Una fèmina de 82 annos residente in provìntzia de Ancona si diat èssere fuida a Panama, paris cun su fìgiu de 60 annos, a pustis de s’àere betadu a busciaca 75 mìgia èuros de pensione de su maridu mortu.

Segundu sa Procura de Ancona, chi at abertu un’inchiesta a pustis de sa denùntzia de s’Inps, totus e is duos diant àere omìtidu de registrare sa morte de s’òmine, poderende•si de 14 mensilidades e mesu non dèpidas. Como arriscant de èssere protzessados pro trufa a dannu de s’Istadu.

A dolu mannu unu fatu sìmile no est sa prima bia chi càpitat: su parente morit ma sa famìlia detzidet de non comunicare su detzessu a s’Inps pro sighire a incassare sa pensione.

Custa borta is protagonistas, agatados in sofata detzident de si fuire a Tzentru Amèrica, a Pànama pro èssere pretzisos. Sa viuda, oe 82 annos, originària de Morrovalle e residente in Vallesina, in provìntzia de Ancona, arriscat de èssere posta suta protzessu pro trufa a dannu de s’Istadu in cuncursu cun su fìgiu de 60 annos.

Una pensione de prus de 5.000 èuros a su mese – Ambos difatis, segundu sa Procura de Ancona, chi at abertu unu fascìculu a pustis de una denùntzia fata dae s’ente previdentziale, diant àere omìtidu de assentare sa morte de su parente poderende•si de 14 mensilidades e mesu de sa pensione.

Mama e fìgiu oe non sunt prus in Itàlia: betados a busciaca belle 75 mìgia èuros, si diant èssere fuidos a Pànama. Sa fèmina est devènnida viuda in su mese làmpadas de su 2013. Su maridu fiat titulare de duas pensiones, una de traballu chi ddi garantiat pagu prus de 4.700 èuros a su mese e una pro invalididade tzivile de 508 èuros a su mese.

Su dinare, prus de 5.000 èuros a su mese, arribbaiat puntuale, in su contu currente chi s’òmine cumpartziat cun sa fèmina, in un’ufìtziu postale de Jesi. A pustis de s’abertura de su fascìsculu sa Procura at pedidu su protzessu pro totu e is duos, sa prima udièntzia però est agabbada in pagos minutos sende chi sa gup, Francesca De Palma, at rinviadu totu a su 21 de freàrgiu pro dare modu a s’Interpol de notificare is atos a is imputados, sende chi finas a oe non ddoe at provas chi siant in connoschimentu de unu protzedimentu a càrrigu issoro.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Nùgoro, ghia de su limbàzu incluisivu in s’amministratzione pùbbriga

Nùgoro faghet unu passu istòrigu cara a s’inclusione e a sa paridade: sa Provìntzia de Nùgoro est divènnida su primu ènte pùbbrigu de sa Sardigna a adotare in manera formale s’impreu de su limbàzu de zenia incluisivu in sas normas e sos regolamentos internos suos.

Sa detzisione, approada a s’unanimidade dae su Cunsìzzu provintziale subra propòsta de sa cunsizzera Lisetta Bidoni e cun s’accotzu de su presidente Giuseppe Ciccolini, punnat a prettare discriminatziones grammatigas e culturales, donande prus visibilidade e reconnoschimentu non solu a sas fèminas, ma fintzas a sas personas LGBTIQ+ e a sas identidades de zenia non cufformes a su binàrismu de su connottu.

S’approatzione de sas normas e de su regolamentu cun limbàzu incluisivu est solu su primu passu: sa Provìntzia at annuntziadu chi s’intentu imbeniente est a ispainare s’impreu de su limbàzu de zenia a totu sos atos amministrativos e a sas comunicatziones istituzionales uffitziales. S’impreu de unu limbàzu incluisivu no est solu simbòligu: refletit e influentzat sas relatziones sotziales, sos appitzigos de podere e sas bogadas a campu in intro de una comunidade, dande unu contribbudu a minimare eleghias e prevensiones cuadas e a favoressere prus sensibilidade culturale e respetu pare-pare.

Cun custa iniziativa, Nùgoro si ponet commente abberipista in Sardigna e fortzis unu mòdellu de sighire pro àteros comunos e provìntzias italianas chi cherent sighire polìticas de sa limba e comunicativas incluisivas.

Est a bìdere comente s’adossione operativa s’at a tradùere in sos atos amministrativos benidores e in sa comunicatzione de donzi die cun sa tzittadinàntzia, ma sa mustra rapresentat unu sinnu beru de atentzione cara a sa diversidade e identidade istituzionale in una iscrocca in ue temas de zenia, deretos tziviles e incluisione sunt in su tzentru de meda de sas chistiones sotziales de oe.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”