet Gondo a essire dae su campu: intro Zortea pro is granada, semper prus in apretu infermeria.

A inghitzu de sa ripresa creschet su ritmu de sa gara e fintzas sa pressione rossoblù. Mazzarri aprofitat de su momentu favorèvole e ponet a Pavoletti a su postu de s’infortunadu Dalbert, pro unu Casteddu chi atacant cun su tridente. Is sardos s’aprèsiant a su gol cun una concrusione de Marin e unu corpu de conca de Joao Pedro, ma su vantàgiu arribbat cun sa punta Pavoletti chi segat puntuale in su primu palu e a su 73′ ponet a palas de Belec unu tiru bassu pretzisu serbidu torra dae Joao Pedro.

Su Casteddu provat a gestire su resurtadu, cun sa Salernitana chi tenet pagas ideas. Epuru unu disatentzione ebbia però bastat a is meres de domo pro otènnere sa vitòria e duncas is tres puntos.

Cun unu passàgiu de Zortea in su segundu palu, Nandez s’ismèntigat de Bonazzoli chi iscudet a bolu a su 90′ e frigat a Cragno. Ruju-blu e granada conchistant unu puntu a peròmine chi però serbint a pagu pro sa classìfica.

Amargura de is tifosos de su Casteddu chi a fine gara cuntestant is giogadores serrados in is ispolliatojos, cun sa politzia pronta a interbènnere.

In sa gara imbeniente is òmines de Mazzarri ant a provare a balangiare is tres puntos in trasferta contra su Verona.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

S’iscola frantzesa de s’aggregamentu Nitting-Voyer-Hermelange, posta in sas campagnas prenas de espressione a costazzu de Sarrenbourg, Mosella, in sa parte norti orientale sa Frantza, at dae pagu tempus accollidu battoro istudiantes novos in su corpus de sos istudiantes. Ma bi est una particularidade chi non si podet creere: custos istudiantes non sut umanos, ma battoro berbeghes prenas de gratzia.

John Deere, Valeriane Deschamps, Phil Tondus e Marguerite Duprès, sunt sas berbeghes chi ant acciappidu logu in sas aulas de s’iscola, in d’una protesta prena de intriscu contra sas regulas chi amminettaiant sa serrada de classes cun d’unu numeru mancante de istudiantes.

Sa situassione fit critica: su ministeru de s’istrutzione frantzesu aiat istabilidu chi po mantennere funtzionante sa cuinta de s’iscola elementare in su mese de capidanni, sos tres comunes teppiant tennere a su nessi 98 iscrittos. Bell’e gai, su numero de sos istudiantes fit firmu a 94.

Po binchere custa porfia, su sindigu prenu de inzeniu e s’uffitziu iscolasticu ant dezisu de leare in prestitu battoro berbeghes dae unu gentile massaju de su logu. Donzi berbeghe est bistada trattada cun sa mattessi guera de un’istudiante beru: est bistada assinzada a issas una famiglia adottada, unu indiritzu e puru una data de naschida. Sos particulares sunt bistados controllados cun meda attentzione e sos dossier finidos sunt bistados
mandados a su Ministeru de s’istrutzione, cun s’azzudu e sa collaboratzione de s’uffitziu de su comune.

Ma pro itte berbeghes? Commente ispiegat Loic Firtion, presidente de s’assotziu de sos babbos e sas mamas,” a differentzia de sas berbeghes, sos pitzinnos non tepent essere trattados commente numeros”. Custa movida disabbuda at battidu unu nuntzu forte meda supra su bisonzu de trattare sos istudiantes cun sentidu chi benit dae intro e individualidade, imbetzes chi los relegare a tzifras simples in d’unu fozu de calculu.

S’accollidura riservada a sas berbeghes dae parte de sos istudiantes beros est bistada carda meda e prena de ispiritu. Sos cumpanzos de classe ant preparadu cartellos de benennidu e ant creadu unu chintu pitticcu fora de s’iscola, in manera chi sas berbeghes poderent passare su tempus insoro in trancuillidade cando fint in iscola.

Custa protesta disabbuda , non solu at postu s’attentzione supra sa situassione critica de sas iscolas de campagna, ma at puru promovidu unu nuntzu de incluisione e rispettu po donzi membru de sa comunidade iscolastica, umanu o animale chi siat.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22