Rossana est unu robot assistente de biblioteca capatzu de interagire cun is bisitadores averiguende sa disponibilidade de is libros rechestos e acumpangende is impitadores a is parastàgios acanta sunt collocados.

Presentada is dies coladas in Casteddu, Rossana at leadu su nùmene de s’acrònimu de su sistema operativu Ros – Robot operating system -, e est su primu robot antropomorfu de su Crs4, su Tzentru de chirca de su Parcu sientìficu e tecnològicu de sa Sardigna, isvilupadu in collaboratzione cun Athlos, azienda ispetzializada in intelligèntzia artifitziale e interatzione tra òmine e màchina.

Su màrchiu ‘Rossana’ est istadu depositadu pro identificare s’hardware, is cumponentes fìsicos e su software de movimentu de su robot. In custu progetu, s’azienda at ativadu unu sistema cunversatzionale avantzadu realizadu a posta pro su robot, cun unu ‘cherbeddu’ chi est a tretu de cumprèndere, allegare, subènnere e de imparare. In prus, gràtzias a una memòria esperientziale basada subra su reconnoschimentu visivu de is ddi chistionant, podet gestire arresonos personalizados.  Su robot est ispetzializadu comente un’assistente bibliotecàriu chi donat inditos subra is libros e subra is autores presentes, e prus in generale subra àteros autores e volùmenes. Sa màchina si prestat a àteras isperimentatziones e tenet potentzialidades mannas de isvilupu in pro su chi pertocat s’interatzione cun s’ambiente esternu.

Massimo Deriu, tecnòlogu de su CRS4, paris cun is giòvanos collegas Federico Bachis e Marco Massa, est su chi at presentadu dimanda de brevetu de su sistema de navigatzione “a su serradu” chi permitit a su robot de si mòvere in intro de un’ispàtziu fìsicu limitadu.

Su protòtipu est su resurtadu finale de su progetu cramadu “Robotika”, finantziadu dae Sardegna Ricerche cun 300.000 èuros, chi previdiat s’isvilupu de unu protòtipu de robot fìsicu cunversatzionale. S’isperimentatzione, fata belle totu durante su segundu acorru causadu dae sa pandemia, est istada portada a in antis in is laboratòrios de su CRS4, cuncordados pro s’ocasione comente chi èsserent is aposentos de una biblioteca.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Lunis 27 de maju, Elmas at accasazzare sa mustra “5Chentu bortas Chentu”, unu accadessimentu chi promittit de essere una emossionante e unica tzelebrassione de sa vida longa sarda. S’addobiu est in su Teatru Comunale Maria Carta, cumintzande dae sas 18.00. Inoche ant essere esponnidas 500 fotograffias, fruttu de su tribagliu de medas annos de su connoschidu “Fotograffu de sos chentenarzos”, Pierino Vargiu.

Pierino Vargiu, paris cun sa muzzere Angela Mereu, at dedicadu annos a viazzare po tottu s’isula, acciappande cun sa macchina fotograffica sua sas caras e sas istorias de sos pius betzos abitantes de sa Sardigna. Custas fotograffias, non solu documentant sa betzesa chi non si podet creere de sas personas, ma apparant puru un’intima mirada supra sa vida, sa cultura e sas traditziones chi annodittant custa regione.

Sa mustra at essere un’occasione po si affundare in custu ammaghiante biazzu visivu in su tempus, gratzias a sas figuras chi contant sa vida e sas esperientzias de pessonas chi sunt arrivadas e ant passadu su accabbu de sos chentu annos. S’accadessimentu no at essere solu una simple apparada fotograffica, ma puru un’occasione po iscurtare istorias e cosas curiosas derettu dae sos attores e dae sas pessonas chi ant tribagliadu accanta a issos.

S’addobiu de su 27 de maju, at essere medradu dae s’iscrittora Alessandra Sorcinelli, chi at a ghiare sos presentes in mesu a custa istravanada abbentura, contande sas esperientzias e sas porfias accomettadas dae Pierino Vargiu e Angela Mereu in sos biazzos insoro e de sas accorradas fotografficas. Sorcinelli cun sa sensibilidade e cumpetentzia sua, at ischire dare attera fundaria e cuntestu a sas figuras apparadas, arrendinde sa serana puru pius ammaghiante e de signifficu.

In pius, sa mustra “5chentu bortas Chentu” est unu donu non solu a sos suggettos retrattos, ma puru a s’iscansabbile tribagliu de Vargiu e Mereu, chi cun passione e dedissione ant datu unu contribbudu po preservare e balorizzare sa memoria istorica e culturale de sa Sardigna. Sas fotograffias esponnidas non sunt simple ritrattos, ma beros e proprios contos chi si bient e trasmittini emossiones sapiesa e bellesa de sa vida.

Custa apparada est duncas un’occasione chi non si podet perdere po chie cherzat connoschere pius dae accurzu s’ammaghiante fenomenu de sa bezzesa sarda, po mesu de sos oggios de chie at ischidu collire e eternare s’essentzia de custas istravanadas bidas chentenarzas. Non bos perdides s’occasione de partetzipare a custu abbenimentu unicu e de bos dassare incantare dae sas istorias e dae sas caras chi ant fattu s’istoria de sa Sardigna.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22