S’Itàlia deludet a Belfast: parègiat 0-0 contra s’Irlanda de su Nord.

Fiat sa serada detzisiva, sa partida chi tocaiat a bìnchere a mala bògia pro si cualificare a su Mundiale in Qatar e evitare duncas su bisu malu de s’isparègiu.

Ma imbetzes cussu bisu malu s’est averiguadu a beru. Is asulos non sunt resèssidos a isprantzare su muru de sa difesa pesadu dae is meres de domo: Insigne, Chiesa e Berardi nche ant proadu, ma non sunt istados pretzisos in is tiros e ant tentu peri pagu fortuna.

In s’àtera partida de su girone s’Isvìtzera comintzaiat a madurare sa vitòria finale de 4-0 e gasi fintzas una sensatzione de discunfiantza at cumintzadu a s’ingendrare tra is pitzocos de su cummissàriu tècnicu Mancini, chi però sunt arrèndidos solu cando s’àrbitru a surbiadu s’agabbu de sa partida. A pustis de àere pèrdidu su primu postu in su grupu C e duncas sa cualificatzione direta, immoe s’ùnicu caminu pro is Mundiales abarrat cussu de s’isparègiu: s’Itàlia at a connòschere is aversàrios imbenientes a fine mese cun su sortègiu de su 26 de onniasantu.

Primu tempus: partèntzia potente de s’Itàlia, is Asulos provant in deretura a pigare su controllu de su campu. Is irlandesos, però, torrant a mòvere in controtacu e Tonali ispendet su cartellinu grogu pro evitare dannos peus. Cun su colare de is minutos s’Itàlia sighit a apretare is aversàrios, ma pagas bias lompet a su tiru. Sa mègius ocasione arribbat a su 37′ cando Insigne resesset a si fichire in mesu a s’àrea aversària cun sa botza in su pee, ma in su prus bellu si dd’allongat tropu e su tiru a efetu finale non imbrollat a Peacock-Farrell. Is Asulos serrant sa primu parte de sa partida dominende su giogu, ma sena gol.

Segundu tempus: S’Irlanda de su Nord non s’acuntentat prus de defensare su parègiu e cumentzat a èssere perigulosa meda a su 50′ cun Saville: s’istamborrada tzentrale benit firmada dae Donnarumma, chi èvitat su 1-0. Chiesa nche proat cun su mancosu suo, ma pecat de pretzisione. S’Isvìtzera raddòpiat contra sa Bulgaria e Mancini torrat a mutire in banchita a Barella, a Insigne e a Jorginho e s’afidat a Belotti, a Bernardeschi e a Locatelli. Peri is Campioni de Europa in càrriga arriscant de si fàghere befare in su finale, in un’essida oras de àrea de Donnarumma chi at mancat sa botza, ma bravu Bonucci a sarvare in sa lìnia de sa porta unu gol chi fiat giai fatu.

Su Cummissàrio Tècnicu, Roberto Mancini, lassat su campu a coddos calados e delusu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Sardigna, su benèssere est sutta de sa mèdia natzionale: serbit unu cambiu de derettura supra salude e istrussione.

Sa Sardigna si acciappat oe in d’una posissione cumplicada po cantu pertocat su benèssere de sos tzittadinos suos. Lu evidentziat s’ISTAT po mesu de s’indittu BesT, chi controllat sas bistas divressas de sa calidade de sa vida in sas provintzias italianas. S’isula non segudat sos livellos medios natzionales, mancari bincat medas bortas cussos de su Mesudie. Intamen, sos datos iscopiant chi custa superioresa, mancari pitticca non podet faghere drommire sonnos pasidos: serbint interventos lestros e mirados, mescamente in sos campos de sa salude e de s’istrussione.

Su disvariu internu de s’iscrocca de sa Sardigna est evidente. Casteddu si annoditat po una condissione sotzio-accolomica de su tottu pius de favore, mentres sa provintzia de su Sud-Sardigna mustrat signales pius mannos de difficultade. Inoghe su benèssere est cuncentradu mescamente in calicuna zura allindada.

Sas difficultades pius graes bessint a fora in duos campos de fundamentu: sa salude e s’istrussione. Po sa sanidade, sa Sardigna presentat indittos chi anneant meda ligados a sa calidade de sa vida e sa cura de sas pessones. Galu pius assustante est sa situassione iscolastica e de sa formatzione. Una parte manna de sa populatzione de edade arta non tenet unu titulu de istudiu prus mannu, e sas cumpetentzias de base de sos istudiantes sunt meda pius bassas in cunfrontu a sa medìa italiana.

Fintas su reddidu de sas familias sardas reflettit una condissione accolomica debbile, mancari adduret menzus de atteras regiones de su Mesudie. Sos disvarios internos, bell’e gai, sunt marcados. Fintzas inube su reddidu medìu paret pius artu, s’ispartidura est divressa: pagos balanzant meda, mentres una arte manna de sa populatzione fadigat a arribbare a sa fine de su mese. Mancari custu cuadru tanadu, carchi signale positivu arribat dae sos campos de sa sicuresa e de s’ambiente.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22