Su cantante Fedez at atacadu dae su palcu de su “Concertone” sa Lega e sa Rai e at pedidu un’interventu a su guvernu pro su setore de s’ispetàculu in forte crisi.

Su rapadore at criticadu meda sa Lega pro su ddl Zan, acusende•dda de omofobia e a pustis at acusadu sa Rai de àere pedidu in antìtzipu su testu de s’interventu suo.

Fedez: “Est sa prima bia chi mi sutzedet de dèvere imbiare su testu de un’interventu meu pro more chi bèngiat sutapostu a aprovatzione polìtica, aprovatzione chi in su primu momentu, a dolu mannu, no ddoe est istada, o mègius de is dirigentes de Raitre m’ant pedidu de cuare su nùmene de is partidos e de modificare su testu”.

“Apo dèvidu lutare unu pagheddu – at pretzisadu su cantante – ma a sa fine m’ant donadu su permissu de m’espressare in modu lìberu. Comente nos insegnat su Primu maju, in su piticu nostru devimus lutare pro is cosas importantes.”.

Su rapadore posca at fatu un’atacu grae contra sa Lega pro su ddl Zan – chi pigat su nùmene dae su deputadu Pd Alessandro Zan – sa lege contra s’omotransfobia, chi a pustis de chidas de chistiones e ostrutzionismu solu in sas dies coladas est istada calendarizada in Senadu.

Faeddos de fogu massimamentee contra su senadore leghista Andrea Ostellari, presidente de sa cummissione Giustìtzia – definidu “sonnigosu” -, acusadu in is dies coladas dae Alessandro Zan etotu de no èssere istadu super partes.

At afirmadu su cantante: “At detzìdidu chi unu disinnu de lege de initziativa parlamentare comente su Ddl Zan, giai aprovadu a sa Càmera, podet èssere blocadu dae sa gana de protagonismu de unu sìngulu, est a nàrrere issu etotu. In efeti Ostellari faghet parte de un’ischieramentu chi s’est distintu in is annos pro sa gherra sua contra s’agualidade.”.

S’artista fatu fatu at elencadu is frases iscandalosas pronuntziadas dae esponentes o candidados de sa Lega in passadu: “Si deo tennere unu fìgiu omosessuale ddu dia brusiare in su furru, omosessuales vìtimas de istrambesas de sa natura, is omosessuales sunt un’isciagura pro sa riprodutzione o su matrimòniu omosessuale caminu pro s’estintzione de sa ratza”.

Iscontru fintzas cun su capu de sa Lega Salvini, at ammentadu a Fedez de s’èssere espressadu in manera no oportuna dae su palcu de su “Concertone”, costadu mesu millione de èuros a is italianos e impreadu dae s’artista pro fàghere una parlata de manca. Pronta sa risposta de su rapadore chi at sunènnidu a su polìticu de s’èssere presentadu sena pedire dinare e de àere pagadu de butzaca is musitzistas suos, firmos dae prus de un’annu, e a pustis at remonadu su fatu de is 49 milliones pùblicos chi sa Lega depet a s’Istadu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Ispidale de Santu Bainzu firmu a su palu:ritardos chi iscobiant unu sistema chentza disignu.

S’abertura de s’ispedale nou de Santu Bainzu Monreale patit unu rinviu novu e, segundu sas istimas prus reghentes, s’ispidale no at a èssere operativu a innantis de su 2027. Una data ancora a tesu, mescamente si  si cunsiderat chi s’istùdiu de possibilidade est de sa segunda metade de sos annos Duamìzza e chi su cantieri, cumintzadu in su 2022, est bistadu prenu de abbaccamentos, firmadas e torradas a cumintzare chi ant fattu su percursu isvariadu meda.

Su ritardu de su cantieri ponet in lughe una difficultade prus manna: sa Sardigna bivet dae annos sa mancàntzia de una progetatzione sanidària firma e coerente. S’Ìsula non tenet unu pranu azzorronadu e abberu orientadu a sos bisònzos de sas comunidades, pro itte s’ùrtimu Pianu sanidàriu regionale est de su 2007. In su mentres, si sunt sighidas refformas e cuntra refformas, acuntzentramentos e cummissariamentos chi non ant resòrvidu sos problemas istruturales de s’assentu sanidàriu regionale.

A cumplicare de prus  su cuadru est sa crèschida de su campu privadu, in manera particulare si biet in sos tzentros prus populados, in ue ant pigadu forma poliambolatòrios modernos e istruturas chirùrgicas novas capatzes de apparare servìtzios lestros. In parallelu, sa salude pùbrica fadigat semper prus a garantire sas prestassiones netzessàrias, cun su perìgulu beru de allargare sa distantzia intre chie podet atzèdere a curas deretas agguantande costos privados e chie imbetzes est costrintu a si cunfrontare cun listas de isettu, tempos longos e mancàntzias organizativas.

In su Campidanu Mesanu, logu chi isettat unu ispidale novu dae belle vinti annos, custa dèbilesa est evidente meda: sa meighina de s’iscrocca s’est afortigada a pagu a pagu, medas bàrdias mèigas ant serradu o minimadu sos òrarios, sos mèigos de base non bastant e sos servìtzios netzessàrios benint dados cun difficultade. Comunidades intreas s’agatant a bìvere gai in d’una cunditzione de emergèntzia donzi die.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”