A pustis de is ùrtimas partèntzias de is naves de sa Tirrenia de is chidas coladas, s’est agatada una solutzione pro sa continuidade marìtima de s’ Ìsula. Difattis dae su 23 de cabudanni torrant a partire is traghetos.

Dae s’assessoradu regionale de is Trasportos sunt lòmpidas ambasciadas de satisfatzione, comente cando s’est resèssidu a sarbare dae su 15 de ladàmine is bolos pro sa continuidade aèrea.

Difatis su Ministeru de is infrastruturas e de sa mobilidade sostenìbile – MiMS – at intregadu sa trata marìtima Civitavecchia-Casteddu-Arbatassa a sa cumpangia Grimaldi. Duncas torrat a funtzionare sa lìnia de su mare istituida unu sèculu a oe. A ddu fàghere ischire est istada sa Grimaldi cun una nota ufitziale.

Pro bona sorte sa Grimaldi, chi gestit sa lìnia Casteddu-Napoli-Palermo, at detzisu de estèndere su tràficu suo in sa rota cara a Civitavecchia.

Pro immoe sunt prevìdidas partèntzias dae Civitavecchia pro Casteddu ogni martis, giòbia e sàbudu a is oto de sero, e dae Casteddu a Civitavecchia ogni lunis, mèrcuris e su chenàbura semper a is oto de sero.

Sa trata includet oartèntzias dae su portu de Arbatassa ogni martis e giòbia a is duas de note pro Civitavecchia, imbetzes mèrcuris e domìniga a is ses de mangianu pro Casteddu.

Sa trata marìtima Civitavecchia-Casteddu-Arbatassa intregada a sa cumpangia Grimaldi, previdit su servìtziu de is traghetos pro ses meses, isetende su bandu nou pro chimbe annos, comente at naradu su ministru Enrico Giovannini a sa Càmera de is deputados.

Su traghetu Catania at a èssere impreadu pro torrare a collegare sa lìnea marìtima sarda, at a pòdere iscolletare prus de 2200 metros lineares de mezos a rodas – veturas, autocarros, furgones e articulados – e 955 passegeris. Pro custos sunt a disponimentu 93 cabinas de diversu tipu.

Duncas su guvernu de s’Itàlia at postu fine a su grandu discumbèniu pro is sardos, chi ant bidu torra non rispetadu su deretu issoro a sa mobilidade.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

S’artèfitze de sa sarvesa insperata de su Casteddu est istadu esoneradu.

S’allenadore toscanu, Leonardo Semplici, est istadu bogadu dae sa ghia tècnica de s’iscuadra a pustis de àere fatu unu puntu ebbia in is primas tres dies de campionadu.

S’allenadore chi s’annu coladu aiat sostituidu a Eusebio De Francesco, pagat sa derrota in domo contra su Genoa, a pustis de èssere istadu in vantàgiu pro duos a zero finas a su 60’ e posca èssere istadu sorpassadu pro 2-3 in su finale.

Sa sotziedade no at cunsideradu is medas ausèntzias tra is giogadores de su Casteddu e su fatu chi Semplici no apat tentu mai totu is giogadores a disponimentu, comente sutaliniadu in su post iscritu in serada dae s’oramai ex allenadore.

Ma Semplici s’est dimustradu unu sennore, narende·si orgolliosu de àere rapresentadu su Casteddu e sa terra sarda. Immoe est ufitziale Walter Mazzarri, allenadore nou de su Casteddu. Su tècnicu ex Napoli, Inter e Torinu at firmadu unu cuntratu cun sa sotziedade finas a su 30 de làmpadas 2024.

Cun issu arribbant su vitze allenadore Claudio Bellucci, su preparadore atlèticu Giuseppe Pondrelli, su collaboradore tècnicu Claudio Nitti e s’analista de giogu Cristian Guerrini. Su cuntratu– segundu is primas informatziones ufitziosas – partit dae unu millione de èuros a istajone. Mazzarri, arribbadu a mangianu in su capulogu sardu, no at fatu decraratziones a is cronistas in s’aeroportu.

S’est limitadu a nàrrere chi at a faeddare prima de Làtziu-Casteddu, trasferta difìtzile meda, in prus chi connoschet sa mentalidade de is sardos e ant a contare is fatos, non is faeddos Custu merie at a dirìgere su primu allenamentu.

Pro issu una torrada in Sardigna, bidu chi cun is ruju-blu at esordidu in Sèrie A in su 1982, in s’ùrtimu cuartu de ora in una gara in domo contra s’Inter. Pro issu a fine carriera in su ’93-’94 un’istajone cun sa Torres in Sèrie C2.

Sa sotziedade de su presidente Tommaso Giulini, at iscritu chi is caraterìsticas de su diretore tècnicu nou sunt: giogu propositivu, ardera e carisma.

S’isperat chi custas calidades bèngiant postas in pràtica, is àteras iscuadras no ant a istare a pompiare.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22