In Sardigna custu coa de chida torrat s’antitziclone “Lucifero”

Responsàbile de s’undada de calore in is dies coladas at a torrare a interessare s’ìsula nostra, cun sa chi at a devènnere sa prus caente de Itàlia.

Difatis is temperaduras in is zonas internas meridionales ant a lòmpere a 37 grados. Belle in totu s’Itàlia su termòmetru che at a isciaddire is 34 grados: s’andat dae is 36 de s’Emilia a is 35 de unas cantas zonas de su Vènetu, de sa Lombardia, de sa Pùglia, de sa Sitzìlia e de sa Basilicata.

Custa bia però s’antitziclone at a durare prus pagu. A su mancu in su Nord, acanta dae lunis s’arribu de abba prus frisca at a favorire temporadas mannas, chi a pustis de martis ant a corpire fintzas Marche e Umbria.

In Sardigna a dolu mannu abarrat artu fintzas su perìgulu pro is fogos, a su mancu pro sa die de sàbadu 21 de austu. S’arriscu interessat fintzas sa zona de Casteddu. Sa Protetzione tzivile regionale at publicadu un’avisu de colore arantzu.

Ma comente rimediare a custa undada noa de calore? Chie at a pòdere s’at a chircare unu pagu de friscura in is localidades de mare.

In custa chida a pustis de Mesaustu s’est assistidu a una bera invasione de is marinas sardas dae banda de residentes e turistas.

Chie no at a pòdere andare a mare e at a èssere custrintu a s’abarrare in bidda o in tzitade, balent semper is matessi cussìgios: evitare de essire dae domo a forru de sole, bufare e papare fruta meda.

A totus si racumandat de tènnere cuidadu de is betzos e de is prus dèbiles, unu gestu piticu podet èssere fundamentale.

Si si biet unu fogu tocat a avèrtere deretu is autoridades cumpetentes. In medas ocasiones su fatore tempus est determinante a firmare unu fogu e limitare is disacatos.

Est galu biu su regordu de su fogu chi at brusiadu su Monteferru e unas cantas zonas de s’Aristanesu chi ant bisestradu sartos e aziendas agrìculas, pagu mancu de unu mese a oe. Duncas tocat a ammentare semper de donare cura e de collaborare totu paris a sa difesa de su patrimòniu ambientale nostru.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

S’isport natzionale prus mannu est pro torrare in su retàngulu birde: sa Sèrie A est pro torrare sàbadu su 21 de austu cun is antìtzipos de is garas de sa prima giorronada.

Is amantiosos de fùbalu ant a torrare a bìdere is iscuadras issoro a pustis de sa vitòria de s’Itàlia a is ùrtimos Europeos. Totus ant a tènnere galu in is ogros sa partida contra s’Inghilterra, chi at regaladu un’istade chi at a abarrare in s’istòria de s’isport, paris cun is Olimpìades de Tokyo.

Su campionadu chi est pro cumintzare, est unu torneu difitzile meda de intrepetare: prima de totu pro ite is iscuadras prus balentes ant cambiadu meda, e custa borta non is giogadores ebbia, ma puru is allenadores.

Bastat pensare a s’Inter, Campione de s’Itàlia, chi at saludadu prima su técnicu, Antonio Conte e a pustis su tertzinu, Achraf Hakimi, cun s’atacante prus forte de sa Rosa: Romelu Lukaku. Tzertu est lòmpidu s’allenadore Simone Inzaghi, su tzentru a in antis Edin Dzeko e àteros giogadores bonos, ma s’iscuadra est isdebilitada.

Sa Juventus cun sa torrada de Massimiliano Allegri fortzis est sa candidada nùmeru unu a bìnchere su campionadu, mancari no at fatu unu mercadu mannu pro pigare giogadores famados, ma Cristiano Ronaldo e Paulo Dybala chi sunt in bona cunditzione sunt sa còpia de atacantes prus forte de sa Sèrie A. Non tocat a s’ismentigare chi Giorgio Chiellini, Leonardo Bonucci e Federico Chiesa ant a torrare a falare in campu comente campiones de s’Europa.

Imbetzes su Milan, chi est abarradu cun s’allenadore de s’annu coladu, Stefano Pioli est un’iscuadra chi at cambiadu pedde, cun su portieri de sa natzionale asula, Gigio Donnarumma, e su tzentrucampista Hakan Calhanoglu partidos in àteros club, ma chi at a èssere semper ghiadu a in antis dae Zlatan Ibrahimovic. Su giogadore prus balente però immoe tenet un’annu in prus e sa salude de atleta no est comente cando fiat gióvanu.

Is àteras iscuadras chi ant a gherrare pro s’iscudetu ant a èssere: sa Roma allenada dae Josè Mourinho, sa Lazio ghiada dae Maurizio Sarri e su Napoli cun su tècnicu Luciano Spalletti. Totus òmines de fùbalu sàbios e abistos, cun is primos duos chi ant bìnchidu giai su campionadu italianu,

S’Atalanta de Gian Piero Gasperini diat a èssere sa surpresa pro lòmpere a sa vitòria de s’iscudetu, a pustis de is ùrtimos annos giogados bene a beru.

Amus a bìdere is caddos a sa lòmpia.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22