Su Casteddu de Walter Mazzarri otenent unu bonu parègiu in trasferta in domo de su Sassuolo, recuperende pro duas bias su vantàgiu de is meres de domo.

Sa prima parte de giogu est firmada dae Scamacca e dae Keita chi esaltant is tifosos sardos signende una rete cun unu tiru a farrancas in s’àera.

In su segundu tempus s’àrbitru Baroni donat unu rigore a cada iscuadra: Frattesi conchistat su primu e càusat su segundu. Berardi e Joao Pedro trasformant sena problemas dae is 11 metros, portende su resurtadu finale a 2-2.

Custu puntu faghet lòmpere su Sasssuolo a 15 puntos e donat un’atzinnicada fintzas sa classìfica de su Casteddu, chi a pustis de bator partidas pèrdidas de fila de pare colat dae 6 a 7 puntos in classìfica.

A su cumentzu su protagonista est su Sassuolo: sa prima atzione perigulosa de sa partida dda pròvocat Frattesi, chi impinnat Cragno a su 6′, ma s’ocasione prus bella càpitat a Scamacca, chi ses minutos a pustis faddit dae una positzione bona meda.

Su Casteddu s’aprèsiat a su vantàgiu a su 28′ cun una furriada in s’àera de Bellanova respinta però dae Consigli chi pagu a pustis parat finta unu corpu de conca de Ceppitelli. Sa partida s’isblocat a su 37′, cando Scamacca istampat sa difesa istràngia gràtzias a unu passàgiu de Berardi e iscudet sa botza a palas de Cragno: est 1-0.

Is meres de domo non faghent mancu a tempus a festare chi tres minutos a pustis de sa rete de s’avantàgiu Nandez e Keita marcant su parègiu: tiru a su tzentru e bortulada ispantosa chi lompet pagu a suta de sa traversa, portende su resurtadu a 1-1

A su cumintzu de su segundu tempus su Sassuolo cun Berardi befat s’ùrtimu difensore istràngiu, marchende su 2-1 cun unu rigore assignadu dae Baroni a pustis de una ligeresa de Lykogiannis in àrea a dannu de Frattesi.

Est etotu custu, in s’àtera parte de su campu, a corpire a Joao Pedro su tantu chi bastat pro aparisare su contu de is penalidades: dae is ùndighi metros su brasilianu no isbàlliat e gasi su Casteddu agatat pro sa segunda bia su parègiu a pagos minutos a pustis de su gol deretu. A pustis de su 2-2 sa partida s’allughet, Traoré isfiorat su tris in favore is meres de domo, ma su tiru benit firmadu dae Lykogiannis chi posca atzutzuddat cun Berardi.

S’intradu nou Defrel provat sa fortuna dae largu cun una concrusione balente chi però non preòcupat a Cragno. In s’àtera parte de su campu Consigli puru si faghet agatare prontu a parare su tiru deviadu iscutu dae Nandez. Mancari is medas càmbios a s’agabbu de sa partida su resurtadu si firmat a su 2-2, decretende su parègiu tra Dionisi e Mazzarri.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Carbònia, su Museo de su Carbone: unu viazu in sos tempos de sa memòria de su Sulcis de sas minas.

In su corizone de Carbònia, a intro de sa ‘idditzola de de Serbariu, b’at a dies de oe unu de sos museos pius de importu de sa Sardigna. Est su Museo de su Carbone, chi est dedicadu a s’istoria de sas minas. Est unu logu chi nos contat non solu s’istoria de cussu logu, ma fintzas sa vida de òmines e fèminas chi po annos e annos ant triballiadu in cussas minas.

Serbariu, inube si triballiaiat dae su 1937 a su 1964, fuit comente una funtana de abba semper bundante, inube sa zente si nche catzaiat su sìdiu de su tribàlliu. Est cussu su logu chi at batidu dinare meda a sa zona, ma puru energia manna a totu s’Itàlia. Su carbone de cussas minas, infatis, daiat tribàlliu a sas fàbricas, a sas tzentrales e a sas ferrovias, diveninde motore de modernizatzione industriale de totu sa natzione nostra.

Addaghi ant serradu sas minas, cussos logos pariat chi nos nche los depimus ismentigare, ca pariat chi non b’aperat abbarradu pius nudda. Invetze, b’ant fatu unu prozetu de recùperu e de valorizatzione manna, dande vida noa a totu cussos logos, chi sunt divènnidos unu museo chi, ancora a dies de oe, betat a pare sa memòria istòrica, sa didatica e sa capatzidade de divulgatzione.

Po chie andat a bìere custu museo, b’at paritzos zassos de visitare. B’est sa lampisteria, chi est su logu inube b’at una mostra chi est aberta totu s’annu e chi nos contat s’istòria de su carbone, de sa mina e de sos caragolos suos,ma puru de sa ‘idda de Carbònia, nàschida in su 1938 po retzire sas famìlias de sos triballiantes. Incue b’at unu muntone de làmpanas antigas chi si impreaiant in sas minas, ma b’at fintzas trastes e documentos, filmigheddos de sos tempos de tando fatos a sos triballiantes e puru intervistas fatas addaghi sa mina fuit zai serrada.

B’at puru fotografias meda de una bellesa rara. In custos caragolos e percolos chi nos permitint de atraessare sa mina, si podent bìere totu sos logos chi cada die sos minadores pupulaiant addaghi andaiant a triballiare. In sa sala Argani bi sunt poi totu sas màchinas chi permitiant su tribàlliu a tempos de tando.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22