Sa Natzionale italiana at cungiadu su Girone A de is Europeos de fùbalu cun noe puntos, duncas a puntégiu prenu. Difatis is Asulos ant bìnchidu finta s’ùrtima partida contra su Galles cun su resurtadu de unu a zeru, gràtzias a su bellu gol de tacone de Pessina, serbidu in s’àrea aversària dae Verratti.

Custa bia s’allenadore Mancini at cambiadu sa formatzione titulare e at fatu intrare casi totu is giogadore chi non fiant galu falados in campu. Mancari custu cambiamentu s’iscuadra at giogadu bene, custrìnghende is gallesos a si cungiare in difesa. Tzertu, is aversàrios ant àpidu carchi ocasione mescamente cun su capitano Bale, ma non sunt renèssidos a marcare sa rete de su parègiu.

Custa Itàlia est cumentzende a fàghere timòria a is àteras natzionales favoridas a bìnchere is Europeos de ocannu. Medas espertos de fùbalu ant naradu faeddos de istima pro is Asulos, pro comente gherrant in ogna botza e pro comente sunt unidos tra issos.

Is agentzias de iscummissa puru ant declaradu sa natzionale asula sa segunda probàbile binchidora de is Europeos, fatu fatu a sa Frantza.

Immoe però tocat a pensare a is otavos de finale, in ue s’Itàlia at a agatare s’Àustria, lòmpida segunda in su Girone C – bìnchidu dae s’Olanda – e a in antis de s’Ucraina allenada dae is ex giogadores de su Milan, Shevchenko e Tassotti.

Is austrìacos sunt un’iscuadra de rispetare, pro ite sunt lestros e fortes in difesa, duncas mancari s’Itàlia in su paperi  siat prus forte meda, diat èssere mègius a non si fidare. Su giogadore prus importante pro s’Àustria est su tertzinu e capitanu Alaba, chi custa istade est istadu comporadu dae su Real Madrid a pustis de trèighi annos colados in su Bayern Monaco. Àteros giogadores chi tocat a tènnere in contu sunt su giòvunu tzentrucampista Baumgartner e s’ex atacante interista Arnautovic.

Amus a bìdere comente at a acabbare.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22