Su cantante Fedez at atacadu dae su palcu de su “Concertone” sa Lega e sa Rai e at pedidu un’interventu a su guvernu pro su setore de s’ispetàculu in forte crisi.

Su rapadore at criticadu meda sa Lega pro su ddl Zan, acusende•dda de omofobia e a pustis at acusadu sa Rai de àere pedidu in antìtzipu su testu de s’interventu suo.

Fedez: “Est sa prima bia chi mi sutzedet de dèvere imbiare su testu de un’interventu meu pro more chi bèngiat sutapostu a aprovatzione polìtica, aprovatzione chi in su primu momentu, a dolu mannu, no ddoe est istada, o mègius de is dirigentes de Raitre m’ant pedidu de cuare su nùmene de is partidos e de modificare su testu”.

“Apo dèvidu lutare unu pagheddu – at pretzisadu su cantante – ma a sa fine m’ant donadu su permissu de m’espressare in modu lìberu. Comente nos insegnat su Primu maju, in su piticu nostru devimus lutare pro is cosas importantes.”.

Su rapadore posca at fatu un’atacu grae contra sa Lega pro su ddl Zan – chi pigat su nùmene dae su deputadu Pd Alessandro Zan – sa lege contra s’omotransfobia, chi a pustis de chidas de chistiones e ostrutzionismu solu in sas dies coladas est istada calendarizada in Senadu.

Faeddos de fogu massimamentee contra su senadore leghista Andrea Ostellari, presidente de sa cummissione Giustìtzia – definidu “sonnigosu” -, acusadu in is dies coladas dae Alessandro Zan etotu de no èssere istadu super partes.

At afirmadu su cantante: “At detzìdidu chi unu disinnu de lege de initziativa parlamentare comente su Ddl Zan, giai aprovadu a sa Càmera, podet èssere blocadu dae sa gana de protagonismu de unu sìngulu, est a nàrrere issu etotu. In efeti Ostellari faghet parte de un’ischieramentu chi s’est distintu in is annos pro sa gherra sua contra s’agualidade.”.

S’artista fatu fatu at elencadu is frases iscandalosas pronuntziadas dae esponentes o candidados de sa Lega in passadu: “Si deo tennere unu fìgiu omosessuale ddu dia brusiare in su furru, omosessuales vìtimas de istrambesas de sa natura, is omosessuales sunt un’isciagura pro sa riprodutzione o su matrimòniu omosessuale caminu pro s’estintzione de sa ratza”.

Iscontru fintzas cun su capu de sa Lega Salvini, at ammentadu a Fedez de s’èssere espressadu in manera no oportuna dae su palcu de su “Concertone”, costadu mesu millione de èuros a is italianos e impreadu dae s’artista pro fàghere una parlata de manca. Pronta sa risposta de su rapadore chi at sunènnidu a su polìticu de s’èssere presentadu sena pedire dinare e de àere pagadu de butzaca is musitzistas suos, firmos dae prus de un’annu, e a pustis at remonadu su fatu de is 49 milliones pùblicos chi sa Lega depet a s’Istadu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22