Mancari in medas territòrios comunales siat torrada sa mascheredda obligatòria fintzas a s’abertu, sa Sardigna est abarrada in zona bianca.

S’arriscu fiat cussu de acabbare in sa zona groga, in cunsighèntzia de s’evolutzione de su Covid-19. De seguru abarrat cuadru chi donat pensamentu chi in is chidas imbenientes diat pòdere portare a s’adotzione de unos cantos provedimentos. Ma pro s’ora sa regione sarda s’est torra sarbada.

Però a apensamentare est su mundu de s’iscola, difatis mancant prus pagu de tres chidas a su cumintzu de s’annu iscolàsticu in Sardigna. Su primu problema s’at a bìdere su 1 de cabudanni, cando mìgias de dotzentes ant a andare a iscola pro pigare servìtziu.

Difatis custa protzedura andat fata in presèntzia. Est sa lege chi faeddat craru: serbit o sa tzertificatzione birde o su tampone, e giai sunt cumentzende a nàschere is primas chistiones. Ma totu custos problemas s’ant a presentare in cussas dies.

Pro immoe preòcupat meda s’aumentu continu de is contagiados noos e fintzas sa crèschida de s’ìnditze de mortalidade. In su matessi tempus tocat a signalare sa crèschida de is malàidos ricoverados in terapia intensiva e in is repartos de àrea mèdica. Ma at a podere fàghere sa diferèntzia s’aumentu de is postos a dispositzione pro is contagiados.

Comente amus naradu in in chidas coladas, at a serbire a andare a in antis is vatzinatziones cun s’obietivu de immunizatzione de s’80% de sa populatzione de s’Ìsula pro sa fine de su mese ch’intrat.

In medas zonas de Sardigna sunt puntende de fàghere cantos prus vatzinos possìbiles a is pitzocos tra is 12 e 18 annos cun s’abertura de tzentros vatzinales in oràrios dedicados a custa categoria. Custos puntos de somministraizione, chi si narant “open day” e “open night”, est a nàrrere “abertura a de die e a de note”, sunt semper prenos de gente meda e donant ispera bona pro s’andamentu de sa campagna vatzianale.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

In su Meilogu, in su pranu de Capu Abbas chi est istada numenada sa “Badde de is Nuraghes” in su XX seculu – pro sa presèntzia de trinta nuraghes e deghe tumbas de gigante – semus andados a bisitare su Nuraghe de Santu Antine, in su sartu de Turalva.

Custa est s’istrutura prus imponente de sa zona, una prenda de s’architetura ispantosa a beru, chi faghet cumprèndere s’arte fraigadora balente de su populu nuràgicu.

Su Nuraghe de Santu Antine, connotu puru comente sa Domu de su Re, est fraigada cun rocas de pedra niedda traballadas e est artu 17 metros.

Ph: Roberto Anedda

Custu casteddu-fortalesa chi dòminat totu sa badde, est costituidu a su tzentru dae una turre de tres pianos, cun diàmetru de 15 metros, e a inghìriu ddeo est unu bastione de ghetu triangulare cun àteras tres turres.

Ph: Roberto Anedda

Su turrione est istadu fraigadu in su 1800 a.C. e a pustis in su 1600 a.C. sunt istadas pesadas is àteras istruturas. In is tempos colados antigos su Nuraghe de Santu Antine fiat galu prus mannu, sa turre tzentrale fiat arta casi 25 metros. Is passadissos e is iscalas cunservant galu s’amaju: sunt ispantosos pro sa mannària e sa bellesa ùnica.

Ph: Roberto Anedda

Nois chi amus tentu sa sorte de ddoe intrare a intro, nos semus intesos piticos e incantados comente chi esseremus corpidos dae sa sìndrome de Stendhal.

A parte de foras de su fortalesa ddoe est su chi abbarat de unu biddighedda cun 14 pinnetos, chi est istada travigada fintzas a su tempus de is antigos romanos.

Ph: Roberto Anedda

De is pinnetos, su prus importante est s’aposentu de sa s’acorru, in ue sunt istados agatados is “panes” de brunzu, chi immoe sunt allogados e in mustra a su Museu Sanna de Tàtari. Is àteros repertos si podent amirare in su Museu de sa Badde de is Nuraghes de Turalva.

Ph: Roberto Anedda

Pro lòmpere a custu logu bastat a pigare s’istrada statale 131 puru e pustis una pariga de chilòmetru dae su cartellu pro su Nuraghe, lassadu su caminu prus mannu de Sardigna, semus arribados.

Pro cussos chi no ant bidu custos logos amus detzisu de pònnere calicunu vìdeu e unas cantas fotografias.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22